பகவத் கீதை

பகவத் கீதை – 1. அர்ஜூன விஷாத யோகம் #27

கூடியிருந்த அனைத்து உறவினர்களையும் நன்கு பார்த்த குந்தியின் மகனான அர்ஜூனன் மிகுந்த இரக்கம் கொண்டவனாக துயரத்துடன் பேச ஆரம்பித்தான்.

இந்த சுலோகத்தில் ஒரு கேள்வி: யுத்தம் ஆரம்பிக்கும் நேரத்தில் அர்ஜூனனுக்கு இரக்கம் வர காரணம் என்ன?

யுத்தம் ஆரம்பித்தால் நான்கு பக்கமும் சூழ்ந்திருக்கின்ற உறவினர்கள் பலர் இந்த யுத்தத்தின் மூலமாக கொல்லப்படுவார்கள். உறவினர்கள் நண்பர்கள் மீது அர்ஜூனன் வைத்திருந்த பலவீனமான பற்று மற்றும் பாசம் காரணமாக அவனுக்கு அவர்கள் மீது இரக்கம் உண்டானது.

பகவத் கீதை – 1. அர்ஜூன விஷாத யோகம் #28

கிருஷ்ணா போர் புரிவதற்காக எனது உறவினர்கள் எனது முன்பாக ஒன்று கூடி நிற்பதைப் பார்க்கிறேன்.

பகவத் கீதை – 1. அர்ஜூன விஷாத யோகம் #26

கூடியிருந்த இரண்டு படைகளிலும் நிற்கின்ற குருநாதர்கள் முப்பாட்டர் பாட்டனார்கள் பெரியப்பாக்கள் சித்தப்பாக்கள் தாய்மாமன்கள் மாமனார்கள் சகோதரர்கள் புதல்வர்கள் பேரன்கள் மற்றும் நண்பர்களும் அன்பர்களும் நிற்பதை அர்ஜூனன் கண்டான்.

இந்த சுலோகத்தில் ஒரு கேள்வி: இந்த சுலோகத்தில் இரண்டு படைகளிலும் உறவு முறையில் சொல்லப்பட்டவர்கள் யார் யார்?

குருநாதர்கள் – கிருபாச்சாரியாரும் துரோணாச்சாரியாரும்

முப்பாட்டர் – பாஹ்லீகர்

பாட்டனார்கள் – பீஷ்மரும் பாஹ்லீகரின் மகன் சோமதத்தரும்

பெரிப்பா மற்றும் சித்தப்பா – தந்தையைப் போல் மதிக்கத்தக்க சோமதத்தரின் மகன் பூரிச்ரவஸ் போன்ற தந்தையின் சகோதரர்கள்

தாய்மாமன்கள் – சல்லியனும் புருஜித்தும் குந்திபோஜனும்

சகோதரர்கள் – தன்னுடைய சகோதரர்கள் 4 பேரும் கௌரவர்கள் நூறு பேரும்

புதல்வர்கள் – அர்ஜூனனுக்கும் சுபத்திரைக்கும் பிறந்த அபிமன்யுவும் இடும்பிக்கும் பீமனுக்கும் பிறந்த கடோத்கஜனும் உப பாண்டவர்களான யுதிஷ்டிரனுக்கு பிறந்த பிரதிவிந்த்யனும் பீமனுக்கு பிறந்த சுதசோமனும் அர்ஜூனனுக்கு பிறந்த சுருதகீர்த்தியும் நகுலனுக்கு பிறந்த சதாநீகனும் சகாதேவனுக்கு பிறந்த சுருதகர்மாவும்

பேரன் – தங்களுடைய புதல்வர்களின் மகன்கள் வயதை ஒத்தவர்கள்.

நண்பர்கள் – சிறு வயதில் குருகுலத்தில் உடன் விளையாடிய நண்பர்கள்

மாமனார்கள் – துருபதன் சைப்யன்

அன்பர்கள் – பிரதி உபகாரத்தை எதிர்பார்க்காமல் உதவி செய்ய வந்திருக்கும் மன்னர்கள் பலர்.

பகவத் கீதை – 1. அர்ஜூன விஷாத யோகம் #25

பீஷ்மர் மற்றும் துரோணர் இருவரின் ரதங்களுக்கு முன்பாக தேரை கொண்டு சென்று நிறுத்திய கிருஷ்ணர் அர்ஜூனனிடம் பார்த்தனே யுத்தத்திற்காக ஒன்றாக கூடியிருக்கும் கௌரவர்களைப் பார் என்றார்.

இந்த சுலோகத்தில் முதல் கேள்வி: அர்ஜூனனை பார்த்தனே என்ற பெயரில் கிருஷ்ணர் ஏன் அழைக்கிறார்?

அர்ஜூனனின் தாய் குந்தியின் இயற்பெயர் பிருதை (சிறந்த அழகி என பொருள்) இவளது பெயரை வைத்து பிருதையின் மகனே என்ற பொருளுக்கு பார்த்தனே என்று கிருஷ்ணர் அர்ஜூனனை அழைத்தார். (இந்தப் பெயர்கள் அனைத்தும் சமஸ்கிருதப் பெயர்கள் ஆகையால் சமஸ்கிருதத்தில் மட்டுமே பொருள் புரிந்து கொள்ள முடியும்.)

இந்த சுலோகத்தில் 2 வது கேள்வி: யுத்தத்திற்காக ஒன்றாக கூடியிருக்கும் கௌரவர்களைப் பார் என்று கிருஷ்ணர் அர்ஜூனனிடம் ஏன் கூறினார்?

கௌரவர்களை நன்றாகப் பார் என்ற சொல்லை சொல்லி அவர்கள் அனைவரும் உன்னுடைய உறவினர்கள் நண்பர்கள் என்று அர்ஜூனனுடைய உள்ளத்தில் மறைந்திருக்கும் பலவீனமான பந்த பாசத்தை தட்டி எழுப்பி விடுகிறார் கிருஷ்ணர். இந்த வார்த்தை அர்ஜூனனின் உள்ளத்தில் வேரூன்றி நின்று அவனை யுத்தம் செய்ய மறுக்கும் படி செய்கிறது. இதன் விளைவாக வேதத்தின் சுருக்கமான பகவத் கீதையை கிருஷ்ணர் அர்ஜூனனுக்கு உபதேசித்து அதனை இந்த உலகத்திற்கு சொல்வதற்காக கௌரவர்களைப் பார் என்றார் கிருஷ்ணர்.

பகவத் கீதை – 1. அர்ஜூன விஷாத யோகம் #24

சஞ்ஜயன் திருதராஷ்டிரரிடம் சொல்கிறார். பாரத நாட்டின் அரசே குடாகேசன் (அர்ஜூனன்) கூறியதை கேட்ட கிருஷ்ணர் உயர்ந்த தேரை இரண்டு படைகளுக்கும் நடுவில் கொண்டு சென்றார்.

இந்த சுலோகத்தில் ஒரு கேள்வி: அர்ஜூனனை சஞ்ஜயன் ஏன் குடாகேசன் என்ற பெயரில் கூறினார்?

குடகா என்றால் தூக்கம் குடாகேசன் என்றால் தூக்கத்தின் மீது தனது அதிகாரத்தை நிலைநாட்டுபவன் என்று பொருள். அர்ஜூனன் தூக்கத்தை வென்றவன். அவன் எப்போதும் உடல் அசதிக்கு ஆட்படுவதில்லை எப்போதும் கவனத்துடனும் விழிப்புடனும் இருப்பவன். இந்த பெயரை சொல்லி அழைப்பதன் மூலமாக அர்ஜூனனை கௌரவர்கள் வெற்றி கொள்வது கடினம் என்று திருதராஷ்டிரருக்கு மறைமுகமாக சொல்கிறார் சஞ்ஜயன்.

இந்த சுலோகத்தில் அர்ஜூனன் கிருஷ்ணர் இருக்கும் தேர் உயர்ந்த தேர் என்று சொல்லப்படுவதற்கான காரணம் சுலோகம் 14 இல் உள்ளது.

பகவத் கீதை – 1. அர்ஜூன விஷாத யோகம் #23

மிகவும் தீய புத்தியுடைய துரியோதனனின் நலனை விரும்பி எந்தெந்த அரசர்கள் இந்தப் படையில் போர் புரிய வந்திருக்கிறார்கள் என்று நான் பார்க்கிறேன்.

இந்த சுலோகத்தில் முதல் கேள்வி: அர்ஜூனன் துரியோதனனை ஏன் தீய புத்தியுடையவன் என்று கூறினான்?

ஆதிபர்வத்தில் அரக்கு மாளிகை கட்டி பாண்டவர்கள் அனைவரையும் குடும்பத்தோடு எரிக்க முயன்றது மற்றும் சூதாட்டத்திற்கு பின்பு திரெளபதியை சபையில் இருக்கும் அனைவருக்கும் முன்பாக துகிலுரிக்கச் செய்தது அதன் பிறகு செய்து கொண்ட உடன்படிக்கையின்படி பன்னிரண்டு ஆண்டுகள் வனவாசமும் ஒரு வருட காலம் அஞ்ஞாத வாசமும் இருந்த பிறகும் பாண்டவர்களுக்கு கொடுக்க வேண்டிய பங்கை கொடுக்க மறுத்தது மற்றும் தங்களுக்கு உதவி செய்ய வந்த மாமா சல்லியனையும் வஞ்சகமாக அவனது பக்கம் சேர்த்துக் கொண்டது இவை அனைத்தையும் செய்த துரியோதனனை அர்ஜூனன் தீய புத்தி உடையவன் என்று கூறினான்.

இந்த சுலோகத்தில் 2 வது கேள்வி: துரியோதனனின் நலனை விரும்பி அவனுடன் யுத்தம் செய்ய வந்த அரசர்களை பார்க்கிறேன் என்று அர்ஜூனன் ஏன் கூறினான்?

தீய புத்தியுடைய துரியோதனனின் செயல்களை உலகத்திலுள்ள அனைவரும் அறிவார்கள். அவன் செய்யும் தீய செயல்களை அறிந்தும் அதை தடுக்கவோ அல்லது புத்தி சொல்லவோ இயலாமல் அவனுக்கு உதவி செய்ய பல அரசர்கள் வந்திருக்கிறார்கள். தீய செயல்களை செய்பவனுக்கு புத்தி சொல்லி திருத்துவதை விட்டு விட்டு இவர்களும் அவன் செய்யும் தவறுக்கு துணை போகிறார்கள். வந்திருப்பவர்கள் யார் யார் என்று தெரிந்து கொண்டு அதர்மத்திற்கு துணை போகின்றவர்களுக்கு அதன் விளைவை யுத்த களத்தில் புரிய வைக்க வேண்டும் என்ற எண்ணத்தில் அந்த அரசர்களை பார்க்க அர்ஜூனன் விரும்பினான்.

பகவத் கீதை – 1. அர்ஜூன விஷாத யோகம் #21

அச்சுதா எனது தேரை இரண்டு படைகளுக்கும் நடுவில் சென்று நிறுத்துங்கள்.

இந்த சுலோகத்தில் ஒரு கேள்வி: அர்ஜூனன் கிருஷ்ணரைப் பார்த்து ஏன் அச்சுதா என்று கூப்பிட்டார்?

எவர் தன் சுயரூபத்திலிருந்து தன் சக்தியாலும் பெருமையினாலும் வழுவாமல் நிலையாக இருக்கிறாரோ மேலும் எந்த இடத்திலும் எந்த நிகழ்விலும் எந்த நேரத்திலும் எவருக்கு தோல்வி என்பது இல்லையோ அவரே அச்சுதன் என்று அழைக்கப்படுகிறார். அச்சுதா என்ற பெயரை சொல்லி அழைக்கும் அர்ஜூனன் கிருஷ்ணருடைய தன்மையையும் பெருமையையும் அறிந்திருக்கிறேன் என்பதை இந்த வார்த்தையால் உணர்த்துகிறார்.

பகவத் கீதை – 1. அர்ஜூன விஷாத யோகம் #22

இந்த போர் தொடக்கத்தில் போர் புரிய விருப்பம் கொண்டு அணிவகுத்து நிற்கும் எதிரிப்படை வீரர்களை எவ்வளவு நேரம் நான் பார்க்கிறேனோ அவ்வளவு நேரம் ரதத்தை இரு படைகளுக்கும் நடுவே நிறுத்தி வையுங்கள். இந்தப் போரில் என்னுடன் யுத்தம் புரியப்போவது யார் என்று நான் பார்க்க வேண்டும்.

இந்த சுலோகத்தில் ஒரு கேள்வி: அர்ஜூனன் பாண்டவர்களுக்கு எதிராக யுத்தம் புரிய வந்திருப்பவர்களை பார்க்க ஏன் எண்ணினான்?

பாண்டவர்களுக்கு எதிராக யுத்தம் புரிய வந்திருப்பவர்கள் அனைவரும் தன்னுடைய உறவினர்களும் நண்பர்களும் என்பதை அர்ஜூனன் நன்கு அறிவான். யுத்தத்தில் தனக்கு துணையாக கிருஷ்ணரும் தன் கொடியில் அனுமனும் இருப்பதினால் பாண்டவ அணியினர் நிச்சயமாக வெற்றி பெறுவார்கள் என்று அர்ஜூனன் நம்பினான். பாண்டவர்களின் வெற்றியில் யுத்தம் முடியும் போது எதிரிப் படை வீரர்கள் பல பேர் உயிருடன் இருக்க மாட்டார்கள். ஆகவே தன்னுடைய உறவினர்களையும் நண்பர்ளையும் இறுதியாக ஒரு முறை பார்த்துக் கொள்ளலாம் என்ற எண்ணத்தில் அவர்களை பார்க்க அர்ஜூனன் எண்ணினான்.

பகவத் கீதை – 1. அர்ஜூன விஷாத யோகம் #20

அனுமன் கொடியை கொண்ட தேரில் நின்றிருந்த அர்ஜூனன் திருதராஷ்டிரரின் சேனைகள் அணிவகுத்து நிற்பதையும் அவர்கள் ஆயுதங்கள் கொண்டு தாக்க தயாராக இருப்பதையும் கண்டான். உடனே தனது காண்டீபம் என்ற வில்லை கையில் எடுத்து கிருஷ்ணரிடம் பேசத் துவங்கினான்.

இந்த சுலோகத்தில் முதல் கேள்வி: அனுமன் கொடியில் இருக்கிறார் என்று சஞ்சயன் திருதராஷ்டிரரிடம் குறிப்பிட்டு ஏன் சொல்கிறார்?

பாண்டவர்கள் வன வாசத்தில் இருந்த போது பீமனுக்கு அனுமன் வரம் ஒன்று கொடுத்தார். அதன்படி அனுமன் யுத்தத்தில் பாண்டவர்களுக்கு துணையாக அர்ஜூனனின் கொடியில் அமர்ந்திருப்பேன் என்றும் பீமன் யுத்தம் செய்யும் போது கர்ஜனை செய்யும் போதெல்லாம் தன்னுடைய கர்ஜனை சத்தமும் சேர்ந்து கொள்ளும் இதனால் பாண்டவர்களின் சேனையில் பலம் அதிகரித்து கௌரவர்கள் சேனையில் குழப்பமும் உண்டாகும். நீ ஜெயம் கொள்வாய் என அனுமான் ஆசி அளித்தார். பாண்டவர்களின் பக்கம் அனுமன் இருப்பதினால் அவர்களுக்கு வெற்றி உறுதி என்று சஞ்சயன் மறைமுகமாக திருதராஷ்டிரரிடம் குறிப்பிடுகிறார்.

இந்த சுலோகத்தில் 2 வது கேள்வி: அர்ஜூனன் வைத்திருக்கும் காண்டிபம் வில் யாருடையது அது அவனுக்கு எப்படி கிடைத்தது?

கண்வ ரிஷியின் கடும் தவத்தால் அவர் தவம் செய்த இடம் புற்று சூழ்ந்தது. அந்த புற்றிலிருந்து கந்தி எனும் ஒரு மூங்கில் மரம் வளர்ந்தது. அது தவத்தின் மகிமையால் வளந்த மரம் ஆகையால் அதித சக்தி பெற்றது. எனவே இதை வீணடிக்க விரும்பாத பிரம்மதேவர் அதனை கொண்டு தீயவர்களை அழிக்க காண்டீவ வில்லை உருவாக்கினார். அவர் அதனை 1000 ஆண்டுகள் வைத்திருந்தார். பின் சிவன் 1000 ஆண்டுகளும் பிரஜாபதி 503 ஆண்டுகளும் பின்பு தேவேந்திரன் 580 ஆண்டுகளும் சந்திரன் 500 ஆண்டுகளும் அவருக்கு பின் நீர் கடவுளான வருணன் 100 ஆண்டுகளும் வைத்திருந்தார். காந்தவ காட்டை அழிப்பதற்காக அக்னி தேவனின் வேண்டுகோளின் படி வருணன் இக்காண்டீபத்தை அர்ஜூனனுக்கு வழங்கினார். பிரகாசமாக இருக்கும் இந்த திவ்யமான வில் இடியின் முழக்கத்தை உண்டாக்கும். இந்த வில் ஒரே சமயத்தில் ஒரு லட்சம் வீரர்களையும் (தேவர்கள் அசுரர்கள் கந்தர்வர்கள் உள்ளிட்ட) போரிட்டு அழிக்கும் திறன் கொண்டது. அனைவராலும் வணங்கப்பட்ட இந்த வில் நூற்றி எட்டு நாண்களை கொண்டது. 108 நாண்களையும் ஒன்றினைத்தால் மட்டுமே அவ்வில்லை பயன்படுத்த இயலும். இதன் கடைசி நாணை எவராலும் அறுக்க இயலாது.

காண்டீப வில்லை பற்றி மேலும் தெரிந்து கொள்ள கீழ்கண்ட லிங்கை க்ளிக் செய்யுங்கள்

அர்ஜூனனின் காண்டீபம்

பகவத் கீதை – 1. அர்ஜூன விஷாத யோகம் #19

இந்த பெரு முழக்கத்திலிருந்து வந்த ஒலி ஆகாயத்தையும் பூமியையும் எதிரோலிக்கச் செய்து திருதராஷ்டிர கூட்டத்தின் இதயங்களை பிளக்கச் செய்தது.

இந்த சுலோகத்தில் ஒரு கேள்வி: பாண்டவ படைகளுக்கு உற்சாகத்தை கொடுத்து பயத்தை போக்கிய சங்கின் முழக்கம் ஏன் கௌரவ படைகளின் இதயத்தை பிளந்தது?

கௌரவர்களின் சங்கு முழக்கத்தின் சத்தத்தை விட பாண்டவர்களின் சங்கு முழக்கத்தின் சத்தம் மிகவும் அதிகமாக ஆகாயத்திலும் பூமியிலும் எதிரோலித்தது. இதனால் பாண்டவர்கள் தங்களை விட மிகவும் உற்சாகமாகவும் வலிமையாகவும் இருக்கிறார்கள் என்ற எண்ணம் கௌரவர்களுக்கு ஒரு விதமான பயத்தை உண்டு பண்ணி அவர்களின் இதயத்தை பிளந்தது.

பகவத் கீதை – 1. அர்ஜூன விஷாத யோகம் #17

வில்லாளிகளில் மிகச் சிறந்த காசிராஜனும் மகாரதனாகிய சிகண்டியும் திருஷ்டத்யும்னனும் விராடனும் தோல்வியை என்பதை அறியாத சாத்யகியும்

பகவத் கீதை – 1. அர்ஜூன விஷாத யோகம் #18

துருபதனும் திரௌபதியின் ஐந்து மகன்களும் பெரும் தோள்களுடைய சுபத்திரையின் மகன் அபிமன்யுவும் தனித்தனியே தங்களுக்குரிய சங்குகளை முழங்கினார்கள்.

பகவத்கீதையின் இந்த இரண்டு சுலோகத்தில் சொல்லப்பட்டவர்கள் யார் யார் என்று முதலில் வரும் சில சுலோகங்களில் விளக்கமாக சொல்லப்பட்டுள்ளது.

இரண்டு சுலோகத்திலும் எழும் பொதுவான கேள்வி: பாண்டவர்களில் முக்கியமானவர்கள் அத்தனை பேரும் ஏன் ஒரே நேரத்தில் சங்குகளை ஊதினார்கள்?

தாங்களும் தங்களின் படைகளும் யுத்தத்திற்கு தயாராக இருக்கிறோம் என்றும் தங்களின் படைகளை உற்சாகப்படுத்தவும் அவர்களிடம் உள்ள சங்குகளை தனித்தனியாக ஒரே நேரத்தில் முழங்கினார்கள்.

மேலும் இதில் கவனிக்க வேண்டியது சங்கின் சத்தமாகும். அர்ஜூனனும் பீமனும் முழங்கிய சங்குகளிலிருந்து வந்த சத்தம் எதிரிகளுக்கு பயத்தை உருவாக்கியது போல இவர்கள் முழங்கிய சங்குகளில் இருந்து வரும் சத்தம் பாண்டவ படைகளின் பயத்தை போக்குகிறது. மிகப்பெரிய ராட்சச ராட்டினத்தில் செல்பவர்களை கவனித்தால் புரியும் அதில் செல்பவர்கள் ஆ ஊ என்று சத்தம் போடுவார்கள். ஏன் என்றால் உரக்கமாக கத்தினால் வரும் சத்தத்திலிருந்து பயம் குறையும். யுத்தத்தில் ஒருவரை ஒருவர் கொல்லப் போகிறார்கள். மரண பயம் படைகளில் யாருக்கேனும் இருந்தால் சங்கு நாதத்தில் இருந்து வரும் ஒலியானது மனித மனதில் உள்ள பயத்தை பல விதங்களில் சரி செய்து யுத்தம் செய்ய ஒரு வெறியை கூட்டும். அதே ஒலி மிகவும் வெறித்தனத்துடன் இருப்பவர்களின் மனதை அமைதிப்படுத்தி யுத்த தர்மத்துடன் யுத்தம் செய்ய வைக்கும். இல்லை என்றால் யுத்த வெறியில் ஆயுதம் இல்லாதவர்களையும் யுத்த களத்தில் இருந்து பயந்து பின் வாங்குபவர்களையும் கொன்று தர்மத்திற்கு எதிராக செயல்படுவார்கள்.

சங்கின் முழக்கமனாது பலவகைப்படும். சங்கை முழங்குபவர்கள் என்ன தேவைக்காக எப்படி முழக்கம் செய்கிறார்கள் என்பதைப் பொறுத்து அதன் பலன் உண்டாகும். உதாரணமாக இசை ஒன்று தான் அதை என்ன ராகத்தில் இருக்கிறது என்பதை பொறுத்து ராகத்திற்கு ஏற்றார் போல் மகிழ்ச்சி துக்கம் பயம் என ஒருவருக்குள் இசையால் எந்த மனநிலையையும் வரவழைக்க முடியும். இசையால் உடல் நோய்களைக் கூட சரி செய்ய முடியும். இசையைப் போலவே மனித உணர்வுகளை பாதிப்பதில் சங்கின் நாதமும் முக்கியமானது. பயத்தைப் போக்கவும் அல்லது உண்டாக்கவும் குழப்பத்தைப் போக்கவும் அல்லது உண்டாக்கவும் தெளிவு படுத்தவும் அமைதிப் படுத்தவும் யுத்த களத்தில் சங்கு பயன்படுகிறது. ஆகவே யுத்த களத்தில் சங்கின் பங்கு மிகவும் முக்கியமானது.

பகவத் கீதை – 1. அர்ஜூன விஷாத யோகம் #16

குந்தியின் மகனான அரசர் யுதிஷ்டிரர் அநந்தவிஜயம் என்ற சங்கையும் நகுலனும் சகாதேவனும் முறையே சுகோஷம் மணிபுஷ்பகம் என்ற சங்கையும் முழங்கினார்கள்.

இந்த சுலோகத்தில் முதல் கேள்வி: யுதிஷ்டிரரின் தாய் குந்தி என்று ஏன் குறிப்பிட்டு சொல்லப்படுகிறார்?

யுதிஷ்டிரரும் அர்ஜூனனும் பீமனும் குந்திக்கு பிறந்தவர்கள். நகுலனும் சகாதேவனும் மாத்ரீக்கு பிறந்தவர்கள். இந்த சுலோகத்தில் நகுலன் மற்றும் சகாதேவன் பெயர்களும் வருகிறது. எனவே யுதிஷ்டிரரின் தாய் வேறு நகுலன் சகாதேவனின் தாய் வேறு என்பதை குறிப்பிடுவதற்காக குந்தியின் பெயர் சொல்லப்படுகிறது.

இந்த சுலோகத்தில் 2 வது கேள்வி: யுதிஷ்டிரர் மகாபாரத யுத்தம் ஆரம்பிக்கும் போது எந்த நாட்டிற்கும் அரசனாக இல்லை ஆனாலும் அரசர் யுதிஷ்டிரர் என்று ஏன் சஞ்சயன் திருதராஷ்டிரரிடம் கூறினார்?

யுதிஷ்டிரர் வனவாசம் செல்வதற்கு முன்பு இந்திரப்பிரஸ்தத்திற்கு அரசனாக இருந்து தன் சகோதரர்களுடன் ராஜசூய யாகம் நடத்தி தன்னை எதிர்த்த அனைத்து அரசர்களையும் வெற்றி பெற்று அரசர்களுக்கெல்லாம் அரசனாக இருந்து சக்கரவர்த்தி என்று பெயர் பெற்று பெரிய சாம்ராஜ்யத்தை ஆட்சி செய்து வந்தவர். மேலும் யுத்தத்தின் போது யுதிஷ்டிரருடைய உடம்பில் அரசனுக்குரிய அரசுச் சின்னங்கள் இருந்தது. இதன் காரணமாகவும் மேலும் இந்த யுத்தத்தில் யுதிஷ்டிரனே வெற்றி பெற்று அரசனாவான் என்று சஞ்சயன் அறிந்திருந்தான். இதனை திருதராஷ்டிரருக்கு மறைமுகமாக தெரிவிக்கும் வகையில் யுதிஷ்டிரனை அரசன் என்றுகூறினார்.