சிவன்

இலகுலீசர்

Posted by Saravanan Thirumoolar on in சிவன் 0 Comment

மதுரை மாவட்டம் மேலூர் வட்டத்தில் உள்ள அரிட்டாபட்டி கிராமத்தில் கிபி 7 அல்லது 8 ஆம் நூற்றாண்டைச் சேர்ந்த முற்கால பாண்டியர் குடைவரைக் கோயில் அமைந்துள்ளது. இக்கோயிலின் வெளிப்பக்கச் சுவரில் செதுக்கப்பட்டுள்ள இலகுலீசர் புடைப்புச் சிற்பம் தமிழகத்திலேயே மிகவும் அரிதான ஆன்மீக மற்றும் வரலாற்றுப் பொக்கிஷமாகக் கருதப்படுகிறது. இலகுலீசர் சிவபெருமானின் 28 ஆவது அவதாரமாகவும் பாசுபத சைவ சமயத்தைத் தோற்றுவித்தவராகவும் வழிபடப்படுகிறார். தலையில் கரண்ட மகுடத்துடனும் மார்பில் பட்டையான யக்ஞோப வீதத்துடனும் லகுலீசர் சிற்ப வடிவில் காட்சி தருகின்றார். இச்சிற்பத்தில் இலகுலீசர் தனது வலக்காலை மடித்தும் இடக்காலை தொங்கவிட்டபடியும் சுகாசன திருகோலத்தில் காட்சியளிக்கிறார். இவரைச் சிவபெருமானின் யோகநிலை வடிவம் என்றும் கூறுவர். வட இந்தியா கோயில்களில் இவரது சிற்பம் வேறு ரூபத்தில் உள்ளது.

இலகுலீசர் கிபி 2 ஆம் நூற்றாண்டு வாக்கில் குஜராத் மாநிலத்தின் காரோஹணம் என்ற ஊரில் பிறந்தவர். பௌத்தமும் சமணமும் விரிவாகப் பரவியிருந்த காலகட்டத்தில் இலிங்க வழிபாட்டைப் புதுப்பித்தவர் என்ற சிறப்பு இவருக்கு உண்டு. இலகுலீசர் உருவாக்கிய சைவ சமத்தின் பிரிவு பாசுபத சைவம் என அழைக்கப்படுவது. சிவபெருமானே இலகுலீசராக அவதாரம் செய்தார் என்று ஏகலிங்கி என்ற ஊரில் உள்ள கல்வெட்டு கூறுகிறது. இலகுலீசரின் பாசுபத சித்தாந்தத்தை அடிப்படையாகக் கொண்டு இலிங்க வழிபாடு தொடங்கப்பட்ட இடங்கள் காரோஹணம் என்றே வழங்கப்பட்டன. தமிழகத்தில் பக்தி இயக்கக் காலத்தில் காரோஹண சைவம் நிலை பெற்றிருந்தது. இறைவனே மானுட வடிவில் இறங்கி வந்து அவதரிப்பது காரோஹணம் என்று பெயர். அதாவது காயமாகிய உடல் எடுத்து கீழே இறங்கி வருதல் என்ற பொருளாகின்றது.

சிவபெருமானின் 108 போற்றி விளக்கம்

Posted by Saravanan Thirumoolar on in சிவன் 0 Comment
  1. ஓம் சிவாய நமஹ – மங்களகரமானவருக்கு வணக்கம்.
  2. ஓம் மகேஸ்வராய நமஹ – சிவபெருமானுக்கு வணக்கம்.
  3. ஓம் ஷம்பவே நமஹ – நமது மகிழ்ச்சிக்காக மட்டுமே இருக்கும் இறைவனுக்கு வணக்கம்.
  4. ஓம் பினகினே நமஹ – தர்மத்தின் பாதையைக் காக்கும் சிவனுக்கு வணக்கம்.
  5. ஓம் சசிஷேகராய நமஹ – சடைமுடியில் பிறையை அணிந்த இறைவனுக்கு வணக்கம்.
  6. ஓம் வாமதேவாய நமஹ – எல்லா வகையிலும் பிரியமானவரும் மங்களகரமானவருமான இறைவனுக்கு வணக்கம்..
  7. ஓம் விருபாக்ஷாய நமஹ – களங்கமற்ற வடிவத்தின் இறைவனுக்கு வணக்கம்.
  8. ஓம் கபர்தினே நமஹ – அடர்த்தியான சடைமுடியுடன் இறைவனுக்கு வணக்கம்.
  9. ஓம் நீலலோஹிதாய நமஹ – விடியற்காலையில் தோன்றும் செந்நிறச் சூரியனைப் போல் ஒளிமயமான இறைவனுக்கு வணக்கம்.
  10. ஓம் சங்கராய நமஹ – எல்லா வளங்களுக்கும் மூலமான இறைவனுக்கு வணக்கம்.
  11. ஓம் ஷுலபனாயே நமஹ – ஈட்டியை ஏந்திய இறைவனுக்கு வணக்கம்.
  12. ஓம் கத்வங்கினே நமஹ – கைப்பிடியுள்ள தடியை ஏந்திய இறைவனுக்கு வணக்கம்.
  13. ஓம் விஷ்ணுவல்லபாய நமஹ – விஷ்ணுவுக்குப் பிரியமான சிவனுக்கு வணக்கம்.
  14. ஓம் சிபிவிஷ்டாய நமஹ – பிரகாசமான ஒளிக் கதிர்களைப் பரப்பும் திருமுகம் கொண்ட இறைவனுக்கு வணக்கம்..
  15. ஓம் அம்பிகாநாதாய நமஹ – அம்பிகையின் இறைவனுக்கு வணக்கம்.
  16. ஓம் ஸ்ரீகாந்தாய நமஹ – நீல ஒளி வீசும் கழுத்தைக் கொண்டவருக்கு வணக்கம்.
  17. ஓம் பக்தவத்ஸாலய நமஹ – பிறந்த கன்றுக் குட்டியைப் போன்ற மென்மையுடன் தன் பக்தர்களைப் பேணி வளர்க்கும் இறைவனுக்கு வணக்கம்.
  18. ஓம் பவாய நமஹ – இருப்பின் சாராம்சத்தில் உருவெடுத்த தெய்வத்திற்கு வணக்கம்.
  19. ஓம் சர்வாய நமஹ – அனைத்தையும் உள்ளடக்கிய சிவனுக்கு வணக்கம்.
  20. ஓம் திரிலோகேஷாய நமஹ – மூன்று உலகங்களுக்கும் அதிபதியான சிவனுக்கு வணக்கம்.
  21. ஓம் சீதகாந்தாய நமஹ – ஆழ்ந்த நீல நிறக் கழுத்தைக் கொண்ட ஆதி ஆன்மாவிற்கு வணக்கம்.
  22. ஓம் சிவப்ரியாய நமஹ – சக்திக்கு பிரியமான தெய்வத்திற்கான வணக்கம்.
  23. ஓம் உக்ராய நமஹ – மகத்தான மற்றும் பிரமிக்க வைக்கும் பிரசன்னத்தைக் கொண்ட சிவனுக்கு வணக்கம்.
  24. ஓம் கபாலினே நமஹ – மனித மண்டை ஓட்டையே பிட்சைப் பாத்திரமாகக் கொண்ட இறைவனுக்கு வணக்கம்.
  25. ஓம் காமராயே நமஹ – எல்லா ஆசைகளையும் வெல்லும் சிவனுக்கு வணக்கம்.
  26. ஓம் அந்தகாசுர சுதனாய நமஹ – அசுரனை கொன்ற இறைவனுக்கு வணக்கம்.
  27. ஓம் கங்காதரய நமஹ – தன் சடையில் கங்கை நதியைத் தாங்கியிருக்கும் இறைவனுக்கு வணக்கம்.
  28. ஓம் லலாதக்ஷாய நமஹ – படைப்பையே விளையாட்டாகக் கொண்ட இறைவனுக்கு வணக்கம்.
  29. ஓம் காலகாலய நமஹ – மரணத்திற்கே மரணமான சிவனுக்கு வணக்கம்.
  30. ஓம் கிருபநிதாய நமஹ – கருணையின் புதையலாக விளங்கும் தெய்வத்திற்கு வணக்கம்.
  31. ஓம் பீமாய நமஹ – அபாரமான வலிமை கொண்ட சிவனுக்கு வணக்கம்.
  32. ஓம் பரசு ஹஸ்தாய நமஹ – தன் கைகளில் கோடரியை ஏந்தியிருக்கும் இறைவனுக்கு வணக்கம்.
  33. ஓம் மிருகபானாய நமஹ – வனாந்தரத்தில் ஆன்மாவைக் காக்கும் இறைவனுக்கு வணக்கம்.
  34. ஓம் ஜடாதராய நமஹ – சடை முடியைத் தாங்கிய சிவனுக்கு வணக்கம்.
  35. ஓம் கைலாசவாசினே நமஹ – கைலாச மலையில் வீற்றிருக்கும் தெய்வத்திற்கு வணக்கம்.
  36. ஓம் கவசச்சினி நமஹ – கவசம் போர்த்திய இறைவனுக்கு வணக்கம்.
  37. ஓம் கதோராய நமஹ – எல்லா வளர்ச்சிக்கும் காரணமான சிவனுக்கு வணக்கம்.
  38. ஓம் திரிபுராந்தகாய நமஹ – மூன்று அசுர நகரங்களை அழித்த இறைவனுக்கு வணக்கம்.
  39. ஓம் விருஷங்காய நமஹ – காளையை சின்னமாகக் கொண்ட தெய்வத்திற்கு வணக்கம்.
  40. ஓம் விருஷபாருதாய நமஹ – காளையை ஓட்டும் சிவனுக்கு வணக்கம்.
  41. ஓம் பாஸ்மோத்துலித விக்ரஹாய நமஹ – புனித சாம்பலால் மூடப்பட்ட இறைவனுக்கு வணக்கம்.
  42. ஓம் சமப்ரியாய நமஹ – சாம வேதத்தின் துதிகளை மிகவும் விரும்பும் இறைவனுக்கு வணக்கம்.
  43. ஓம் ஸ்வரமாயாய நமஹ – ஒலியால் படைக்கும் சிவனுக்கு வணக்கம்.
  44. ஓம் திரயிமூர்த்தயே நமஹ – மும்மடங்கு வடிவங்களில் வழிபடப்படும் இறைவனுக்கு வணக்கம்.
  45. ஓம் அனிஷ்வராய நமஹ – நிகரற்ற இறைவனுக்கு வணக்கம்.
  46. ஓம் சர்வக்யாய நமஹ – அனைத்தையும் அறிந்த இறைவனுக்கு வணக்கம்.
  47. ஓம் பரமாத்மனே நமஹ – பரம் பொருளுக்கான வணக்கம்.
  48. ஓம் சோமசூரக்னி லோச்சனாய நமஹ – சோமன், சூர்யன் மற்றும் அக்னியின் கண் ஒளிக்கு வணக்கம்.
  49. ஓம் ஹவிஷே நமஹ – நெய் பிரசாதம் பெறும் சிவனுக்கு வணக்கம்.
  50. ஓம் யக்யமயய நமஹ – அனைத்து யாகச் சடங்குகளுக்கும் படைப்பாளனுக்கு வணக்கம்.
  51. ஓம் சோமய நமஹ – ஞானியின் தரிசனமாகிய நிலவொளிக்கு வணக்கம்.
  52. ஓம் பஞ்சவக்த்ராய நமஹ – ஐந்து செயல்களின் இறைவனுக்கு வணக்கம்.
  53. ஓம் சதாசிவாய நமஹ – என்றும் மங்களகரமான கருணையுள்ள சிவனுக்கு வணக்கம்.
  54. ஓம் விஸ்வேஷ்வராய நமஹ – பிரபஞ்சம் முழுவதும் வியாபித்துள்ள இறைவனுக்கு வணக்கம்.
  55. ஓம் விரபத்ராய நமஹ – நாயகர்களில் முதன்மையான சிவனுக்கு வணக்கம்.
  56. ஓம் கணநாதாய நமஹ – கணங்களின் இறைவனுக்கு வணக்கம்.
  57. ஓம் பிரஜாபதயே நமஹ – படைப்பாளருக்கு வணக்கம்.
  58. ஓம் ஹிரண்யரேதசே நமஹ – பொன்னான ஆன்மாக்களை வெளிப்படுத்தும் சிவனுக்கு வணக்கம்.
  59. ஓம் துர்தர்ஷாய நமஹ – வெல்ல முடியாத உயிரினத்திற்கு வணக்கம்.
  60. ஓம் கிரிஷாய நமஹ – புனித கைலாச மலையின் மன்னருக்கு வணக்கம்.
  61. ஓம் கிரிஷாய நமஹ – இமயமலையின் இறைவனுக்கு வணக்கம்.
  62. ஓம் அனகாய நமஹ – எந்த பயத்தையும் தூண்டக்கூடிய சிவனுக்கு வணக்கம்.
  63. ஓம் புஜங்கபூஷணாய நமஹ – பொன்நாகங்களால் அலங்கரிக்கப்பட்ட இறைவனுக்கு வணக்கம்.
  64. ஓம் பர்காய நமஹ – ரிஷிகளுக்கெல்லாம் முதன்மையானவரானவருக்கு வணக்கம்.
  65. ஓம் கிரிதான்வனே நமஹ – மலையை ஆயுதமாகக் கொண்ட தெய்வத்திற்கு வணக்கம்.
  66. ஓம் கிரிப்ரியாய நமஹ – மலைகளை விரும்பும் இறைவனுக்கு வணக்கம்.
  67. ஓம் கிருத்திவாசசே நமஹ – தோல் ஆடை அணிந்த சிவனுக்கு வணக்கம்.
  68. ஓம் புரரதயே நமஹ – வனாந்தரத்தில் தங்கியிருப்பது போன்ற இறைவனுக்கு வணக்கம்.
  69. ஓம் பகவதே நமஹ – செழிப்பின் இறைவனுக்கு வணக்கம்.
  70. ஓம் ப்ரமதாதிபாய நமஹ – பூதங்களால் சேவிக்கப்படும் தெய்வத்திற்கு வணக்கம்.
  71. ஓம் மிருதுஞ்ஜயாய நமஹ – மரணத்தை வென்றவருக்கு வணக்கம்.
  72. ஓம் சூட்சுமதனவே நமஹ – சூட்சுமங்களிலும் சூட்சுமமானவர்களுக்கு வணக்கம்.
  73. ஓம் ஜகத்வ்யாபினே நமஹ – உலகம் முழுவதையும் நிரப்பும் சிவனுக்கு வணக்கம்.
  74. ஓம் ஜகத்குருவே நமஹ – எல்லா உலகங்களுக்கும் குருவானவருக்கு வணக்கம்.
  75. ஓம் வ்யோமகேஷாய நமஹ – நமக்கு மேலே உள்ள பரந்த வானத்தை உருவாக்கும் சடைமுடியைக் கொண்ட தெய்வத்திற்கு வணக்கம்.
  76. ஓம் மஹாசேனஜனகாய நமஹ – மகாசேனாவின் தோற்றத்திற்கு வணக்கம்.
  77. ஓம் சாருவிக்ரமாய நமஹ – அலைந்து திரியும் யாத்ரீகர்களின் பாதுகாவலரான சிவனுக்கு வணக்கம்.
  78. ஓம் ருத்ராய நமஹ – புகழுக்குரிய இறைவனுக்கு வணக்கம்.
  79. ஓம் பூதபதயே நமஹ – பூதங்கள் அல்லது ஆவியுலக உயிரினங்கள் உட்பட, உயிரினங்களின் மூலத்திற்கான வணக்கம்..
  80. ஓம் ஸ்தானவே நமஹ – உறுதியான மற்றும் அசைக்க முடியாத தெய்வத்திற்கு வணக்கம்.
  81. ஓம் அஹிர்புத்ஞாய நமஹ – உறங்கும் குண்டலினிக்காகக் காத்திருக்கும் இறைவனுக்கு வணக்கம்.
  82. ஓம் திகம்பராய நமஹ – பிரபஞ்சத்தையே ஆடையாகக் கொண்ட சிவனுக்கு வணக்கம்.
  83. ஓம் அஷ்டமூர்த்தயே நமஹ – எட்டு வடிவங்களைக் கொண்ட இறைவனுக்கு வணக்கம்.
  84. ஓம் அனேகாத்மனே நமஹ – ஒரே ஆன்மாவான சிவனுக்கு வணக்கம்.
  85. ஓம் சாத்விகாய நமஹ – எல்லையற்ற சக்தியின் இறைவனுக்கு வணக்கம்.
  86. ஓம் சுத்த விக்ரஹாய நமஹ – எல்லா ஐயங்களிலிருந்தும் பிணக்குகளிலிருந்தும் விடுபட்டவருக்கு வணக்கம்.
  87. ஓம் ஷாஷ்வதாய நமஹ – முடிவில்லாத மற்றும் நித்தியமான சிவனுக்கு வணக்கம்.
  88. ஓம் கண்டபரசவே நமஹ – மன வேதனையைப் போக்கும் சிவனுக்கு வணக்கம்.
  89. ஓம் அஜய நமஹ – நிகழும் அனைத்திற்கும் காரணமானவருக்கு வணக்கம்.
  90. ஓம் பாபவிமோச்சகாய நமஹ – எல்லா பந்தங்களையும் நீக்கும் இறைவனுக்கு வணக்கம்.
  91. ஓம் மிருதாய நமஹ – கருணையை மட்டுமே காட்டும் இறைவனுக்கு வணக்கம்.
  92. ஓம் பசுபதயே நமஹ – பரிணமிக்கும் அனைத்து ஆன்மாக்களின் அதிபதியான விலங்குகளுக்கு வணக்கம்.
  93. ஓம் தேவாய நமஹ – தேவர்கள், அர்தேவர்கள் ஆகியோரில் முதன்மையானவருக்கு வணக்கம்.
  94. ஓம் மஹாதேவாய நமஹ – தேவர்களிலேயே சிறந்தவருக்கு வணக்கம்.
  95. ஓம் அவ்யயாய நமஹ – எந்நேரமும் மாறாதவருக்கு வணக்கம்.
  96. ஓம் ஹரயே நமஹ – எல்லா பந்தங்களையும் கலைக்கும் சிவனுக்கு வணக்கம்.
  97. ஓம் பசுதாந்தாபிதே நமஹ – பூஷனைத் தண்டித்தவருக்கு வணக்கம்.
  98. ஓம் அவ்யக்ரய நமஹ – நிலையானவரும் அசைக்க முடியாதவருமான இறைவனுக்கு வணக்கம்.
  99. ஓம் தக்ஷத்வரஹாராய நமஹ – தட்சனின் செருக்கு நிறைந்த யாகத்தை அழித்தவருக்கு வணக்கம்.
  100. ஓம் ஹராய நமஹ – பிரபஞ்சத்தை உள்ளிழுக்கும் சிவனுக்கு வணக்கம்.
  101. ஓம் பகநேத்ராபிதே நமஹ – பகவானுக்குத் தெளிவாகப் பார்க்கக் கற்றுக் கொடுத்த சிவனுக்கு வணக்கம்.
  102. ஓம் அவ்யக்தாய நமஹ – நுட்பமான மற்றும் கண்ணுக்கு தெரியாத சிவனுக்கு வணக்கம்.
  103. ஓம் சஹஸ்ரக்ஷாய நமஹ – எல்லையற்ற வடிவங்களின் இறைவனுக்கு வணக்கம்.
  104. ஓம் சஹஸ்ரபதே நமஹ – எங்கும் நின்றும் நடந்தும் கொண்டிருக்கும் இறைவனுக்கு வணக்கம்.
  105. ஓம் அபவர்கபிரதாய நமஹ – அனைத்தையும் கொடுப்பவரும் எடுப்பவருமான இறைவனுக்கு வணக்கம்.
  106. ஓம் அனந்தாய நமஹ – முடிவில்லாத இறைவனுக்கு வணக்கம்.
  107. ஓம் தாரகாய நமஹ – மனித குலத்தின் மாபெரும் விடுதலை அளிப்பவருக்கு நமஸ்காரங்கள்
  108. ஓம் பரமேஷ்வராய நமஹ – பெருமானுக்கு வணக்கம்.

108 சிவன் பெயர்கள்

Posted by Saravanan Thirumoolar on in சிவன் 0 Comment

சிவபெருமானுக்கு எண்ணிலடங்கா வடிவங்களும் பெயர்களும் உள்ளது. அவற்றில் 108 பெயர்கள் அதிகமாக அறியப்பட்டு உள்ளது. அவற்றில் 108 சிவன் பெயர்களும் அதற்கான பொருளும்:

  1. ஆதிகுரு – முதல் குரு
  2. ஆஷுதோஷ் – அனைத்து விருப்பங்களையும் உடனடியாக நிறைவேற்றுபவர்
  3. ஆதிநாத் – முதல் கடவுள்
  4. ஆதியோகி – முதல் யோகி
  5. அஜா – பிறப்பில்லாதவன்
  6. அக்ஷய குணா – எல்லையில்லா குணங்களை உடையவன்
  7. அனகா – குறையில்லாதவன்
  8. அனந்ததிருஷ்டி – முடிவில்லா நோக்கு உடையவன்
  9. ஔகத் – எப்போதும் திருப்தியாக இருப்பவன்
  10. அவ்யாய பிரபு – அழிக்க முடியாதவன்
  11. பைரவ் – பயத்தை அழிப்பவன்
  12. பலநேத்ரா – நெற்றிக்கண் உடையவன்
  13. போலேநாத் – எளிமையானவன்
  14. பூதேஸ்வரா – பஞ்ச பூதங்களின் மேல் ஆளுமையுடைவன்
  15. பூதேவா – பூமியின் கடவுள்
  16. பூடபாலா – உடல் சிதைந்த மனிதர்களைக் காப்பவன்
  17. சந்த்ரபால் – நிலவின் தலைவன்
  18. சந்த்ரப்ரகாஷ் – பிறைநிலவை சூடியவன் (பிறைசூடி)
  19. தயாளு – கருணை வடிவானவன்
  20. தேவாதி தேவா – கடவுளர்களின் கடவுள்
  21. தனதீபா – செல்வங்களின் கடவுள்
  22. தியான தீப் – தியான ஒளி
  23. தியூடிதரா – பெரும்திறமைகளின் கடவுள்
  24. திகம்பரா – வானத்தையே தனது ஆடையாக அணிந்தவன்
  25. துர்ஜநீயா – அறிந்துகொள்ளப்பட வேண்டியவன்
  26. துர்ஜயா – வெற்றிகொள்ளப்படாதவன்
  27. கங்காதரா – கங்கை ஆற்றின் கடவுள்
  28. கிரிஜாபதி – மலைமகளின் கணவன்
  29. குணக்ரஹின் – குணங்களை ஏற்பவன்
  30. குருதேவா – மஹாகுரு
  31. ஹரா – பாவங்களைக் களைபவன்
  32. ஜகதீஷா – பிரபஞ்சத்தின் தலைவன்
  33. ஜராதிஷாமனா – துயரங்கள்/பாதிப்புகளிலிருந்து மீட்பவன்
  34. ஜாடின் – ஜடாமுடி தரித்தவன்
  35. கைலாஷ் – நிம்மதி/அமைதி அளிப்பவன்
  36. கைலாஷபதி – கைலாய மலையின் கடவுள்
  37. கைலாஷ்நாத் – கைலாஷ்நாத்
  38. கமலாக்ஷணா – தாமரைக் கண்கள் கொண்ட கடவுள்
  39. காந்தா – காந்தா
  40. கபாலின் – மண்டையோடுகளை கழுத்தில் ஆபரணமாக அணிந்திருப்பவன்
  41. கோச்சடையான் – ஜடாமுடி தரித்த அரசன்
  42. குண்டலின் – காதில் அணிகலன்கள் அணிந்தவன்
  43. லாலாடக்க்ஷா – நெற்றிக்கண் உடையவன்
  44. லிங்காத்யக்க்ஷா – லிங்கங்களின் அரசன்
  45. லோகங்காரா – மூவுலகையும் படைத்தவன்
  46. லோகபால் – உலகைக் காப்போன்
  47. மகா புத்தி – எல்லை கடந்த புத்திசாலித்தனம்
  48. மகா தேவா – மஹா கடவுள்
  49. மகா காலா – காலங்களின் கடவுள்
  50. மகா மாயா – மஹா மாயை
  51. மகா மிருத்யுஞ்ஜெயன் – மரணத்தை வென்ற மாவீரன்
  52. மகா நிதி – மிகப்பெரும் களஞ்சியம்
  53. மகா சக்தி மயா – எல்லையில்லா சக்திகளைக் கொண்டவன்
  54. மகா யோகி – மிகப்பெரும் யோகி
  55. மகேசா – உச்ச கடவுள்
  56. மகேஸ்வரா – கடவுள்களின் கடவுள்
  57. நாக பூஷணா – பாம்புகளை ஆபாரணமாக அணிந்தவன்
  58. நடராஜா – நடனக் கலையின் அரசன்
  59. நீலகண்டா – நீல நிற கழுத்தை உடையவன்
  60. நித்யசுந்தரா – எப்பொழுதும் அழகானவன்
  61. நிருத்யப்ரியா – நடனங்களின் காதலன்
  62. ஓம்காரா – ஓம்-ஐ படைத்தவன்
  63. பாலன்ஹார் – அனைவரையும் காப்பவன்
  64. பஞ்சாட்சரன் – வீரியமுடையவன்/ஐந்தெழுத்தைக் கொண்டோன்
  65. பரமேஸ்வரன் – கடவுள்களிலெல்லாம் முதலானவன்
  66. பரம்ஜ்யோதி – மிகப் பெரும் ஒளி
  67. பசுபதி – வாழும் உயிர்க்கெல்லாம் அரசன்
  68. பினாகின் – கையில் வில்லை ஏந்தி இருப்பவன்
  69. ப்ரணவா – ஓம் என்னும் மூல மந்திரத்துக்கு மூலமானவன்
  70. பிரியபக்தா – பக்தர்களின் விருப்பமானவன்
  71. பிரியதர்ஷனா – அன்பான பார்வை உடையவன்
  72. புஷ்கரா – போஷாக்கு அளிப்பவன்
  73. புஷ்பலோச்சனா – பூக்களைப் போன்ற கண்களை உடையவன்
  74. ரவிலோச்சனா – சூரியனைக் கண்ணாக கொண்டவன்
  75. ருத்ரா – கர்ஜிப்பவர்
  76. சதாசிவா – எல்லைகளைத் தாண்டியவர்
  77. சனாதனா – முடிவில்லா கடவுள்
  78. சர்வாச்சார்யா – உச்ச ஆசிரியர்
  79. சர்வஷிவா – முடிவில்லா கடவுள்
  80. சர்வதாபனா – எல்லோருக்கும் முன்னோடியாக இருப்பவர்
  81. சர்வயோனி – எப்போதும் தூய்மையானவர்
  82. சர்வேஷ்வரா – அனைவரின் கடவுள்
  83. ஷம்போ – மங்களகரமானவர்
  84. ஷங்கரா – எல்லா கடவுளர்க்கும் கடவுள்
  85. ஷாந்தா – ஸ்கந்தனுக்கு முன்னோடி
  86. ஷூலின் – மகிழ்ச்சியை அளிப்பவர்
  87. ஷ்ரேஷ்த்தா – சந்திரனின் கடவுள்
  88. ஸ்ரீகந்தா – எப்போதும் தூய்மையானவர்
  89. ஷ்ருதிப்ரகாஷா – திரிசூலத்தை வைத்திருப்பவர்
  90. ஸ்கந்தகுரு – வேதங்களுக்கு ஒளியேற்றுபவர்
  91. சோமேஸ்வரா – தூய்மையான உடலைக் கொண்டிருப்பவர்
  92. சுகடா – மகிழ்ச்சியை அளிப்பவர்
  93. ஸ்வயம்பு – தானாக உருவானவர்
  94. தேஜஸ்வனி – ஒளியைப் பரப்புபவர்
  95. த்ரிலோச்சனா – மூன்று கண்களைக் கொண்ட கடவுள்
  96. த்ரிலோகபதி – மூவுலகிற்கும் அதிபதி
  97. த்ரிபுராரி – அசுரர்கள் உருவாக்கிய 3 திரிபுரத்தை அழித்தவர்
  98. த்ரிசூலின் – திரிசூலத்தை கைகளில் ஏந்தியவர்
  99. உமாபதி – உமாவின் கணவன்
  100. வாச்சஸ்பதி – பேச்சுக்களின் அரசன்
  101. வஜ்ரஹஸ்தா – இடியை தன் கரங்களில் ஏந்தியவன்
  102. வரதா – வரங்களை அளிப்பவர்
  103. வேத கர்த்தா – வேதங்களின் மூலம்
  104. வீர பத்ரா – பாதாள லோகத்தின் முதன்மை கடவுள்
  105. விஷாலாக்க்ஷா – பரந்த பார்வை கொண்ட கடவுள்
  106. விஸ்வேஷ்வரா – பிரபஞ்சத்தின் கடவுள்
  107. விஸ்வநாத் – பிரபஞ்சத்தின் அதிபதி
  108. வ்ரிஷவாஹனா – எருதை வாகனமாகக் கொண்டவர்

கம்பராயப்பெருமாள் காசிவிஸ்வநாதர் கோயில்

Posted by Saravanan Thirumoolar on in ஆலயம், சிவன், பெருமாள் 0 Comment

தேனி மாவட்டத்தில் கம்பம் என்னும் ஊரில் கம்பராயப்பெருமாள் காசிவிஸ்வநாத கோவில் அமைந்துள்ளது. இத்தலம் மும்மூர்த்திகள் தலம் என்று அழைக்கப்படுகிறது. பெருமாளுக்கு தனியாக சன்னதியும் சிவனுக்கு தனியாக சன்னதியும் சிவன் பெருமாள் கோயில்கள் ஒரே வளாகத்தில் தனித்தனி கொடிமரங்களுடன் உள்ளது. பிரம்மா வன்னி மர வடிவில் அருள்பாலிக்கிறார். ஆக மும்மூர்த்திகளும் இத்தலத்தில் அருள்பாலிக்கிறார்கள். பெருமாள் மூலவர் கம்பராயப்பெருமாள். தாயார் அலமேலு மங்கை நாச்சியார் தனிச்சன்னதியில் இருக்கிறாள். விமானத்துடன் தரிசிக்கும் வகையில் இவளது சன்னதி அமைக்கப்பட்டிருக்கிறது. சக்கரத்தாழ்வாருக்கு சன்னதி இருக்கிறது. இவருக்கு பின்புறமுள்ள நரசிம்மர் நான்கு கைகளிலும் சக்கரங்களுடன் காட்சி தருகிறார். சிவன் மூலவர் காசி விஸ்வநாதர். அம்பாள் காசிவிசாலாட்சி. ஆஞ்சநேயர் தட்சணாமூர்த்தி கௌமாரியம்மன் உபசன்னதிகளும் உள்ளன. தலவிருட்சம் வன்னி. தீர்த்தம் சுரபி. மூலவர் சன்னதியின் மேல் உள்ள விமானம் திரிதள விமானம் எனப்படும். இத்தலவிநாயகர் சித்தி விநாயகர் என்ற திருநாமத்துடன் அருள்பாலிக்கிறார். காசி விநாயகர் காவல் தெய்வம் வடமலை மொட்டையாண்டி ஆகிய தெய்வங்களுக்கும் சன்னதி இருக்கிறது. இங்குள்ள முருகப்பெருமான் சண்முகநாதர் என்றழைக்கப்படுகிறார். ஆறுமுகங்களைக் கொண்ட இவருக்கு முன்புறம் ஐந்து முகங்களும் பின்புறம் ஒரு முகமும் கொண்டு வித்தியாசமான அமைப்பில் அருள்பாலிக்கிறார். சிவன் கோயிலில் காசி விஸ்வநாதர் சதுர வடிவ ஆவுடையாருடன் காட்சி தருகிறார். காசி விசாலாட்சிக்கும் சன்னதி இருக்கிறது. கோஷ்டத்திலுள்ள தட்சிணாமூர்த்தி கமண்டலத்துடன் யோக நிலையில் காட்சி தருகிறார். யோக பட்டை அணிந்திருக்கிறார். சீடர்கள் இல்லாமல் இவரது தலைக்கு மேலே கல்லால மரம் இல்லாமல் இவரது காலுக்கு கீழ் முயலகன் இல்லாமல் இருக்கிறார். காலின் கீழ் நாகம் மட்டும் இருக்கிறது.

அக்காலத்தில் இப்பகுதியை ஆண்ட சிற்றரசர் ஒருவருக்கு சிவனுக்கும் பெருமாளுக்கும் ஒரே இடத்தில் கோயில் கட்ட வேண்டுமென்ற ஆசை இருந்தது. எப்படி இக்கோயிலை கட்டுவது என்று அவருக்கு தெரியவில்லை. ஒருநாள் அவரது கனவில் தோன்றிய பெருமாள் மேற்கு மலைத்தொடர்ச்சியின் அடிவாரத்தில் ஒரு கல் கம்பம் இருப்பதைச் சுட்டிக்காட்டி அவ்விடத்தில் தனது சிலை வடிவம் இருப்பதை உணர்த்தினார். அவரது கனவில் பெருமாள் சொன்னபடி சிலையை எடுத்து வந்து இங்கு பிரதிஷ்டை செய்தார். கம்பம் அருகில் கிடைத்தவர் என்பதால் சுவாமிக்கு கம்பராயப் பெருமாள் என்ற திருநாமம் சூட்டினார். அந்த ஊருக்கும் கம்பம் என்று பெயர் வைத்தார். பின்னர் காசியிலிருந்து லிங்கம் கொண்டு வந்து பிரதிஷ்டை செய்து இருவருக்கும் ஒரே நாளில் கும்பாபிஷேகம் செய்வித்தார்.
 
சோழ நாட்டில் உள்ள திருவாலிதிருநகரி என்னும் ஊருக்கு அருகில் உள்ள திருக்குரையலூரில் கார்த்திகை மாதம் கார்த்திகை நட்சத்திரத்தில் பிறந்த குழந்தைக்கு கலியன் என்று பெற்றோர்கள் பெயர் வைத்தார்கள். இவரை நீலன் என்றும் அழைத்தார்கள். இவர் சோழ மன்னனுக்கு படைத்தலைவனாக இருந்தார். ஒருமுறை போர்க் களத்தில் இவருடைய வீரத்தைக் கண்ட அரசன் இவரை சோழ தேசத்தின் ஒரு பகுதியான திருமங்கை என்னும் நாட்டின் மன்னனாக்கினான். அன்று முதல் இவர் திருமங்கை மன்னன் என அழைக்கப்பட்டார். இவர் குமுதவல்லி எனும் மங்கை மீது கொண்ட காதலினால் பெருமாளை வணங்கி வழிபட ஆரம்பித்தார். மங்கையின் விருப்பப்படி திருமங்கை மன்னன் அடியார்களுக்குத் தினமும் அன்னதானம் செய்வதையும் திருக்கோயில் கைங்கரியங்களில் ஈடுபடுவதையும் செய்து வந்தார். காலப்பொழுதில் தன்னை முழுமையாக இதில் ஈடுபடுத்திக் கொண்டு தன் செல்வங்களையும் அரசு செல்வங்களையும் முழுக்க இழந்தார். இறை சேவைக்காக யாசகம் செய்ய ஆரம்பித்தார். அதுவும் போதவில்லை. எனவே திருட ஆரம்பித்து அதில் கிடைக்கும் பொருளை வைத்து அடியார்களுக்கு தினமும் அன்னம் இடுவதையும் திருவரங்கத் திருக்கோயிலுக்கு கைங்கரியங்களையும் செய்து வந்தார். ஒரு நாள் இவர் திருட காத்திருக்கும் இடத்தில் பெருமாள் தன் உருவத்தை மாற்றி இலட்சுமி தேவியுடன் மணக்கோலத்தில் வந்தார். திருமங்கை மன்னன் தன் படையினருடன் அவர்களை மிரட்டி அவர்களது நகைகளை பெற்றுக் கொண்டார். தன் கால் விரல் மோதிரத்தை மட்டும் பெருமாள் கழட்டவில்லை. திருமங்கை மன்னன் மோதிரத்தை கழட்டும்படி கூறியதற்கு என்னால் முடியவில்லை முடிந்தால் நீயே கழட்டிக்கொள் என்றார் பெருமாள். அதேபோல் திருமங்கை மன்னன் குனிந்து தன் பற்களால் விரலைக்கடித்து மோதிரத்தை இழுத்தார். அப்போது பெருமாள் ஆழ்வாரின் காதுகளில் நாராயண மந்திரத்தை உபதேசித்தார். வந்திருப்பது நாராயணன் என்பதை அறிந்த திருமங்கை மன்னன் மண்டியிட்டு பெருமாிடம் சரணடைந்தார். அதன்பின் அவர் ஆழ்வார்களில் ஒருவராகி திருமங்கையாழ்வார் என்று பெயர் பெற்றார்.

திருமங்கையாழ்வாரின் பக்தியையும் அவரது வாழ்க்கையையும் சிறப்பிக்கும் விதமாக இக்கோயிலில் ஆனி மாதம் நடக்கும் பிரம்மோற்ஸவத்தில் திருமங்கையாழ்வார் திருடிய வைபவம் திருவிழாவாக நடத்தப்படுகிறது. அன்று திருமங்கையாழ்வார் திருடுவது போல பாவனை செய்து காவலர்கள் அவரை பிடித்துச் சென்று சுவாமி முன்பு நிறுத்துகின்றனர். அவ்வேளையில் அவர் திருடிய பொருட்களின் பட்டியல் வாசிக்கப்படும். இந்த நிகழ்வுக்கு பட்டோலை வாசித்தல் என்று பெயர். அதன்பின் பெருமாள் திருமங்கையாழ்வாருக்கு காட்சி தரும் நிகழ்வு நடைபெறும். திருவோண நட்சத்திர நாட்களில் பெருமாள் சன்னதியில் ஓண தீபம் ஏற்றப்படும். அர்ஜுனனுக்கு தேரோட்டியாக இருந்ததால் திருவல்லிக்கேணியில் பார்த்த சாரதி கோயில் பெருமாள் மீசையுடன் காட்சி தருகிறார். அது போல் இக்கோயிலில் வைகுண்ட ஏகாதசியன்று ஒருநாள் மட்டும் சுவாமிக்கு மீசையுடன் அலங்காரம் செய்யப்படுகிறது. திருவிழா நாட்களில் பெருமாள் சிலை கிடைக்கப்பெற்ற இடத்திலுள்ள கம்பத்திற்கு முதல் பூஜை செய்யப்படுகிறது. இவ்வூரில் தேரோட்டம் மூன்று நாட்கள் நடக்கும். ஆனி மாத சித்திரை நட்சத்திரத்தில் சக்கரத்தாழ்வாருக்கு விசேஷ ஹோமத்துடன் பூஜை நடக்கிறது. பெருமாள் கோயிலில் கிருஷ்ணஜெயந்தி நவராத்திரி அனுமன் ஜெயந்தி ராமநவமி ஆகிய விழாக்களும் சிவனுக்கு சிவராத்திரி ஆடிப்பெருக்கு ஐப்பசி அன்னாபிஷேகம் ஆருத்ரா தரிசனம் ஆகிய விழாக்கள் நடைபெறுகிறது. இந்த கோயிலை விஜயநகரப் பேரரசு காலத்தில் விஸ்வநாத நாயக்கர் புதுப்பித்து கட்டியிருக்கிறார்.

பெரியவர்

Posted by Saravanan Thirumoolar on in சிவன், சிவன் 0 Comment

திருமந்திரம் பாடல் எண்: 1031

அந்தமில் லானுக்கு அகலிடம் தானில்லை
அந்தமில் லானை அளப்பவர் தாமில்லை
அந்தமில் லானுக்கு அடுத்தசொல் தானில்லை
அந்தமில் லானை அறிந்துகொள் பத்தே

எல்லை இல்லாத இறைவனை அளப்பவர்கள் யாருமில்லை என்று திருமூலர் அருளியிருக்கிறார். அளக்க முடியாத இறைவனை சிற்பி தன்னுடைய சிற்பத்தில் காண்பித்து கற்பனையில் இறைவனின் அளவை மனிதர்களின் அறிவுக்கேற்ப புரிந்து கொள்ளும்படி செதுக்கியிருக்கிறார்.

கங்கைகொண்ட சோழபுரம் சோழீஸ்வரர் கோயிலில் இறைவன் சன்னதிக்கு வெளியே இருக்கும் துவாரபாலகரின் காலடியில் ஒரு மரம். மரத்தில் ஒரு பாம்பு இருக்கும். அந்த பாம்பின் வாயில் யானை இருக்கும். யானை மிகவும் பெரியது. பாம்பின் வாயில் யானை என்றால் அந்த யானையையே விழுங்கும் பாம்பு எவ்வளவு பெரியதாக இருக்க வேண்டும். அந்த பாம்பு ஒரு மரத்தில் இருக்கும். அப்படி என்றால் அந்த மரம் எவ்வளவு பெரியதாக இருக்கும். அந்த மரம் துவாரபாலகர் காலடியில் இருக்கிறது. அப்படி என்றால் துவாரபாலகரின் பாதம் எவ்வளவு பெரியது. பாதமே இவ்வளவு பெரியதென்றால் துவாரபாலகரது உருவம் எவ்வளவு பெரியது. அந்த துவாரபாலகர் தனது கையை கோயிலின் உள்ளே காட்டுகிறார். கோயிலின் உள்ளே இறைவன் இருக்கின்றார். அப்படி என்றால் இறைவன் எத்தனை பெரியவராக இருப்பார்.

சிங்கீஸ்வரர்

Posted by Saravanan Thirumoolar on in ஆலயம், சிவன் 1 Comment

மூலவர் சிங்கீஸ்வரர். உற்சவர் பஞ்சமூர்த்திகள், நடராஜர், சிவகாமி அம்பாள், பிரதோஷநாயர், சந்திரசேகர். அம்பாள் புஷ்பகுஜாம்பாள். மூலவர் மற்றும் அம்பாள் கோபுரம் கிழக்கு திசை நோக்கி அமைந்துள்ளது. தல விருட்சம் இலந்தை மரம். தீர்த்தம் ஸ்வேத பத்ம புஷ்கரிணி கமல தீர்த்தம். ஊர் திருவள்ளுவர் மாவட்டம் மப்பேடு. ஶ்ரீதேவி பூதேவி ஆதிகேசவபெருமாள் சன்னதி உள்ளது. சிவன் சன்னதியின் முன் வீணை ஆஞ்சநேயர் சிலை உள்ளது. ஆஞ்சநேயர் மூல நட்சத்திரத்தில் அவதரிதவர். கலைமகளாகிய சரஸ்வதிக்குரிய நட்சத்திரம் மூலம் நட்சத்திரம். சரஸ்வதி ஒரு மூல நட்சத்திரத்தனறு ஆஞ்சநேயரின் நாவில் வெண்தாமரைத் தண்டினால் சிங்க நாத பீஜாட்சர சக்திகளை பொறித்தாள். இதனால் இவரது பேச்சு தெளிவானதாகவும் உயிர்களைக் காப்பாற்றும் விதத்திலும் சமயோசிதமாகவும் இருந்தது. சொல்லின் செல்வர் என்ற பட்டமும் கிடைத்தது.

சிவபெருமான் பஞ்ச சபைகளில் ஒன்றான திருவாலங்காட்டில் ஆனந்த தாண்டவம் ஆடிய போது சிங்கி என்ற நந்திதேவர் மிருதங்கம் வாசித்தார். அவ்வாறு இசைக்கும் போது இசை பக்தியில் ஆழ்ந்து கண்ணை மூடி விட்டார். இதனால் சிவனின் நடனத்தைக் காண முடியாமல் போய்விட்டது. இசை ரசனையில் சிவ நடனத்தைக் காண முடியாமல் போனதால் அந்த ஆனந்த நர்த்தனத்தைக் காண வேண்டும் என்று சிவனிடம் விண்ணப்பித்தார். அவரது இசை பக்தியை பாராட்டிய சிவன் பூலோகத்திலுள்ள மெய்ப்பேடு என்னும் தலத்திற்கு வருமாறு சொன்னார். நந்திதேவரும் இங்கு சென்று அங்கிருந்த லிங்கத்திற்கு பூஜை செய்தார். அப்போது சிவபெருமான் அவர் முன் தோன்றி மீண்டும் நடனம் புரிந்தார். சிங்கி என்னும் நந்தி வணங்கிய தலம் என்பதால் இறைவனுக்கு சிங்கீஸ்வரர் என பெயர் ஏற்பட்டது. அம்பாள் நறுமணம் மிக்க மலருக்கு உரியவளாக இருப்பதால் புஷ்பகுஜாம்பாள் என்றும் பூமுலைநாயகி என்றும் அழைக்கப்படுகிறாள். தேவர்களும் அசுரர்களும் பாற்கடலை கடைந்தபோது மோகினி அவதாரம் எடுத்த மகாவிஷ்ணு தனது மெய்யான ரூபத்தை பெற இங்கு சிவனை வழிபட்டார். இதனால் இந்த ஊர் ஆரம்ப காலத்தில் திருமால்பேடு (பேடு=பெண்) என்று அழைக்கப்பட்டத. பின்னர் மெய்ப்பேடு என்று அழைக்கப்பட்டு தற்போது மப்பேடு என அழைக்கப்படுகிறது.

கோயில் 5 ஏக்கரில் அமைந்துள்ளது. ராஜகோபுரம் தெற்கு திசை நோக்கி அமைந்துள்ளது. பிரகாரத்தில் ஆஸ்தான விநாயகர், வள்ளி தெய்வானையுடன் முருகன், ஸ்ரீதேவி பூதேவி சமேத ஆதிகேசவ பெருமாள், வீரபாலீஸ்வரர், வீணை ஆஞ்சநேயர், கால பைரவர், சூரிய பகவான், சண்டிகேஸ்வரர் சன்னதிகள் உள்ளன. கோயிலின் வட கிழக்கு மூலையில் சுமார் 5000 ஆண்டுகளுக்கு முன் கட்டப்பட்ட வீர பாலீஸ்வரர் மற்றும் வையாழி விநாயகர் சன்னதி அமைந்துள்ளது. வீரபாண்டியன் தலை கொண்டவன் என்ற பெயர் கொண்ட சோழ மன்னனான இரண்டாம் ஆதித்திய கரிகாலனால் கிபி 976 இல் இக்கோயில் கட்டப்பட்டது. இவர் தஞ்சை பெரிய கோயிலை கட்டிய ராஜராஜ சோழனின் சகோதரர். பின்னர் இதே கிராமத்தில் பிறந்த அரியநாத முதலியார் கிருஷ்ண தேவராயர் மதுரையை ஆண்ட காலத்தில் தளவாயாக இருந்ததால் அவர் தனது செல்வாக்கை பயன்படுத்தி கிபி 1501 இல் கோவில் ராஜ கோபுரம் மதில் சுவர் மற்றும் 16 கால் மண்டபத்தை கட்டி வைத்தார். மேலும் வடகிழக்கு மூலையில் உள்ள பாலீஸ்வர மரகத பச்சைக் கல்லால் ஆன சன்னதியை புதுப்பித்தார். கடந்த 2008 ஆம் ஆண்டு குகஸ்ரீ சுந்தரேச சுவாமிகள்(ஆத்தூர்-சேலம்) முன்னிலையில் இந்து அறநிலையத்துறை சார்பில் சத் சங்கம் பெயரில்,நால்வர் நற்பணி மன்றம் மற்றும் ஊர் பொதுமக்கள் சார்பில் கும்பாபிஷேகம் நடத்தப்பட்டது. இந்த ஆலயத்தில் நடைபெற்ற தொல்லியல் ஆய்வின் போது ஆலயத்தின் பிரதான கோபுர உச்சியில் கிபி 1947 ஆம் ஆண்டு தொல்லியல் ஆய்வறிக்கையில் இரண்டாம் ஆதித்திய கரிகால சோழனால் கட்டப்பட்டதையும் உறுதி செய்கின்றது. கோயிலில் 16 ஆம் நூற்றாண்டைச் சேர்ந்த இரு செப்பேடுகள் கண்டெடுக்கப்பட்டுள்ளன. அவற்றில் சம்ஸ்கிருத மொழி மற்றும் நந்திநாகரி எழுத்து வடிவில் தகவல்கள் எழுதப்பட்டிருந்தது. செப்பேடுகளை ஆய்வு செய்த இந்திய தொல்லியல் துறை சிங்கீஸ்வரர் கோயிலில் கண்டெ டுக்கப்பட்டுள்ள செப்பேடுகள் 1513 ஆம் ஆண்டு விஜயநகர சாம்ராஜ்யத்தைச் சேர்ந்த கிருஷ்ண தேவராய மன்னன் காலத்தைச் சேர்ந்தது. பல பிராமணர்களுக்கு அரசரால் கிருஷ்ணராயபுரா என மறு பெயரிடப்பட்ட வாசல பட்டகா கிராமத்தை பரிசாக அளித்துள்ளதை இந்த செப்பெடுகள் குறிப்பிடுகின்றன.

CREATOR: gd-jpeg v1.0 (using IJG JPEG v80), quality = 75

நவபாஷாண பைரவர்

Posted by Saravanan Thirumoolar on in சிவன் 0 Comment

சிவகங்கை மாவட்டம் கண்டரமாணிக்கம் என்ற ஊரில் இருந்து 2 கிமீ தொலைவில் அமைந்துள்ளது சுகந்தவனேஸ்வரர் கோவில். இறைவியின் திருநாமம் சமீபவல்லி. இக்கோயிலில் தனி விமானத்துடன் கூடிய சன்னதியில் காசிபைரவர் இருக்கிறார். பைரவர் தன்னுடைய எட்டு கரங்களிலும் ஆயுதங்கள் மற்றும் கபால மாலை ஏந்தி காட்சி தருகிறார். இந்த பைரவர் நவபாஷாணத்தால் ஆனவர். இச்சிலையை போகர் பழனிமலை தண்டாயுதபாணிக்கு முன் பிரதிஷ்டை செய்தார். இந்த பைரவர் சிலையை போகர் தான் செய்தார் என்பதற்கு வலு சேர்க்கும் வகையில் பைரவருக்கு பின்புறம் தீபாராதனை காட்டும் சமயத்தில் முன்புறத்தில் பழனி ஆண்டவரின் உருவத்தில் காட்சியளிக்கார் பைரவர். இந்த பைரவருக்கு இரண்டு முகங்கள் உண்டு. பக்தர்கள் பைரவரின் பின்புற முகத்தை மனிதர்களால் காண முடியாது. அந்த முகத்தை கோயிலின் தல மரமாக இருக்கும் வன்னி மரத்தின் அடியில் வீற்றிருக்கும் சனீஸ்வரருக்கு மட்டும் காட்சி தருகிறார் என்று கோயிலின் தல வரலாறு சொல்கிறது.

பைரவர் அருகில் மூன்று பேர் வணங்கியபடி இருக்கின்றனர். உடன் நாய் வாகனத்தை பிடித்தபடி பாலதேவர் இருக்கிறார். இவரது சன்னதி முன்மண்டபத்தில் மற்றொரு பைரவரும் காட்சி தருகிறார். காசி பைரவரின் சிலை அதிக சக்தியுடைய நவபாஷாணத்தால் ஆனவர் என்பதற்கு சான்றாக பைரவருக்கு அபிஷேகம் செய்யும் நீரும் வடை மாலையும் சில மணி நேரங்களில் விஷம் போல் நீல நிறமாக மாறி விடுகிறது. ஆகையால் தீர்த்தமோ வடை மாலையோ இங்கு பிரசாதமாக தருவது கிடையாது. இதன் மருத்துவ சக்தியை தாங்கும் வலிமை மனிதர்களுக்கு இருக்காது என்பதன் அடிப்படையில் இவருக்கு அணிவிக்கப்படும் மலர் மாலைகள் படைக்கப்படும் வடை மாலை உள்ளிட்ட நைவேத்தியங்கள் சன்னிதியின் கூரை மீது போடப்படும். வடைகளை பறவைகள் கூட சாப்பிடுவதில்லை. பைரவருக்கு அபிஷேகம் செய்யப்படும் தீர்த்தம் கூட பக்தர்கள் தொட முடியாதபடி கோவிலுக்கு வெளியே விழுமாறு அமைக்கப்பட்டுள்ளது.

திருமூலநாதர் திருக்கோயில் திருச்சி

Posted by Saravanan Thirumoolar on in ஆலயம், சிவன் 0 Comment

மூலவர் திருமூலநாதர் சுயம்பு வடிவாக அருள்பாலிக்கிறார். சப்த ரிஷிகள் இங்கு பிரார்த்தனை செய்து ஞானம் பெற்றதினால் இறைவன் ஞானபுரீஸ்வரர் என்றும் அழைக்கப்படுகிறார். அம்மாள் குங்கும சுந்தரி. அம்மனின் வாகனமாக நந்தி விளங்குகிறார். கோயில் கிழக்கு நோக்கி அமைந்துள்ளது. திருச்சி மாவட்டம் லால்குடி அருகே பூவாளூர் பங்குனி ஆற்றங்கரையில் இக்கோயில் உள்ளது. முகப்பைத் தாண்டியதும் அகன்ற பிரகாரமும் மகாமண்டபமும் உள்ளன. மகாமண்டபத்தினுள் உள்ளே அம்பாள் குங்கும சுந்தரியும் கிழக்கு நோக்கி அருள்பாலிக்கின்றனர். இக்கோயில் கிபி 7 ம் நூற்றாண்டுக்கு முற்பட்ட கோயில் இது. திருஞானசம்பந்தர் இங்கு சில நாள் தங்கியிருந்து திருமூலநாதரை வணங்கி சென்றுள்ளார். தீர்த்தம் பங்குனி தீர்த்தம். தல மரம் வில்வம். இம்மரம் பித்ரு சாப விமோசன தலமரமாக விளங்கி வருகிறது. தனது கணவர் உயிர் பெற்று மீண்டும் எழுவதற்கு ரதிதேவி தவம் செய்த திருக்கோயிலான பூவாளூர் திருமூலநாதர் திருக்கோயிலுக்கு மன்மதபுரம் என்றொரு பெயரும் உண்டு. பண்டைய காலத்தில் பூக்கள் நிறைந்த காட்டுப் பகுதியாக இத்திருக்கோயில் இருந்ததால் பூவாளியூர்  என்றழைக்கப்பட்டது. பின்னர் அது மருவி பூவாளூர் என்று மாறியது.

இக்கோயிலில் இறைவன் கல்யாண திருக்கோலத்தில் இருப்பதால் இறைவியின் சன்னதியும் இறைவன் சன்னதிக்கு இடதுபுறத்திலேயே அமைந்துள்ளது. இறைவன் இறைவியின் சன்னதிகள் இணைந்து அமைந்துள்ளதால் பிரகாரம் வலம் வரும்போது இரண்டு சன்னதிகளையும் சேர்த்தேதான் சுற்றியாக வேண்டும். தனியே சுற்ற இயலாது. மண்டபத்தினுள் 63 நாயன்மார்கள் வடக்கு நோக்கி அருள்பாலிக்கின்றனர். தட்சிணாமூர்த்தி தனி சன்னதியில் உள்ளார். மஹாலிங்கம் கிழக்கு நோக்கி அருள்பாலிக்கிறார். வெள்ளை வாரண விநாயகருக்கு தனி சன்னதி உள்ளது. பாலதண்டாயுதபாணி கெஜலட்சுமி ஜேஷ்டாதேவி ஆகியோர் கிழக்கு நோக்கி அருள் பாலிக்கின்றனர். சண்டிகேஸ்வரர் துர்க்கை அம்மன் சண்டிகேஸ்வரி தனி சன்னதிகள் உள்ளது. நடராஜர் தெற்கு நோக்கி அருள்பாலிக்கிறார். நவகிரகம் பைரவர் சனீஸ்வரர் ஆகியோருக்கும் சன்னதிகள் உள்ளன. மேலும் 12 திருமுறைகள் புத்தகங்களை கொண்டு திருமுறை கோயில் இங்கு உள்ளது.

கோயில் 130 அடி அகலமும் 170 அடி நீளமும் கிழக்கு நோக்கியவாறு நான்கு பிரகாரங்களைக் கொண்டுள்ளது. கிழக்கு நோக்கிய கோவிலில் மூன்று நிலை கோபுரம் உள்ளது. கோவில் வளாகம் பெரியது. கோயில் கட்டிடக்கலை பாணியில் இருந்து கோயில் சோழர் காலத்தைச் சேர்ந்தது என்று நாம் கருதலாம். கோஷ்ட மூர்த்திகளாக நர்தன கணபதி தட்சிணா மூர்த்தி லிங்கோத்பவர் பிரம்மா துர்க்கை ஆகியோர் காணப்படுகின்றனர். தட்சிணா மூர்த்தி மற்றும் விநாயகர் சிலைகள் சமீப காலத்தில் செதுக்கப்பட்டதாகத் தோன்றினாலும் பழமையானதாகத் தெரிகிறது. அம்மன் சன்னதியின் மகா மண்டபத்தில் தனி சன்னதியில் 12 கரங்களுடன் மயிலின் மீது அமர்ந்த சண்முகரின் சிறிய சிலை உள்ளது. இக்கோயிலின் முருகப்பெருமானை அருணகிரிநாதர் பாடியிருக்கிறார். கிராமத்தின் கிராம தெய்வமான வாக்குவாலம்மன் என்ற சிறிய கோயில் பிரதான கோயிலின் நுழைவாயிலில் அமைந்துள்ளது. இரண்டு முக்கிய சன்னதிகளைச் சுற்றியுள்ள பெரிய பிரகாரத்தில் சுவாரஸ்யமான சிற்பங்களுடன் கூடிய பல தூண்கள் உள்ளன.

கோயிலுக்கு முன்பு பங்குனி ஆற்றங்கரையில் கயா பல்குனி ருத்ர சித்தர் சன்னதி உள்ளது. இங்கு ஒவ்வொரு அமாவாசை தினத்தன்று பிதுர் ஹோமம் நடைபெறுகிறது. பிதுர்க்களே இத்தலத்திற்கு நேரில் வந்து யாக ஆகுதிகளை ஏற்று ஆசிர்வதிப்பதினால் இத்தலம் தென்னிந்திய கயா என்று அழைக்கப்படுகிறது. யாகம் செய்ய வசதி இல்லாதவர்கள் தலத்திற்கு வந்து கோயிலை தூய்மை படுத்தும் உழவார திருப்பணிகளில் பலருடன் சேர்ந்து செய்தால் பிதுர் ஹோமம் நடத்திய பலன் கிடைக்கும். தீயச்செயல்கள் செய்து அதற்கு பிராயசித்தம் தேடுபவர்கள் பங்குனி மாதம் ஆற்றங்கரையை தூய்மை படுத்தும் பணியில் ஈடுபட உடல்சுத்தி உள்ளம்சுத்தி புத்திசுத்தி மனசுத்தி அறிவுசுத்தி ஆகிய ஐந்து சுத்திகளும் கிடைக்கும். ஒரு ரிஷி தன் முன்னோர்களுக்கு சடங்குகள் செய்ய விரும்பினார். அப்போது அங்கு நதி இல்லாததால் கயாவில் நடத்த நினைத்தார். இந்த இடத்தை விட்டுச் செல்வதற்கு முன் அவர் இந்த கோயிலில் சிவனைப் பிரார்த்தனை செய்தார். இறைவன் தனது சிலம்பை எடுத்து வீசினார். உடனே அந்த இடத்தில் கங்கை ஓடத் தொடங்கியது. உடனே ரிஷி அந்த இடத்திலேயே தான் செய்ய வேண்டிய முன்னோர்க்கு உண்டான சடங்கை செய்தார். அன்று முதல் இக்கோயில தென்னகத்தின் கயாவாக விளங்குகிறது.

தேவர்களுக்கு அசுரர்கள் தொல்லை கொடுத்துக் கொண்டே இருந்தனர். தேவர்களால் பொறுத்துக் கொள்ள முடியாமல் நேரடியாக சிவபெருமானிடம் சென்று தங்களைக் காப்பாற்றுமாறு முறையிட்டனர். முருகன் வருவார் காப்பாற்றுவார் எனக் கூறிவிட்டு மீண்டும் தவத்தில் அமர்ந்து விட்டார் சிவபெருமான். ஆண்டுகள் பல கடந்தும் அசுரர்களின் தொல்லை தீரவில்லை. முருகனும் வரவில்லை. சிவபெருமானின் தவமும் கலையவில்லை. தேவர்கள் மன்மதனிடம் சென்று காமக்கணையை வீசி சிவனது தவத்தைக் கலையச் செய்யும்படி கூறினர். மன்மதன் இதற்கு மறுத்து விட்டான். மறுத்தால் நாங்கள் சாபம் விடுவோம் என தேவர்கள் பயமுறுத்தவே பயந்த மன்மதன் சிவபெருமான் மேல் மன்மத பாணத்தை ஏவினான். சிவபெருமான் மன்மதனை நோக்கித் திரும்ப அவரின் நெற்றிக்கண் பார்வைபட்டு மன்மதன் எரிந்து போனான். இந்த நிகழ்வு நடைபெற்ற திருக்கோயில் நாகப்பட்டினம் மாவட்டத்தில் அமைந்துள்ளது. தனது கணவரை இழந்த ரதிதேவி கண்ணீர் விட்டுக் கதறி அழுதாள். தனது கணவனை காப்பாற்ற உடனடியாக சிவபெருமானை நோக்கி கடும் தவம் இருக்கத் தொடங்கினாள். மன்மதன் இல்லாததால் பிரம்மாவும் தனது படைப்புத் தொழிலைச் செய்ய முடியாமல் தவித்து வந்தார். தனது மானசீக புதல்வரை இழந்த மகாவிஷ்ணுவும் பிரம்மாவும் சிவபெருமானிடம் சென்று முறையிட்டனர். இதனால் மனம் இளகிய சிவபெருமான் தவம் செய்து கொண்டிருந்த ரதியின் முன்பு  தோன்றினார். உன் கணவன் உன் கண்களுக்கு மட்டுமே தெரிவான். மற்றவர்களின் கண்களுக்கு அரூபமாகத் தெரிவான் என்று ரதியிடம் கூறிய சிவபெருமான்  மன்மதனை உயிர் பெற்று எழச் செய்தார். இந்த இடம் பூவாளூர் திருமூலநாதர் திருக்கோயிலில்.

சிவத்தலங்களில் பொதுவாக துர்க்கையம்மன் கோயிலின் இறைவன் தேவகோட்டத்தில் அமைந்திருப்பார். ஆனால் பூவாளூர் திருமூலநாதர் திருக்கோயிலில் விஷ்ணு துர்க்கை அம்மன் தனி சன்னதி கொண்டு எழுந்தருளியிருக்கிறார்.  நவராத்திரிப் பெருவிழாவின் போது இந்த அம்மனுக்கு சிறப்பு வழிபாடுகள் நடத்தப்படுகின்றன. சிறப்பு வாய்ந்த துர்க்கை அம்மனுக்கு 8 கரங்கள் உள்ளன என்பது இத்திருக்கோயிலின் தனிச் சிறப்பாகும். ஏழு முனிவர்களின் புதல்வர்களாகிய எழுபது முனிவர்கள் சைவ சாத்திர நுட்பங்கள் தமக்கு அருளுமாறு பெருமானை வேண்டி யாகம் செய்தார்கள். வேள்வியில் மகிழ்ந்த சிவபெருமான் எழுபது முனிவர்கள் உள்ளிட்ட பிரம்மன் முதலியோருக்கு சைவ சாஸ்திர நூல்களின் நுட்பங்களை அருளியது இத்திருக்கோயிலில்தான் என்கிறது தல புராணம்.

அகத்தீஸ்வரர் கோயில்

Posted by Saravanan Thirumoolar on in ஆலயம், சிவன் 0 Comment

அகத்தியர் தென்நாட்டில் பல இடங்களிலும் இறைவனை பிரதிஷ்டை செய்து வழிபட்டிருக்கிறார். அப்படி பிரதிஷ்டை செய்த கோயில்களில் சாரம் அகத்திஸ்வரர் கோயிலும் ஒன்று. அகத்தியா் தமது திருக்கரங்களினால் பிரதிஷ்டை செய்த இந்த லிங்கத் திருமேனி ஶ்ரீஅகத்தீஸ்வரா் என்ற பெயரில் அழைக்கப்படுகிறார். அகத்தீஸ்வரா் திருத்தலத்தில் அருள்பாலிக்கும் அம்பிகையின்திருநாமம் ஶ்ரீஅகிலாண்டேஸ்வரி ஆகும். இந்த அன்னையின் திருவுருவச்சிலை தற்போது திருக்கோயிலில் இல்லை. காலவெள்ளத்தில் இச் சிலை சிதிலமடைந்திருக்கலாம் என்று கருதப்படுகின்றது. அக்காலத்தில் இந்த இடம் திந்திரிவனம் என்று அழைக்கப்பட்டது. இங்கு ஈசன் தன் தேவியோடு அகத்திய மகரிஷி முன் தோன்றி தன் திருமணக் கோலத்தை இத்தலத்தில் காட்டியருளினாா். ஈசன் மீது அகத்தியா் கொண்டிருந்த பக்தியின் சாரத்திற்கு சான்றாக இந்த திருத்தலம் சாரம் என்று அழைக்கப்பட்டது.

இக்கோயிலில் பிரம்ம சாஸ்தா முருகர் அருள்பாலிக்கிறார். பிரணவத்திற்குப் பொருள் சொல்ல இயலாத பிரம்மனைச் சிறையிலிட்டு அவரது சிருஷ்டித் தொழிலைச் செய்யத் தொடங்கிய போது பிரம்மனுக்கு உரிய ஜபமாலையும் கமண்டலத்தையும் கொண்டாா் முருகப்பெருமான். கந்தனுக்குரிய இந்தத் திருவடிவம் பிரம்மசாஸ்தா என்று அழைக்கப்படுகின்றது. பிரம்ம சாஸ்தா என்று முருகப்பெருமானின் இந்த வடிவினை கந்தபுராணப் பாடல் குறிப்பிடுகின்றது. தமிழ் கடவுள் முருகப்பெருமானை சுப்ரமண்யன் என்று வணங்குகிறோம். பிரம்மண்யன் என்றால் பிரம்மத்தை உணா்ந்த பரமஞானம் பெற்றவன் என்பது பொருளாகும். சு என்பது இதனை அதி உன்னதமான என்ற பொருளை மேலும் சிறப்பிக்கும் அடைமொழியாகும். பிரம்மத்தின் அதி உயா்வான நிலையை அடைந்தவன் சுப்ரமண்யன். அவனுக்கு மேலான ஞானம் தேஜஸ் வேறு இல்லை என்பது பொருள். எனவே தான் முருகப் பெருமானை ஞானக் கடவுள் என்று வணங்குகின்றோம்.

குளிகன் மற்றும் மாந்தியுடன் ஜேஷ்டாதேவியின் திருவுருவச் சிலை உள்ளது. இச்சிலை இத்தலத்தில் தற்போது ராஜமாதங்கி என்றும் சியாமள வராஹி என்றும் அழைக்கப்படுகின்றது.

பல்லவ மன்னா்கள் முருகனைப் பரமபாகவதன் பரம மகேஸ்வரன் பரம வைஷ்ணவன் பரம பிரம்மண்யன் என்று அழைத்ததாக செப்பேடுகள் தொிவிக்கின்றன. சோழ மன்னா்கள் காலத்தில் நிா்மாணிக்கப்பட்ட இத்திருக்கோயிலில் காணப்படும் அரிய இந்த பிரம்ம சாஸ்தாவின் சிலை பல்லவா்கள் காலத்தைச் சாா்ந்தது என்று வரலாற்று ஆய்வாளா்கள் தொிவிக்கின்றனா். தொண்டை நாட்டில் ஆனூா் கந்தசாமி கோயிலிலும் காஞ்சிபுரம் குமரக் கோட்டத்திலும் புதுச்சோி மாநிலம் மதகடிப்பட்டு குண்டாங்குழி மகாதேவா் கோயிலிலும் பிரம்ம சாஸ்தா வடிவிலான முருகப்பெருமானின் சிலைகள் உள்ளன.

சாரம் ஶ்ரீஅகத்தீஸ்வரா் திருக்கோயிலில் சோழா் கால கல்வெட்டுகள் இரண்டு காணப்படுகின்றன. ஒரு கல்வெட்டில் பண்டைய அளவு கோலினைக் கல்வெட்டில் வடித்துள்ளனா். மற்றொரு கல்வெட்டு மூன்றாம் குலோத்துங்க சோழனின் முப்பத்து மூன்றாவது ஆட்சியாண்டைக் குறிப்பதாகும். இக்கல்வெட்டில் இத்தலத்தின் பெயா் ஜெயங்கோவளநாட்டு சாரமான ஜெயங்கொண்ட சோழ நல்லூா் என்றும் ஈசனின் பெயர் திருஅகத்தீஸ்வரமுடைய நாயனாா் என்றும் குறிப்பிடப்பட்டுள்ளது. மூன்றாம் குலோத்துங்க மன்னன் திருஅகத்தீஸ்வரமுடைய நாயனாா் கோயிலுக்கு நந்தா விளக்கேற்றுவதற்காக முப்பது பசுக்களை தானமாக வழங்கியதையும் சந்தி விளக்கெரிக்க பதினாயிரத்து எண்ணூறு காசும் கொடுத்து சூரிய சந்திரா் உள்ளவரை விளக்கெரிக்க ஒப்புக் கொண்டதையும் ஒரு கல்வெட்டு தொிவிக்கின்றது.

சென்னை திருச்சி தேசிய நெடுஞ் சாலையில் திண்டிவனத்திற்கு அருகில் 8 கிமீ தூரத்தில் இக்கோயில் உள்ளது. சிதிலமடைந்த நிலையில் உள்ள இக்கோயில் தற்போது சிறிது சிறிதாக புணரமைக்கப்பட்டுக் கொண்டிருக்கிறது.