திருமந்திரம் நான்காம் தந்திரத்தில் 3 ஆவதாக உள்ள “அருச்சனை” தலைப்பைப் பற்றி “திருமந்திரத் திண்ணை” எனும் குழுவில் Zoom நேரலையில் 20-11-2021 அன்று நிகழ்த்திய கலந்துரையாடல்.
Month: December 2021
திருப்போரூர் கந்தசாமி
திருப்போரூர் கந்தசாமி
முருகப்பெருமான் அசுரர்களை எதிர்த்து நிலம் ஆகாயம் கடல் ஆகிய மூன்று பகுதிகளில் நின்று போரிட்டு வெற்றி கண்டார். அசுரர்களின் கர்மத்தை நிலத்தில் நின்று போரிட்டு திருப்பரங்குன்றத்தில் முருகப்பெருமான் அடக்கி வெற்றி பெற்றார். அசுரர்களின் மாயையை கடலில் நின்று போரிட்டு திருச்செந்தூரிலே வெற்றி கண்டார். அசுரர்களின் ஆணவத்தை விண்ணில் நின்று போரிட்டு திருப்போரூரில் வெற்றி கொண்டார். முருகன் யுத்தம் புரிந்த இடம் ஆகையில் யுத்தபுரி என்று அக்காலத்தில் பெயர் பெற்றது. சமராபுரி போரிநகர் என்ற வேறு பெயர்களும் இந்த இடத்திற்கு உண்டு. அசுரர்களுடன் முருகப்பெருமான் போரிட்டபோது மாய வித்தைகள் மூலம் மறைந்திருந்து அசுரர்கள் போர் புரிந்தனர். இதனை தனது ஞான திருஷ்டியாலும் பைரவரின் துணையோடும் கண்டறிந்த முருகப்பெருமான் அசுரர்களை சம்ஹாரம் செய்தார். மறைந்திருந்த அசுரர்கள் முருகப் பெருமானின் கண்களில் அகப்பட்ட இடமே கண்ணகப்பட்டு (கண் அகப்பட்டு) என்ற இடமாக திருப்போரூர் அருகில் உள்ளது. இந்த ஊரில்தான் திருப்போரூர் கந்தசுவாமி திருக்கோயிலை நிர்மாணித்த மகான் சிதம்பர சுவாமிகளின் திருமடம் அமைந்துள்ளது. பல யுகங்களுக்கு முன்னால் நடந்த பிரளயத்தால் ஆறு முறை இங்கு உள்ள முருகன் கோவில் அழிவைச் சந்தித்து இருக்கிறது என்று கோவில் புராண வரலாறு உள்ளது. தற்போது ஏழாவது முறையாக மீனாட்சி அம்மனின் அருளாலும் முருகனின் அருளாலும் இக்கோவில் கட்டப்பட்டுள்ளது.
சிதம்பர சுவாமிகள் சாந்தலிங்க அடிகளின் மாணவர். இவர் மதுரையில் தியானத்தில் இருந்த போது அழகிய மயிலொன்று தோகை விரித்து ஆடுவதைக் கண்டு மகிழ்ந்தார். அப்போது தியானத்தில் மீனாட்சி அம்மன் தோன்றி மதுரைக்கு வடக்கே காஞ்சிக்கு கிழக்கே வங்க கடலோரம் யுத்தபுரி என்னும் தலம் அமைந்துள்ளது அங்கே குமரக் கடவுளின் திருவுருவம் பனைமரக் காட்டிற்குள் புதையுண்டு கிடக்கிறது. அதைக் கண்டெடுத்து அழகிய திருக்கோயில் நிர்மாணித்து முருகனை பிரதிஷ்டை செய்து வழிபட்டுவா. அந்த ஆலயத்துக்கு வந்து வழிபடுபவர்களுக்கு வாழ்வில் சகல நன்மைகளும் கிடைக்கும் என்று அருளி மறைந்தார். மதுரையில் இருந்து மீனாட்சி அம்மன் காட்டிய திசையில் பயணித்து தற்போது திருப்போரூர் என்று அழைக்கப்படும் இடத்தை அடைந்தார் சிதம்பர சுவாமிகள். அங்கு இருந்த பனை மரக்காட்டிற்குள் ஒரு வேம்படி விநாயகர் ஆலயம் இருந்தது. அதன் அருகில் ஒரு பெண் பனை மரத்தின் அடியில் ஒரு பனை மரத்தில் செய்த பாத்திரத்தில் சுயம்பு மூர்த்தியாக கந்தப்பெருமான் காட்சியளிப்பதைக் கண்டு மகிழ்ந்தார். சுயம்பு முருகப்பெருமானை அங்குள்ள வேம்படி விநாயகர் கோயிலில் வைத்து பூஜைகள் செய்து வந்தார். ஒரு நாள் அந்த சுயம்பு வடிவ கந்தப்பெருமானின் உருவில் இருந்து முருகப்பெருமான் தோன்றி சிதம்பர சுவாமிகளின் நெற்றியில் திருநீறு அணிவித்து சிவாயநம என்று ஓதி மறைந்தார். அப்போது சிதம்பர சுவாமிகளுக்கு ஒரு கோயிலின் தோற்றமும் அதன் ஒவ்வொரு அங்கங்களும் துல்லியமாக மனத்திரையில் பதிந்தது. இது இறைவனின் திருவருள் இங்கே கோவில் கட்ட வேண்டும் இது இறைவன் ஆணை என்பதை உணர்ந்தவர் மனதில் தோன்றிய கோயில் தோற்றத்தையே ஆலயமாக எழுப்பும் விதத்தில் திருப்பணி ஏற்பாடுகளை செய்யத் தொடங்கினார்.
திருப்போரூர் பகுதியை அப்போது ஆட்சி செய்து வந்த ஆற்காடு நவாப் மன்னனின் மனைவி தீராத வயிற்று வலியால் அவதிப்பட்டு வந்தார். அவர்கள் சிதம்பர சுவாமிகளின் தெய்வீக சக்தியை உணர்ந்து இங்கு வந்தபோது சிதம்பர சுவாமிகள் நவாப் மனைவிக்கு திருநீறு பூச அவரது வயிற்று வலி நீங்கியது. மகிழ்ச்சி அடைந்த நவாப் திருப்போரூரில் சிதம்பர சுவாமிகள் எழுப்பும் முருகன் கோயிலுக்காக 650 ஏக்கர் நிலத்தை தானமாக வழங்கினார். முருகன் அருளால் தனது மனத்திரையில் தோன்றியபடியே அழகிய திருக்கோயிலை கட்டி முடித்தார் சிதம்பர சுவாமிகள். அதுவே இன்றைய திருப்போரூர் கந்தசுவாமி திருக்கோயில் ஆகும். கோவிலின் அருகில் இருந்த ஒடையை குளமாக மாற்றினார். இக்குளத்தில் இருக்கும் நீரானது இது வரை வற்றியது இல்லை. பனை மரத்தடியில் முருகன் இருந்த பனை பாத்திரத்தை தற்போதும் வைத்துள்ளனர். நைவேத்தியத்திற்கான அரிசியை இதில்தான் வைத்துள்ளனர்.
கிழக்குப் பார்த்த ராஜகோபுரத்தை வணங்கி உள்ளே நுழைந்தால் கருவறையில் முருகப்பெருமான் வள்ளி தெய்வானையுடன் கிழக்கு நோக்கி எழுந்தருளியுள்ளார். கந்தசுவாமி சுயம்பு மூர்த்தியாக இருப்பதால் இவருக்கு அபிஷேகம் கிடையாது. பிரதான பூஜைகள் அனைத்தும் ஆமை வடிவத்தின் மேல் பிரதிஷ்டை செய்யப்பட்டுள்ள சுப்பிரமணியர் யந்திரத்திற்கே நடைபெறுகிறது. இந்த யந்திரத்தில் முருகனின் 300 திருப்பெயர்கள் பொறிக்கப்பட்டுள்ளன. முருகனுக்கு பூஜை நடந்தபின் இந்த யந்திரத்திற்கு அபிஷேகங்கள் பூஜைகள் நடக்கும். பிரம்மாவைப் போல் அவருக்குரிய அட்சர மாலை மற்றும் கண்டிகையும் சிவனைப் போல் வலது கையால் ஆசிர்வதிக்கும் அபயஹஸ்த முத்திரையும் பெருமாளைப் போல் இடது கையை தொடையில் வைத்து ஊருஹஸ்த முத்திரையும் என மும்மூர்த்திகளின் அம்சமாக கந்தசாமி முருகன் அருள்பாலிக்கிறார். சுவாமிக்கு எதிரே ஐராவதம் (வெள்ளையானை) வாகனமாக உள்ளது. இந்த கோயிலின் தல மரம் வன்னி மரம் ஆகும். கோவிலின் தெற்கே உள்ள குளத்தின் பெயர் வள்ளையார் ஓடை என்னும் சரவணப் பொய்கை ஆகும்.
கோவிலில் சம்ஹார முத்துக்குமார சுவாமியின் திரு வடிவம் வலது காலை மயில் மேல் ஊன்றி வில்லேந்திய திருக்கோலத்தில் உள்ளார். கோவில் வெளிப்பிரகாரத்தில் விநாயகர் சன்னிதிக்கு அருகில் சனீஸ்வரர் தனிச் சன்னிதியில் எழுந்தருளி உள்ளார். இக்கோயிலில் பைரவர் நாய் வாகனம் இல்லாமல் தனிச்சன்னிதியில் மூலவர் கந்தசுவாமியை பார்த்த வண்ணம் உள்ளார். கொடிமரம் கோபுரத்திற்கு வெளியே இருக்கிறது. வள்ளி தெய்வானைக்கு தனித்தனி சன்னதிகள் உள்ளன. முருகன் சன்னதி கோஷ்டத்தில் பிரம்மாவின் இடத்தில் பிரம்ம சாஸ்தா (முருகனின் ஒரு வடிவம்) இருக்கிறார். இங்கு நவக்கிரக சன்னதி கிடையாது. முருகன் சன்னதி சுற்றுச்சுவரில் முருகரது ஒரு வடிவமான குக்குடாப்தஜர் (குக்குடம் என்றால் சேவல்) சிலை உள்ளது. ஒரு கையில் சேவல் வைத்திருப்பதால் இவருக்கு இப்பெயர் ஏற்பட்டது. கையில் வில்லேந்தி மயில்மேல் காலை வைத்தபடி சம்ஹார முத்துக்குமார சுவாமிக்கும் இங்கு சிலை உள்ளது. கோயில் பிரகாரத்தில் வான்மீகநாதர் சிவலிங்க சன்னதி உள்ளது. இவருக்கு துணைவியான அம்பாள் பக்தர்களுக்கு புண்ணியம் கிடைக்க காரணமாக இருப்பதால் இவருக்கான புண்ணிய காரணியம்மன் என்று பெயர். ஓம்கார அமைப்பில் அமைந்த இக்கோயில் சுவாமியை தரிசித்துவிட்டு வெளியேறும்போது சன்னதியிலிருந்து பார்த்தால் முன்னால் செல்பவர்களின் முதுகு தெரியாதபடி நுட்பமாக கட்டப்பட்டுள்ளது.
முருகனைப் போற்றி சிதம்பர சுவாமிகள் 726 பாடல்கள் பாடினார். தனது குருவான சாந்தலிங்க அடிகளின் நூல்களுக்கு உரைகள் எழுதி உள்ளார். உபதேச உண்மை உபதேசக் கட்டளை திருப்போரூர் சந்நிதி முறை தோத்திர மாலை திருப்பாதிரிப் புலியூர்ப் புராணம் முதலியனவும் திருப்போரூர் முருகன் மீது கிளிப்பாட்டு குயில்பாட்டு தாலாட்டு திருப்பள்ளிஎழுச்சி ஊசல்தூது என பல பாடல்கள் பாடியுள்ளார். இவருக்கு கோவிலுக்குள் சன்னதி உள்ளது. வைகாசி விசாகத்தன்று இவருக்கு குருபூஜை வைபவம் நடக்கும். கோவிலின் சாலையின் மறுபுறமுள்ள பிரணவ மலை என்றும் சிவன் மலை என்றும் அழைக்கப்படும் சிறு குன்றின் மேல் அருள்மிகு கைலாசநாதர் பாலாம்பிகை கோவிலை வடிவமைத்த சிதம்பர சுவாமிகள் அந்த கோவிலின் பிரகாரத்தில் பாதாளத்தில் சுரங்கபாதை அமைத்து அதில் சமாதி அடைந்தார்.
அருணகிரிநாதர் திருப்புகழில் இத்தலம் பற்றி பாடல் பாடியுள்ளார். அவர் கந்தசுவாமியை சகல வேதங்களின் வடிவம் எனக் குறிப்பிட்டுள்ளார். இதனால் சுவாமிக்கு வேதஉச்சியாக சுவாமி என்றும் பெயருண்டு. அனைத்து வேதங்களுக்கும் தலைமையாக இருப்பவர் என்பது இதன்பொருள். கந்தசஷ்டி விழா இங்கு விசேஷமாக நடக்கும். இவ்வேளையில் கஜமுகன் பானுகோபன் சிங்கமுகன் சூரபத்மன் அஜமுகி தாரகன் ஆகிய அசுரர்களை வதம் செய்வார். மாசி பிரம்மோற்ஸவத்தின் போது முருகன் பிரம்மாவிற்கு பிரணவ உபதேசம் செய்யும் வைபவம் நடக்கும். முருகன் வாய் மீது கை வைத்துள்ள சிவனின் மடியில் அமர்ந்து உபதேசம் செய்யும் சிலையும் இங்குள்ளது. இவ்வேளையில் மகாவிஷ்ணு விநாயகர் நந்தி பிரம்மா இந்திரன் ஆகியோரும் உடனிருப்பர்கள்.
சுப்ரமணியர் எந்திரம் 
சிவனின் மடியில் உபதேச முருகர் 
குக்குடாப்தஜர் 
சம்ஹார முத்துக்குமரர் 
வெள்ளை யானை 
கொடிமரம் 
சிதம்பர சுவாமிகள் 
சிதம்பர சுவாமிகள்
சுலோகம் -88
பகவத் கீதை 2. சாங்கிய யோகம் 2-41
குரு வம்சத்தில் வந்தவனே இந்த கர்ம யோகத்தில் உறுதியான புத்தி ஒன்று தான் இருக்கிறது. இந்த கர்ம யோகத்தில் மனதை நிலை நிறுத்தாமல் உள்ளவர்களுக்கு அறிவு பல வழிகளிலும் பாய்கிறது. இது முடிவில்லாததாக இருக்கிறது.
இந்த சுலோகத்தின் கருத்து என்ன?
கர்ம யோகத்தின் வழியில் எதிர்பார்ப்பில்லாத செயலை செய்யும் போது அவனது புத்தி ஒரே குறிக்கோளுடன் செயல்பட்டு அது அவனை மோட்சத்திற்கு அழைத்து செல்கிறது. ஆனால் குறிப்பட்ட பலன்களை எதிர்பார்த்து செயலை செய்யும் போது புத்தியானது ஒரே சிந்தணை குறிக்கோளுடன் இருப்பதில்லை. புத்தியானது தனது சிந்தனைகளையும் முடிவுகளையும் அடிக்கடி மாற்றிக் கொண்டே இருக்கிறது. இது முடிவில்லாமல் நீண்டு கொண்டே இருக்கிறது.
ஜீவ நாடி வழியாக அகத்திய மாமுனிவர் வாக்கு: 158
ஜீவ நாடி வழியாக அகத்திய மாமுனிவர் வாக்கு: 158
கேள்வி: ஐயனே தங்களை எங்களுக்குக் காட்டி அருள வேண்டும்:
எத்தனையோ தர்ம வழிகளை காட்டி அருளுகிறோம். எத்தனையோ நீதி வழிகளை காட்டி அருளுகிறோம். எத்தனையோ சத்திய வழிகளைக் காட்டி அருளுகிறோம். எத்தனையோ இறை வழிகளை காட்டி அருளுகிறோம். எனவே இறையே காட்டானை மீது அமர்ந்து வந்தாலும் தன்னைக் காட்டானை காட்டானை என்றுதான் இறையே இருக்கிறார். இந்த காட்டானையை நீ பிடித்து நன்றாக வழிபடு. காட்டானை உன் அருகில் இருக்க அதை தவிர வேறு காட்டானை எதற்கு? எனவே காட்டானை காட்டானை ஆக இருக்க நாங்கள் மட்டும் காட்டி அருளும் தன்மைக்கு ஏன் வர வேண்டும்? இருந்தாலும் காட்டிக் காட்டிக் காட்டி அருளுகிறோம். காட்டானை திருவடி வணங்கி நாங்கள் காட்டி அருளுகிறோம் காட்டானை. தன்னைக் காட்டாத காட்டானை நாங்கள் காட்டி அருளுகிறோம். அந்தக் காட்டானையின் திருவருளாலே எங்களைக் காட்டி அருளுகிறோம். எங்களைக் காட்டி அருளுமாறு அந்தக் காட்டானை அருள் புரிந்தால் நாங்கள் எங்களையும் காட்டி அருளுகிறோம். காட்டானை அருள வேண்டும் என்று தன்னைக் காட்டானை திருவடி வணங்கி வேண்டிக்கொள்.
இந்த கேள்வியில் காட்டி என்ற தமிழ் வார்த்தை வைத்து பதில் கொடுக்கும் அகத்தியர் தழிழில் விளையாடி தமிழின் சிறப்பையும் அழகையும் காட்டியிருக்கிறார். அனைவரும் புரிந்து கொள்ள வேண்டும் என்பதற்காக பதிலை கீழே விளக்கத்துடன் கொடுத்திருக்கிறோம்.
எத்தனையோ தர்ம வழிகளை காட்டி (தெரிவித்து) அருளுகிறோம். எத்தனையோ நீதி வழிகளை காட்டி (தெரிவித்து) அருளுகிறோம். எத்தனையோ சத்திய வழிகளைக் காட்டி (தெரிவித்து) அருளுகிறோம். எத்தனையோ இறை வழிகளை காட்டி (தெரிவித்து) அருளுகிறோம். எனவே இறையே காட்டானை (காட்டு யானையின் தோலை உரித்து அதன் மீது அமர்ந்திருக்கும் கஜசம்ஹார மூர்த்தி) மீது அமர்ந்து வந்தாலும் தன்னைக் காட்டானை (வெளிப்படுத்தாமல் இருப்பவனை) காட்டானை (வெளிப்படுத்தாமல் மறைந்து இருக்க வேண்டும்) என்றுதான் இறையே இருக்கிறார். இந்த காட்டானையை (கஜசம்ஹார மூர்த்தியாக அகங்காரத்தை அழித்து அதன் மேல் அமர்ந்து இருப்பவனை) நீ பிடித்து நன்றாக வழிபடு. காட்டானை (தன்னை வெளிப்படுத்திக் கொள்ளாமல்) உன் அருகில் இருக்க அதை தவிர வேறு காட்டானை (தன்னை வெளிப்படுத்திக் கொள்ளாத வேறு ஞானிகளோ சித்தர்களோ) எதற்கு? எனவே காட்டானை (தன்னை வெளிப்படுத்திக் கொள்ளாதவன்) காட்டானை (தன்னை மறைத்துக் கொண்டு இருக்க) ஆக இருக்க நாங்கள் மட்டும் காட்டி (வெளிப்படுத்திக் கொண்டு) அருளும் தன்மைக்கு ஏன் வர வேண்டும்? இருந்தாலும் காட்டிக் காட்டிக் காட்டி (பல வழியாகத் தெரிவித்து) அருளுகிறோம். காட்டானை (தன்னை வெளிப்படுத்திக் கொள்ளாமல் இருப்பவனின்) திருவடி வணங்கி நாங்கள் காட்டி (தகுதியுள்ளவர்களுக்கு வெளிப்படுத்தி) அருளுகிறோம் காட்டானை (கஜசம்ஹார மூர்த்தியாக அகங்காரத்தை அழித்து அதன் மேல் அமர்ந்து இருப்பவனை). தன்னைக் காட்டாத (வெளிப்படுத்திக் கொள்ளாமல்) காட்டானை (மறைந்து இருப்பவனை) நாங்கள் காட்டி அருளுகிறோம். அந்தக் காட்டானையின் (கஜசம்ஹார மூர்த்தியாக அகங்காரத்தை அழித்து அதன் மேல் அமர்ந்து இருப்பவனின்) திருவருளாலே எங்களைக் காட்டி அருளுகிறோம். எங்களைக் காட்டி அருளுமாறு அந்தக் காட்டானை (கஜசம்ஹார மூர்த்தியாக அகங்காரத்தை அழித்து அதன் மேல் அமர்ந்து இருப்பவன்) அருள் புரிந்தால் நாங்கள் எங்களையும் காட்டி அருளுகிறோம். காட்டானை (கஜசம்ஹார மூர்த்தியாக அகங்காரத்தை அழித்து அதன் மேல் அமர்ந்து இருப்பவன்) அருள வேண்டும் என்று தன்னைக் காட்டானை (தன்னை வெளிப்படுத்திக் கொள்ளாமல் இருப்பவனின்) திருவடி வணங்கி வேண்டிக்கொள்.
கேள்வி: சித்தர் காடு பற்றி
நாடி என்னும் நாமம் உடைய சித்தன் அங்கு அடங்கி இருப்பது உண்மை. குருவாரம் (வியாழக்கிழமை) முழு மதி தினங்களில்(பெளர்ணமி) அங்கு வழிபாடு செய்வது நன்மையைத் தரும். பித்த நிலை மனிதர்களுக்கு பித்தம் தெளியும்.
நாடி என்று அழைக்கப்படும் சிற்றம்பல நாடி சித்தரின் வரலாற்றை அறிந்து கொள்ள கீழ் உள்ள லிங்கை க்ளிக் செய்யவும்.
சுலோகம் -87
பகவத் கீதை 2. சாங்கிய யோகம் 2-40
கர்ம யோகத்தின் மூலம் தொடங்கப்பட்ட முயற்சிக்கு அழிவில்லை. இந்த முயற்சியில் பாவங்கள் ஏற்படுவதில்லை. இந்த கர்ம யோகம் என்ற தர்மத்தை சிறிதளவு கடைபிடித்தால் கூட இந்த தர்மமானது சம்சார பந்தம் என்ற பிடியில் இருந்து காப்பாற்றும்.
இந்த சுலோகத்தின் கருத்து என்ன?
கர்ம யோகம் என்பது செய்கின்ற செயல்களில் பலனை எதிர்பார்க்காமலும் வருகின்ற பலன் மீது பற்று வைக்காமலும் தொடர்ந்து செயலாற்றுதல் ஆகும். கர்ம யோகத்தை கடைபிடிக்க ஆரம்பித்த சாதகர் அதனை தொடர்ந்து செய்யாமல் விட்டு விட்டாலும் ஆரம்பத்தில் செய்த கர்மத்தின் பலனானது அழிவதில்லை. அது சாதகரின் உள்ளத்தில் விதை போல் ஊன்றி நின்று சாதகரை மீண்டும் இந்த யோகத்தை செய்ய உந்துதலை கொடுத்துக் கொண்டே இருக்கிறது. இந்த கர்ம யோகத்தை சரியாக செய்யும் போது ஏதேனும் தெரியாமல் தவறு செய்துவிட்டாலும் கூட பாவங்கள் ஏற்படாது. இந்த கர்ம யோகத்தின் தர்மமானது சம்சார பந்தம் என்னும் பிடியிலிருந்து காப்பாற்றி மோட்சத்திற்கு அழைத்துச் செல்லும்.
ஜீவ நாடி வழியாக அகத்திய மாமுனிவர் வாக்கு: 157
கேள்வி: பார்வதி சுயம்வர யாகம் எப்போது நடத்தலாம்?
பொதுவாக இறைவனை வணங்க காலம் திதி நாழிகை எதுவும் முக்கியமல்ல என்றாலும் சிறப்பாக கூறவேண்டும் என்றால் பொதுவாக திருமணம் என்பது யாருடைய பொறுப்பு? சுக்கிரன் பொறுப்பு. எனவே வெள்ளிக்கிழமையில் செய்வது விசேஷம். அதேசமயம் திருமணம் நிகழவேண்டும் என்றால் யார் பார்வை வேண்டும்? குரு அப்படியானால் வியாழக்கிழமையும் தேர்ந்தெடுக்கலாம். அதேசமயம் திருமணம் எனப்படுவது மங்கலம் எனவே மங்கலவாரமான செவ்வாய்க்கிழமையும் எடுத்துக் கொள்ளலாம். அதேசமயம் திருமணம் திருமணத்திற்குரிய எண்ணம் சிந்தனை போன்றவை சந்திரனுக்கு உட்பட்டது. எனவே திங்களையும் தேர்வு செய்யலாம். அடுத்து நட்சத்திரங்களை எடுத்துக் கொண்டால் பொதுவாக ஒரு நட்சத்திரத்தை நாங்கள் கூறுவதாகக் கொள்வோம். அதில் கலந்து கொள்பவர்களுக்கு அன்று சந்திராஷ்டமம் ஆகயிருந்தால் நீ என்ன செய்வாய்? எனவேதான் இதுபோன்ற பொது பூஜைகளுக்கு நாள் நட்சத்திரம் பார்ப்பதைவிட அனைவரும் கலந்து கொள்ளும்படியான ஒருநாளை தேர்வு செய்வதே சிறப்பு.
கேள்வி: ஒழுக மங்கலம் பைரவரைப் பற்றி:
ஒழுக மங்கலம் கோவில் உள்ள இடம் சிவகங்கை மாவட்டம் திருப்பத்தூர் வட்டம்
கடுமையான தலைமுறை தோஷங்களையும் பித்ரு தோஷங்களையும் பிதுராதி வழி வருகின்ற சாபங்களையும் பிதுர்களுக்கு செய்ய வேண்டிய கடமைகளை செய்யாமல் தவறிய தோஷங்களையும் பிரம்மஹத்தி தோஷங்களையும் நீக்க கூடிய ஸ்தலங்களில் இதுவும் ஒன்று. இந்த பைரவருக்கு அணையா தீபம் தொடர்ந்து ஏற்றுவது தில யாகம் செய்வதற்கு சமம்.
இக்கோவிலை இறைவனின் புகைப்படங்களை மேலும் பார்க்க கீழ் உள்ள லிங்கை க்ளிக் செய்யுங்கள்
மெய்ஞானபுரீஸ்வரர்
சிவகங்கை மாவட்டத்தில் உள்ள டி வைரவன்பட்டியில் மெய்ஞானபுரீஸ்வரர் ஆலயம் உள்ளது. மூலவர் திருமெய்ஞான சுவாமி லிங்கத் திருமேனியாக கிழக்கு நோக்கி அருள்பாலிக்கிறார். அம்மாள் பாகம்பிரியாள். பெரிய பிரகாரம் நந்தி மண்டபம் உள்பிரகாரம் மகாமண்டபம் அர்த்தமண்டபம் கருவறை என முழுவதும் கற்றளியில் அமைந்துள்ளன. சிறப்பு மூர்த்தியாக தெற்கு நோக்கிய பைரவர் உள்ளார். இத்தலத்தில் மெய்ஞானபுரீஸ்வரர் மூலவராக இருந்தாலும் பைரவரே பிரதான மூர்த்தியாக இருக்கிறார்.
கி.பி.985 -1014ல் அரசு புரிந்த முதலாம் இராஜராஜ சோழன் மாமன்னர் வழிபட்டது. பிரபாகரன் என்ற நூலை போதிக்கும் அந்தணர்களுக்கு அறக்கொடை நல்கியது. மாறவர்மன் குலசேகர பாண்டியன் சுந்தரபாண்டியன் விஜய நகர அரசர்கள் புஜபலதேவன் அச்சுத தேவராயன் மதுரை விசுவநாத நாயக்கர் தஞ்சை ரகுநாத நாயக்கர் ஆகியோர் கால கல்வெட்டுகளும் தான சாசனங்களும் இங்குள்ள கல்வெட்டுக்களில் பொறிக்கப்பட்டுள்ளன.
சுலோகம் -86
பகவத் கீதை 2. சாங்கிய யோகம் 2-39
சுலோகம் -86
பார்த்தனே இது வரை உனக்கு ஆத்ம ஞானம் பற்றி கூறினேன். இனி கர்ம யோக வழியில் சொல்கிறேன். நீ இந்த புத்தியோடு கூடியவனாகி கர்ம பந்தத்தை விலக்கி விடுவாய்.
இந்த சுலோகத்தின் கருத்து என்ன?
ஆத்ம ஞானம் என்பது பரம்பொருளுக்கும் ஜூவனுக்கும் இடையே உள்ள தொடர்பு பற்றிய ஞானம் ஆகும். ஆத்ம ஞானம் மோட்சம் பெறுவதற்கான ஒரு வழியாகும். இந்த ஆத்ம ஞானத்தைத் தெரிந்து கொண்ட பின்னர் இதன் வழியாக மோட்சம் அடைவதற்கான கர்மங்களை சரியாக செய்வதில் புத்தியை பயன்படுத்த வேண்டும். இதுவரையில் ஆத்ம ஞானம் பற்றி உனக்கு விளக்கமாக கூறினேன். நீ தெரிந்து கொண்ட இந்த ஆத்ம ஞானத்தின் வழியாக கர்ம யோகத்தில் உனது புத்தியை எவ்வாறு செலுத்த வேண்டும் என்று இனி கர்ம யோகம் பற்றி கூறுகிறேன். கர்ம பந்தம் என்பது கர்மம் மூலம் உண்டாகும் சம்சாரப் பிடிப்பு ஆகும். இதனையும் நீ அறிந்து கொண்ட பின்னர் கர்மத்தினால் உண்டாகும் விளைவுகள் குறித்து நீ கவலைப் படமாட்டாய் என்று அர்ஜூனனுக்கு கிருஷ்ணர் உபதேசம் செய்கிறார்.
ஜீவ நாடி வழியாக அகத்திய மாமுனிவர் வாக்கு: 156
கேள்வி: பெரிய கருப்பூர் ஆலய முருகனுக்கு சேவல் கொடி வாங்கி அளிக்க:
திருச்சியிலிருந்து 14 கி.மீ உள்ள ஜீயபுரம் பகுதியில் அமைந்துள்ள பெரிய கருப்பூர் ஆலய முருகனுக்கு திருச்சி அன்பர்கள் சேவல் கொடி வாங்கி அளிக்க ஆசிகள் கேட்டபோது அகஸ்தியம் பெருமான் அருளிய வாக்கு.
கொடிய வினை போக
கொடிய பாவம் போக
கொடிய மாந்தனின் (மனிதனின்) வாழ்வு மாய
கொடிய உறவுகள் விலகிப் போக
கொடிய சம்பவங்கள் வாழ்வில் நடக்காமல் இருக்க
கொடியை வாங்கி திருத்தொண்டு செய்வது சிறப்பு.
கேள்வி: கூத்தைப் பார் அம்பாள் ஆனந்தவல்லி குறித்து:
கோவில் உள்ள இடம்: கூத்தப்பர் (திருச்சியிலிருந்து 15 கி.மீ திருவெறும்பூர் வட்டம்)
பெயரிலேயே இருக்கிறதப்பா ஆனந்தம் என்பது. மெய்யான அன்போடு பக்தியோடு அவனவன் பிறந்த நட்சத்திர நாளன்றும் பெளர்ணமி நாளன்றும் அன்னைக்கு முடிந்த வழிபாட்டை செய்தால் திருமண தோஷம் நீங்கும். கணவன் மனைவி கருத்து வேறுபாடு நீங்கும். பிள்ளைச் செல்வம் கிடைக்கும். பொருளாதார பிரச்சனை நீங்கும். அன்னை திரு வின் அதாவது அன்னை மகாலட்சுமியின் அருளும் கிடைக்கும். இந்த ஆலயத்திலே சத்ரு சம்ஹார யாகத்தையும் செய்யலாம். அனைத்தையும் விட சுவர் இருந்தால்தான் சித்திரம் என்பதைப் போல தேகம் நன்றாக இருப்பதற்கான ஆயுள் விருத்தி யாகத்தையும் இங்கு செய்யலாம். எனவே இந்த கூத்தைப் பார் ஆலயம் ஒரு சிறப்பை அல்ல பல சிறப்புகளை கொண்டது.
ஜீவ நாடி வழியாக அகத்திய மாமுனிவர் வாக்கு: 155
கேள்வி: பித்ருக்களுக்கு திலதர்ப்பணம் செய்யும் முறை பற்றி:
தெய்வ சமுத்திரக் கோட்டம் எனப்படும் இராமேஸ்வரம் சென்று அது ஏனோ தானோ என்று இருந்தாலும் ஒரு முறை செய்துவிட்டு பிறகு அங்கு முடிந்தவரை ஏழைகளுக்கு உதவி செய்துவிட்டு இறைவனுக்கு வழிபாடுகள் செய்து விட்டு தீபங்களும் ஏற்றி விட்டு பிறகு அமைதியாக அவரவர் இல்லத்திற்கு வந்து கூட பித்ரு சாப நிவர்த்தி பூஜையை செய்து கொள்ளலாம். தில தர்ப்பணம் என்றால் எள்தான் பயன்படுத்த வேண்டும் என்பது இல்லை. மற்ற யாகங்களைப் போல் சகல பொருள்களை பயன்படுத்தியும் செய்யலாம். முதலில் வழக்கம் போல் கணபதி யாகம் குல தெய்வ யாகம் செய்து விட்டு நவகிரக யாகம் நரசிம்மர் யாகம் சுதர்சனர் யாகம் சரபேஸ்வரர் யாகம் துர்கை யாகம் செய்து விட்டு நவகிரகங்களின் அதி தேவதைகளுக்கும் பூஜை செய்து பிறகு இறுதியாக எந்த இல்லத்திற்காக இது நடத்தப்படுகிறதோ அவர்களுக்குத் தெரிந்த முன்னோர்களின் பெயரை எல்லாம் கூறி (இதில் கூட எமக்கு முழுமையான உடன்பாடு இல்லை. ஏன் என்றால் பெயர் என்பது உடலுக்கு இடப்படுவது தான். என்றாலும் அப்போது வாழ்கின்ற மனிதர்கள் உணர வேண்டும் என்பதற்காகத் தான் நாமாவளி) மானசீகமாகவோ அல்லது வாய்விட்டோ எங்கள் குடும்பத்தில் இதற்கு முன்பு வாழ்ந்து மறைந்த முன்னோர்கள் இன்று எந்த நிலையில் இருந்தாலும் இன்று யாங்கள் செய்கின்ற யாகம் பூஜை மற்றும் தர்ம பலனால் இந்த பலனின் எதிரொலியால் இறைவனின் அருளால் பித்ரு தேவதைகள் இந்த பலனை எடுத்து அவர்களுக்கும் பயன்படுத்தி அதன் மூலம் அவர்களின் நிலை மாறி நற்கதியும் சற்கதியும் அடைவதற்கு இந்த பூஜையை பயன்படுத்தி கொள்ளுமாறு இறையிடமும் ஏனைய தேவதைகளிடமும் மனதார பிராத்தனை செய்து கொள்கிறோம் என்ற கருத்து வருமாறு வாசகங்களை அமைத்து கொள்ள வேண்டும்.
பித்ரு தோஷ நிவர்த்தி பூஜையில் அதாவது தில யாகத்திலே மிகச்சிறப்பே கோ (பசு) தானம் தான். தானங்கள் 32 க்கும் மேற்பட்டு உள்ளன. கோ தானம் சுவர்ண தானம் வெள்ளி தானம் அன்ன தானம் என்று விதவிதமான தானங்கள் உள்ளன. ஆனால் அனைவராலும் இவைகளை செய்ய முடியாது. வாய்ப்பு இருப்பவர்கள் செய்யலாம். வாய்ப்பு இல்லாதவர்கள் பசுவிற்கு ஒரு வேளை உணவாவது கொடுக்க வேண்டும். பிறகு ஆலயம் சென்று முடிந்த பூஜைகள் செய்து மோட்ச தீபம் ஏற்றி அந்த பரிகாரத்தை பூர்த்தி செய்து கொள்ளலாம். தில தர்ப்பணத்தை புண்ணிய நதிக்கரையிலோ புண்ணிய கடற்கரையிலோ செய்யும் பொழுது கூறுகின்ற மந்திரங்களின் சக்தி பல மடங்கு அதிகரிக்கும். அது மட்டும் அல்லாது எல்லோருடைய இல்லமும் புனிதமானதாக இராது. தோஷங்கள் நிறைந்ததாக இருக்கும். அப்படி தோஷமுள்ள வீடுகளில் பூஜை செய்தால் அதன் பலன் குறைவு. அதனால்தான் ஆத்ம பலம் தெய்வ பலம் உள்ள சேத்திரங்களை முன்னோர்கள் கூறி வைத்தார்கள்.
