கேள்வி: ஒரு ஜபமாலையைக் கொண்டே எல்லா மந்திரங்களையும் ஜெபிக்கலாமா? அல்லது ஒவ்வொரு மந்திரத்திற்கும் ஒவ்வொரு ஜபமாலை வேண்டுமா?

ஒரே வகையான மாலையை வைத்து தாராளமாக உருவேற்றலாமப்பா குற்றம் ஏதுமில்லை. ஆனால் சாஸ்திர ரீதியாக ஒரு விளக்கத்தைக் கூறுகிறோம். நவகிரக மணிமாலை என்ற ஒன்று இருக்கிறது. இதை பலரும் அறிய வாய்ப்பில்லை. அதாவது அந்தந்த நவகிரகங்களுக்கு உரிய நவரத்தினங்களை மாலையாக வைத்துக் கொண்டு அந்தந்த கிரகத்தை ப்ரீதி செய்யும் வண்ணம் அந்த கிரகத்தின் மூலமந்திரம் காயத்ரி மந்திரம் அல்லது தமிழ்வழி பாக்கள் என்று எதையாவது உருவேற்றினால் அதனால் மனிதனுக்கு சிறிது கூடுதல் பலன் உண்டு.

கேள்வி: இறைநீதியை புரிந்து கொள்ள முக்தி அடைவதுதான் வழியா?

இறைவன் கருணையைக் கொண்டு இறைவனை பற்றியும் இறைவனின் நிலை குறித்தும் அல்லது இவன் கூறியது போல் இறை நீதி என்ற கொள்கை குறித்தும் புரிந்து கொள்ள வேண்டுமென்றால் முதலில் ஒரு மனிதன் இதுவரை சேர்த்த பாவங்களையெல்லாம் அனுபவித்து தீர்க்க வேண்டும் அல்லது கூடுமானவரை தான தர்மங்களாலும் வழிபாட்டாலும் வேறு ஸ்தல யாத்திரைகளாலும் தீர்க்க வேண்டும். பாவங்கள் கடுகளவு இருந்தாலும் கூட இவன் கூறுவது போல பரிபூரணமாக இறைவனை புரிந்து கொள்ள முடியாது. எனவே இறைவனை புரிந்து கொள்ளவோ அல்லது முக்தி போன்ற நிலையை அடைவது குறித்தோ ஆய்வு செய்வதற்கு முன்னால் முதலில் உலகியல் ரீதியான கடமைகளை நேர்மையாக ஆற்றிக் கொண்டே சேர்த்த பாவங்களையெல்லாம் நல்ல விதமாக கழித்து தர்மத்தால் குறைத்துக் கொண்டே வந்தால் தாராளமாக பாவங்கள் குறைய குறைய குறைய குறைய அனைத்தும் உள்ளத்தில் தெள்ளத் தெளிவாக புலப்படத் துவங்கும்.

கேள்வி: சர்ப்ப சாந்தி என்றால் என்ன? அதற்கு விளக்கம்:

இறைவனின் கருணையால் ஆங்காங்கே நாகதோஷ பூஜைகள் செய்யப்படுவதாகக் கூறப்படுகிறது. சர்ப்ப சாந்தி யாகம் என்றெல்லாம் கூட நாங்களும் கூறுகிறோம். இதுகுறித்து முன்னரே கூறியிருக்கிறோம். நாகங்களை அல்லது பாம்பு இனங்களைக் கொன்றால் தோஷம் ஏற்படும் என்கிற தவறான கருத்து மனிதரிடையே எப்பொழுதுமே நிலவி வருகிறது. பாம்பைக் கொன்றால்தான் தோஷம் என்றால் பசுவைக் கொன்றால் தோஷமில்லையா? ஆட்டைக் கொன்றால் தோஷம் வராதா? ஆட்டை அக்னி பகவானின் வாகனம் என்று கூறத்தெரிகிறது. ஆனாலும் அதே அக்னிக்கு இரையாக்கி அதை உண்ணவும் தெரிகிறது மனிதனுக்கு. இந்த நிலையிலே ஜாதகரீதியாக கடுமையான பாவத்தின் உச்சத்தைக் காட்டத்தான் நாகம் எனும் பாம்பை அடையாளப் படுத்தினார்கள். இந்த தோஷத்தைக் குறைப்பதற்காக வேதத்தில் முறையாக கூறப்பட்ட மந்திரங்களை உருவேற்றி நன்றாக கவனிக்க வேண்டும். குறைந்தபட்சம் மூன்று மண்டலம் (144 நாட்கள்) ஏதாவது ஒரு குறிப்பிட்ட ஸ்தலத்தில் (கோவிலில்) ஒரு குடும்பம் யாகம் செய்ய வேண்டும். அந்த மூன்று மண்டலமும் அந்த ஸ்தலம் தொடர்பான பூஜைகளை பூஜைக்குண்டான செலவினங்களை அக்குடும்பம் ஏற்றுக்கொள்ள வேண்டும். அது போக பல்வேறு தான தர்மங்களையும் நாங்கள் கூறுகின்ற மற்ற விஷயங்களையும் பின்பற்ற வேண்டும். இவையெல்லாம் நடைமுறையில் சாத்தியமில்லை என்பது எமக்கும் தெரியும்.

எனவே மிக எளிய வழியாக நவகிரக காயத்ரி மந்திரத்தையோ அல்லது தமிழ் வழிபாடுகள் செய்தோ குறிப்பாக இராகு கேதுவை குறிப்பாக அதிகமாக வழிபாடு செய்து இராகுவின் அதிதெய்வமான துர்க்கையையும் கேதுவின் அதிதெய்வமான விநாயகப் பெருமானையும் வழிபட்டு வரவேண்டும். நன்றாக கவனிக்க வேண்டும். ஒவ்வாமை நோய் கொண்ட ஏழை நோயாளிகளுக்கு அதிக மருத்துவ உதவிகளை செய்தால் கட்டாயம் அது உண்மையான சரப்பசாந்தி பூஜையாகும். மற்றபடி வெள்ளியால் ஒரு நாகத்தை செய்து அதன் தலையிலே சிறிதளவு பாலை ஊற்றி அப்படியே எடுத்து சென்று ஆழியில் (கடலில்) அல்லது காணிக்கைப் பேழையில் (பெட்டியில்) விட்டால் மட்டுமே தோஷம் போய்விடாது. இவையெல்லாம் மனிதர்கள் பிழைப்பதற்காக ஏற்படுத்தப்பட்ட ஒரு விஷயம். இதை முறையாக செய்ய வேண்டும். இந்த பூஜையின் செயல்பாட்டை நாங்கள் குறை கூறவில்லை. காலம் இல்லை என்றும் கூட்டம் அதிகமாக இருக்கிறதென்றும் மந்திரங்களை குறைத்துக் கூறுவதோ அல்லது அவசர அவசரமாக பூஜை செய்வதினாலோ யாருக்கும் எந்த பலனும் கிட்டுவதில்லை. எனவே இதை நன்றாக புரிந்து கொண்டு தர்மத்தில் நாட்டம் கொண்டு சுயமாக பக்தி சிந்தனையை வளர்த்துக் கொண்டு ஒரு மனிதன் வாழ்ந்தால் எல்லா தோஷங்களும் குறைந்துவிடும்.

கேள்வி: நவராத்திரியின் 9 தினங்களும் கொலு பொம்மைகளை அடுக்கி பூஜை செய்யும் முறை எப்போது ஆரம்பமானது? நவராத்திரியின் தாத்பரியம் என்ன?

இவற்றை தொடர்ந்து சொல்லிக் கொண்டே போகலாம். அன்னையின் பெருமை வார்த்தைகளில் அடங்காது. தொடர்ந்து நவராத்திரி பூஜை என்பது மிக மிக உயர்வான பூஜையாகும். இதை கடைபிடிப்பது ஒவ்வொரு மனிதனுக்கும் மிகவும் சிறப்பை தரும். பக்தி என்பதை விட்டுவிட்டு் முதலில் மனிதர்கள் தமக்குள் ஒற்றுமையையும் தமக்குள் சக்தியை வளர்த்துக் கொள்ள இது உதவும். அது மட்டுமல்ல. இந்த நிலையிலே ஒரு இல்லத்திலே இது போன்ற இறை ரூபங்களையெல்லாம் வைத்து பலரையும் அழைத்து பூஜை செய்து பலருக்கும் ஆடை தானம் அன்னதானம் இவற்றை தருவதன் மூலம் அங்கே இருப்பவர்கள் இல்லாதவர்களுக்கும் தர வேண்டும் என்கிற தாத்பரியம் மறைமுகமாக உணர்த்தப்படுகிறது.

ஒரு காலத்திலே வறுமையில் ஆட்பட்டாலும் கூட சில மனிதர்கள் யாசகமாக யாரிடமும் எதையும் பெறமாட்டார்கள். அப்படி பெறுவதை தரக்குறைவாக எண்ணுவார்கள். தானம் தந்தாலும் வாங்க மாட்டார்கள். இது போன்றவர்களை எப்படி காப்பாற்றுவது? பூஜை பிரசாதம் என்றுதான் தர வேண்டும் என்பதற்காகத்தான் இது போன்ற கூட்டு வழிபாடுகளும் பூஜைகளும் ஏற்படுத்தப்பட்டன. இன்னும் நவராத்ரியின் பரிபூரண பூஜைகள் எல்லாம் வழக்கொழிந்து போய் வெறும் ஆர்பாட்டம் மட்டுமே இப்பொழுது ஆங்காங்கே நடக்கிறது. அங்கே யாகங்கள் கூட்டு பிராத்தனை செய்ய வேண்டும். குறிப்பாக நாக தோஷம் களத்திர தோஷம் செவ்வாய் தோஷம் போன்ற பல்வேறு தோஷங்கள் கொண்ட ஆண்களும் பெண்களும் இந்த பூஜை செய்வது மிகவும் அவசியம். குறிப்பாக இளம்பெண்கள் மாலை பொழுதிலே ஒன்றுகூடி நல்ல முறையிலே அன்னையின் நாமத்தை உருவேற்றுவது அவர்கள் ஜாதகத்தில் உள்ள தோஷங்களை நீக்குவதற்கு மிகவும் உதவும். இது போன்ற பூஜைகள்தான் கலாசாரத்தையும் பக்தியையும் சமூக மேம்பாட்டையும் வளர்க்கக் கூடியது. ஆனால் அதில் உள்ள நோக்கத்தை புரிந்து கொள்ளாமல் ஒரு மனிதன் வெறும் தவறான புற சடங்கை மட்டும் பார்த்தால் குழப்பம்தான் எதிரொலிக்கும்

கேள்வி : பற்றுகள் அகல ஒரு மனிதன் எந்தெந்த விதமான பாவங்களை தவிர்க்க வேண்டும்?

எந்த பாவத்தையும் செய்யாமல் இருப்பதே ஏற்புடையது. ஏனென்றால் இந்த பாவத்திற்கு இதுதான் காரணம் என்று கூறிவிட்டால் அந்த பாவத்தை மட்டும் (நான்) செய்யவில்லை என்றெல்லாம் கூறி மனிதன் தப்பித்துவிட முடியாது. ஒரு பாவம் என்பதை விட அது ஏற்படுத்தும் விளைவு எத்தனை மனிதர்களுக்குள் எத்தனை காலம் ஏற்படுத்துகிறது? அதனால் அந்த சந்ததிகள் எத்தனை ஆண்டுகள் பாதிக்கப்படுகிறார்கள்? என்பதையெல்லாம் கணக்கிலே வைத்து பிறகு அதன் விளைவாகத்தான் அந்த பிறவியின் இறுதியிலும் அடுத்தடுத்த பிறவிகளிலும் விதி அந்த பாவத்தை செய்ய மனிதனுக்கு அந்த எதிர்விளைவுகளை தருகிறது. எனவே குறிப்பிட்ட என்று இல்லாமல் எப்பொழுது ஒன்று தவறு என்று மனசாட்சி உறுத்துகிறதோ அப்பொழுதே அதனை செய்யாமல் விட்டுவிடுவதே சிறப்பு.

கேள்வி: நீங்கள் முன்பு சொன்ன வேடியம் என்ற ஊரில் நாகதோஷத்திற்கு எப்படி பரிகார பூஜைகள் செய்ய வேண்டும்?

எந்த ஆலயமாக இருந்தாலும் இயன்ற வழிபாடுகளை செய்யலாம். இதுதான் செய்ய வேண்டும் என்று நாங்கள் யாரையும் கட்டாயப்படுத்தவில்லை. வாய்ப்பு உள்ளவர்கள் அபிஷேகம் செய்யலாம். அதற்கான சூழல் இல்லையென்றால் நறுமண மலர்மாலை சாற்றலாம். அங்குள்ள ஏழ்மையான மனிதர்களுக்கு இயன்ற உதவிகளை செய்யலாம். அமைதியாக அமர்ந்து பிராத்தனை செய்வதுதான் முக்கியம். வைராக்யமும் இறையருளும் இருந்தால் ஒரு பிறவியில்கூட சாத்தியம்தான். அதனை ஏன் சிந்தனையிலே குழப்பமாக வைத்துக் கொள்ள வேண்டும்? இந்தப் பிறவியில் இறைவன் அருள்வார் என்று எண்ணி முயற்சி செய்தால் தவறொன்றுமில்லையே.

கேள்வி: ஓதிமலை (கோயம்புத்தூர் மாவட்டம்) ஆண்டவனுடைய தத்துவத்தை சொல்லி அருளுங்கள்

மெய்யாக பரமனுக்கு பாலன் (முருகப்பெருமான்) உபதேசம் செய்கின்ற அந்த ஓதிய தன்மையை அடையாளம் காட்டுவதற்காக ஏற்படுத்தப்பட்ட ஆலயங்களில் இதுவும் ஒன்று. ஆனால் பிற ஆலயங்கள் பிற்காலத்தில் ஏற்படுத்தப்பட்டன. இவை ஆதிகாலத்து ஆலயம். இங்கு சென்று ஒருவன் இறை நினைவோடு வணங்குகிறானோ இல்லையோ இந்த தேகத்தை அசதியாக்கி தேகம் வேதனைப்பட்டாலும் பாதகமில்லை என்று அனுதினமும் ஒருமுறையாவது மேல் ஏறி கீழிறங்கினால் இப்படி ஏக (ஒரு) வருடம் இருந்தால் அவன் உடலைவிட்டு பல பிணிகள் போய் விடும். இந்த நிலையிலே ஐம்புலனும் அடங்க வேண்டும் என்று வினவுபவர்கள் இங்கு சென்று கார்த்திகை நட்சத்திரம் நடக்கின்ற காலத்திலும் சஷ்டி காலத்திலும் பரணி காலத்திலும் அவரவர் ஜென்ம நட்சத்திர காலத்திலும் உபவாசம் இருந்து முருகப்பெருமானின் சஷ்டி கவத்தையோ கந்த குரு கவத்தையோ அல்லது அறிந்த பிற மந்திரத்தை மனதிற்குள் செபித்து அந்த ஆலயத்தில் முடிந்தவரை அன்று முழுவதும் இருந்து பிறகு இறுதியாக பிரசாதம் ஏற்று கீழே வருவது கட்டாயம் ஞான மார்க்கத்திற்கு அற்புதமான வழியைக் காட்டும். இல்லை லோகாய மார்க்கம்தான் இப்போழுது எனக்கு தேவை என்று எண்ணக்கூடிய மனிதர்கள்கூட இங்கு சென்று தாராளமாக வேண்டியதைப் பெறலாம். அங்கு அமர்ந்து மனதார ஒரு நோக்கத்தை வைத்துவிட்டு வந்தால் கட்டாயம் அது நிறைவேறுவதை மனிதர்கள் அனுபவத்தில் காணலாம். பட்சிகள் (பறவைகள்) வடிவிலும் இந்த விலங்குகள் வடிவிலும் அங்கு இன்றும் முனிவர்கள் தவம் செய்து கொண்டிருக்கிறார்கள். இன்னமும் அங்கு அரூப நிலையிலே மகான்களும் ஞானிகளும் இருந்து கொண்டு இருக்கிறார்கள். யாமும் அங்கிருந்தும் இங்கிருந்தும் (01/05/2015) வாக்கை கூறிக்கொண்டே இருக்கிறோமப்பா.

ஓதிமலைமுருகன் கோவிலைப் பற்றி மேலும் அறிந்து கொள்ள கீழ் உள்ள லிங்கை க்ளிக் செய்து தெரிந்து கொள்ளலாம்.

கேள்வி: வலிப்பு நோய் எதனால் வருகிறது? அதற்கு என்ன பரிகாரம் செய்ய வேண்டும்? எந்தெந்த கோவில்களுக்கு செல்ல வேண்டும்?

இறைவன் கருணையைக் கொண்டு இயம்புவது யாதென்றால் பலமுறை கூறியதை மீண்டும் நினைவூட்டுகிறோம். ஒரு குறிப்பிட்ட பிரச்சனைக்கு அல்லது ஒரு குறிப்பிட்ட துன்பத்திற்கு ஒரு குறிப்பிட்ட பாவம் மட்டுமே காரணம் என்று கூற இயலாது. ஒட்டுமொத்த பாவங்களின் விளைவுகள் எல்லா வகையான துன்பங்களின் நிலையாகும். இந்த நிலையிலே இருந்தாலும் சில குறிப்பிட்ட பாவங்களுக்கு குறிப்பிட்ட நோயோ அல்லது குறிப்பிட்ட விதமான துன்பமோ வருவது இயல்பாகும். அதை தனித்தனியான மனித ஆத்மாவின் கர்ம கணிதத்தை வைத்துத்தான் யாங்கள் தீர்மானிப்போம். இருந்தாலும் பொதுவாக வாயில்லா ஜீவன்கள் எனப்படும் விலங்குகளை இடர்படுத்துவது. குறிப்பாக வேடிக்கையாகவோ அல்லது விலங்குகளை துன்புறுத்தி அதனால் இன்பம் காண்கின்ற பழக்கம் பொதுவாக மனித குலத்திற்கு உண்டு. தன்னைப் போல் உள்ள மனிதனையே இடர்படுத்தி இன்பம் காண்கின்ற மனிதன் விலங்குகளை மட்டும் விட்டு வைப்பானா என்ன? அப்படி விலங்குகளுக்கு தாங்கமுடியாத துன்பத்தைத் தந்து அதன் மூலம் தான் இன்பம் அடைகின்ற மனிதனுக்கு இன்னவன் கூறிய நோய் (வலிப்பு நோய்) கட்டாயம் பிறவி தோறும் தொடரும். எனவே விலங்குகளை பாதுகாக்கும் அமைப்புகளுக்கு உதவி செய்வதும் குறிப்பாக பசுக்கள் தானம் பசுக்களை பராமரிக்கும் அமைப்புகளுக்கு உதவி செய்வதும் (பசுக்களுக்கு உதவி செய் என்றால் அதற்காக வேறு விலங்குகளுக்கு உதவி செய்யாதே என்று பொருளல்ல. இதனை ஒரு குறியீடாக எடுத்துக் கொள்ள வேண்டும்) பிற உயிர்களை நேசிக்கும் மனோபாவத்தை வளர்த்துக் கொண்டு தன் ஊன் வளர்க்க பிற உயிரை கொல்லாதிருக்கின்ற எண்ணத்திற்கு மனிதன் வந்துவிட்டாலே கடுமையான பிணிகள் அவனை அணுகாது அவனைவிட்டு விலகுமப்பா. இந்ந தர்மகாரியங்களில் ஈடுபடுவதோடு பாழ்பட்ட ஆலயங்கள் சென்று உழவாரப் பணிகள் செய்வதும் அதற்கு முடிந்த பூஜைகளை தொடர்வதும் இதற்கு தக்க பிராயச்சித்தமாகும்.

கேள்வி: உடல் உறுப்புகள் தானம் செய்தால் அவை நல்லவருக்கும் பொருத்தப்படும் தீயவருக்கும் பொருத்தப்படும். தீயவைகளுக்கு நம் உடல் உறுப்புகள் பயன்பட்டால் அதன் காரணமாக பாவங்கள் வந்து சேருமா?

இறைவன் அருளால் உடல் உறுப்புகள் நல்லவர்களுக்குத்தான் பயன்பட வேண்டும் என்ற எண்ணம் ஒருவகையில் நன்றுதான் என்றாலும்கூட இறைவனின் பார்வையிலே எல்லோரும் சேய்களே (பிள்ளைகளே). ஒரு தாய்க்கு சில பிள்ளைகள் இருக்கும் பட்சத்தில் ஓரிருவர் தகாத செயல்களை செய்யும் பொழுது மற்றவர்கள் வெறுக்கலாம். சமுதாயம் வெறுக்கலாம். ஆனால் அந்த தாய்க்கு வெறுப்பு வராது. இவன் அறியாமையால் தவறு செய்கிறான். இவனைத் திருத்த வேண்டும் என்றுதான் எண்ணுவாள். அதைப் போல இறைவனும் அறியாமையால் தவறு பாவங்கள் செய்கின்ற ஆன்மாக்களை திருத்துவதற்கு சந்தர்ப்பங்களைத் தருகிறார். நல்லவர்களுக்கு மட்டும்தான் என்றால் சூரிய ஔி மழை காற்று என்று நல்லவர்களுக்கு மட்டும் அவை பயன்படுமாறு இறைவன் செய்திருப்பார். எல்லோருக்கும் பயன்படுமாறு இறைவன் எல்லாவற்றையும் பொதுவில் வைத்திருக்கிறார். இந்த உறுப்பு நல்லவர்களுக்கு பயன்படட்டும் என்று பிராத்தனை வைத்துக் கொள். அதனையும் விதிப்படி நல்லவன் அல்லாதவனுக்கு சென்றால் அதுவும் ஒரு விதி என்று எண்ணி சமாதானம் அடைவதைத் தவிர வேறு வழியில்லை.

கேள்வி: கரிநாள்களில் பிறந்தவர்களுக்கு நவகிரகங்கள் நற்பலன்களைத் தராது என்ற கருத்து பற்றி:

கரி என்ற சொல்லுக்கு சனிபகவான் என்ற பொருளும் இருக்கிறது. விநாயகபகவான் என்ற பொருளும் இருக்கிறது. இந்த ஒரு நாளை வைத்து பிறந்ததால் மட்டும் அதிக நஷ்டம் அல்லது அதிக உயர்வு என்று பொருள் கொள்ளுதல் கூடாது. வழக்கம் போல் பிறக்கின்ற குழந்தையின் கர்மவினை மற்றும் ஜாதகப்பலனை பார்த்துதான் முடிவெடுக்க வேண்டும்.

கேள்வி: கும்பாபிஷேகமே நடக்காத பாழடைந்த ஆலயங்களில் அபிஷேகம் தீபம் ஏற்றுதல் செய்வதால் ஏற்படும் பலன்கள் பற்றி விளக்குங்கள் குருநாதா?

இறைவன் அருளாலே இறைவன் நீக்கமற எல்லா இடங்களிலும் நிறைந்திருக்கிறான். தூய்மையான உள்ளத்தோடு எண்ணத்தோடு சாத்வீகமான எண்ணத்தோடு எங்கு இறைவனை எண்ணி வழிபட்டாலும் இறைவன் அருள் அவனுக்குக் கிட்டும். கலச விழா எனப்படும் கும்பாபிஷேகம் ஆகாத பாழ்பட்ட ஆலயத்திற்கு தாராளமாக மனிதர்கள் சென்று உழவாரப் பணிகள் தீபங்கள் ஏற்றுதல் ஏனைய வழிபாடுகள் போன்றவற்றை தாராளமாக செய்யலாம். புரிவதற்காக யாம் வேறுவிதமாக கூறுகிறோம். தூய்மையான ஒரு ஆலயம் இருக்கிறது. நல்ல முறையிலே பஞ்ச வர்ணம் பூசப்பட்ட கோபுரம் இருக்கிறது. எங்கு நோக்கினாலும் பரிசுத்தம். எங்கு நோக்கினாலும் நறுமணம் சந்தனம் அகில் ஜவ்வாது மணக்கிறது. எல்லா இடங்களிலும் தூய்மையான நெய்தீபம் எரிகிறது. எல்லா இடங்களிலும் நல்ல முறையிலே மிக சுத்தமாகவும் எல்லா வசதிகளும் மிக அழகுற அமைக்கப்பட்டிருக்கிறது. தற்கால வசதிகள் அனைத்தும் அந்த ஆலயத்தில் இருக்கிறது. ஆங்காங்கே சலவை கற்கள் பதிக்கப்பட்டிருக்கின்றன. பார்ப்பதற்கு நேர்த்தியாக மிகவும் அற்புதமாக தினமும் 6 கால பூஜை நடக்கிறது. உலகில் உள்ள அனைத்து மனிதர்களும் வருகிறார்கள். நறுமண மலர்கள் ஆங்காங்கே தூவப்படுகிறது. எல்லா வகையான வேத மந்திரங்களும் தேவார திருவாசகமும் ஓதப்படுகிறது. நித்திய பூஜை நடக்கிறது. வருவோர் போவோர்க்கெல்லாம் அன்னசேவை நடக்கிறது. இது விழிக்கு விருந்தாக மனதிற்கு சாந்தமாக இருக்கிறது. ஆனால் அங்குள்ள ஊழியர்கள் அங்கு வந்து போகக்கூடிய மனிதர்கள் உண்மையில் நல்ல தன்மை இல்லாதவர்களாகவும் வெறும் சுயநலவாதிகளாகவும் இருந்தால் அங்கு என்ன கிடைக்கும்? தீய நோக்கத்தோடு வந்தால் அங்கே இறைவன் இருப்பாரா? எனவே இறைவனுக்கு உகந்த இடம் ஒவ்வொரு மனிதனின் மனம்தான். அந்த மனம் சுத்தமாக பரிசுத்தமா நேர்மையாக நீதியாக சத்ய நெறியில்,தர்ம நெறியில் இருந்தால் எந்த இடத்திலும் இறைவன் அருள் மனிதனுக்கு உண்டு.