ராமருடைய வலிமை சாமர்த்தியம் ஆயுதப்பயிற்சி அவரிடம் உள்ள அஸ்திரங்கள் என அனைத்தையும் விபீஷணன் சபையில் அனைவரின் முன்பும் தைரியமாகச் எடுத்துச் சொன்னான். ராமரிடம் இருந்து நீங்கள் தூக்கிக் கொண்டு வந்த சீதை ஒரு விஷப் பாம்பு. சீதை அமைதியாக இருப்பது போலவே தங்களுக்கு இருக்கும். ஆனால் அவளால் தான் அழிவு உங்களை தேடி வரும். அவளை ஏன் தூக்கி வந்தீர்கள். இப்பொழுது உங்களுடைய முதல் கடமை அவளை ராமரிடம் திருப்பி அனுப்புவது மட்டுமே. இதைச் செய்யாவிட்டால் நாம் அழிந்து போவோம் இது நிச்சயம். இதனை பல முறை இந்த சபையிலும் உங்களிடமும் எடுத்துச் சொல்லி விட்டேன். இதனால் என் மீது நீங்கள் எவ்வளவு கோபத்தில் இருந்தாலும் பரவாயில்லை. நான் சொல்வதை சிறிது கேட்டு அதன் பிறகு முடிவெடுங்கள். நீங்கள் தவறான பாதையில் செல்வதை தடுத்து உங்களுக்கு வரப்போகும் அபாயத்தை சுட்டிக்காட்டி உங்களையும் இந்த ராட்சச குலத்தையும் காப்பாற்ற வேண்டியது எனது என்னுடைய கடமை ஆகும். இப்போதும் உங்களுக்கு சிறிது அதிஷ்டம் இருப்பதினால் தான் ராமர் இன்னும் இங்கு வரவில்லை. ராமர் வருவதற்குள் சீதையை நீங்கள் திருப்பி அனுப்பிவிட்டு ராமரை சரணடைந்தால் நீங்கள் காப்பாற்றப்பட்டு சுகமாக இந்த ராஜ்யத்தை ஆளலாம். எனவே தான் இதனை மீண்டும் மீண்டும் சொல்கின்றேன் என்று அனைவர் பேசியதையும் எதிர்த்து பேசினான் விபீஷணன்.

ராமருக்கு சாதகமாகவே நீங்கள் பேசுகின்றீர்கள் என்று இந்திரஜித் கத்தினான். ராவணனின் தம்பியாக இருந்து கொண்டு நீங்கள் இப்படி பேசுவதை கேட்க எனக்கு வெட்கமாக இருக்கிறது. நம்முடைய குலத்தின் பெருமையும் சக்தியையும் தெரிந்த நீங்கள் இவ்வாறு பேசுவதை இந்த சபை ஏன் இன்னும் அமைதியுடன் கேட்டுக் கொண்டிருக்கிறது என்று எனக்கு தெரியவில்லை. நீங்கள் உங்கள் குலத்தை மறந்து உங்களின் சிறுமையான குணத்தை காண்பிக்கிறீர்கள். உங்களுடைய பேச்சை ஒரு நாளும் அங்கிகரிக்க முடியாது. இந்திரனையும் அவனது தேவ கணங்களையும் எதிர்த்து நான் வெற்றி பெற்றிருக்கிறேன். நம்மைக் கண்டு இந்த உலகம் பயப்பட்டுக் கொண்டிருக்கிறது. இரண்டு மானிடர்களை பார்த்து நாம் பயப்பட வேண்டுமா? இந்த சபையில் உங்களது பேச்சு எனக்கு அவமானமாக இருக்கிறது என்று சொல்லி அமர்ந்தான் இந்திரஜித். விபீஷணன் பேச ஆரம்பித்தான்.

ராமர் லட்சுமணன் இருவரும் மானிடர்கள் என்று சொல்லாதே இந்திரஜித். நீ பாலகன் அவர்களை பற்றி அறிந்து கொள்ளும் அளவுக்கு உனக்கு அனுபவமும் அறிவும் போதாது. உன் தந்தையின் ராட்சச படைகளை பின்னால் வைத்துக் கொண்டு நீ பெற்ற வெற்றியினால் இப்படி பேசுகிறாய். ராவணனுக்கு மகனாக பிறந்தும் நீ அவரை அழிக்க வந்த சத்ரு என்றே நான் நினைக்கிறேன். ராமர் யுத்தம் செய்ய வேண்டும் என்று நினைத்து விட்டால் அவருக்கு எந்த படையும் தேவையில்லை. ராமரும் அவரது தம்பி லட்சுமணனும் எத்தனை பெரிய படைகள் வந்தாலும் அவர்கள் இருவர் மட்டுமே நின்று அனைத்து படைகளையும் எதிர்த்து அழிக்கும் வல்லமை கொண்டவர்கள். இந்த சபையில் அரசனுக்கு நல்ல யோசனை சொல்லக் கூடியவர்களே இப்போது அவருக்கு அழிவைத் தரும் யோசனையை சொல்கிறார்கள். ஏன் என்று எனக்கு புரியவில்லை. இந்த விசயத்தில் நான் சொல்வதும் எனது முடிவும் ஒன்று மட்டுமே. சீதையை விரைவில் ராமரிடம் அனுப்பி வைத்துவிட்டு நம்மை காப்பாற்றிக் கொள்ளவேண்டும். எனது பேச்சை நீங்கள் அனைவரும் புறக்கணித்தால் பின்பு துன்பப்படுபவர்கள் நீங்களே ஞாபகம் வைத்துக் கொள்ளுங்கள் என்று பேசி முடித்தான் விபீஷணன். அனைத்தையும் கேட்ட ராவணனுடைய கோபம் அதிகமானது. எனது தம்பி என்று இது வரை உனது பேச்சை கேட்டுக் கொண்டு பொறுமையாக இருந்தேன். வேறு ஒருவனாக இருந்தால் பேசிய நேரத்தில் இங்கேயே கொன்றிருப்பேன். ராட்சச குலத்தை அவமானப் படுத்துவதற்கு என்றே பிறந்தவன் நீ என்று ராட்சசன் விபீஷணனை திட்டினான்.

ராமரிடம் இருந்து சீதையை நான் தூக்கி வந்தது உங்கள் அனைவருக்கும் தெரியும். அதன் பிறகு ஒரு வானரம் இங்கு வந்து நாசம் செய்ததும் இலங்கையில் நடந்து கொண்டிருக்கும் அபசகுனங்களும் உங்கள் அனைவருக்கும் தெரியும். பலர் என்னிடம் சீதை இங்கு வந்ததினால் தான் இப்படி நடக்கறது. எனவே சீதையை ராமரிடம் அனுப்பி விடுமாறும் அவரிடம் மன்னிப்பு கேட்டுக் கேட்க வேண்டும் என்று மீண்டும் மீண்டும் என்னை வற்புறுத்துகின்றனர். ராமரிடம் சீதையை நான் திருப்பி அனுப்ப முடியாது. ராமரிடம் நான் மன்னிப்பும் கேட்க முடியாது. ராமர் வந்து தன்னை மீட்பான் என்று சீதை நம்பிக் கொண்டு இருக்கிறாள். ராமரால் கடல் தாண்டி இங்கு வருவது இயலாத காரியம். மீறி வந்தாலும் அதைப்பற்றி எனக்கு கவலையும் இல்லை பயமும் இல்லை. நம்மை தாக்கலாம் என்று ராமரும் லட்சுமணனும் வானரங்களுடன் கடற்கரையில் இருந்து கடலை எப்படி தாண்டலாம் என்ற யோசனை செய்து கொண்டு இருக்கிறார்கள். அவர்களை அங்கேயே அழிக்கும் வழிகளை நீங்கள் சொல்லுங்கள் இத்தனை நாட்கள் தம்பி கும்பகர்ணன் தூக்கத்தில் இருந்தான் ஆகவே இது பற்றி பேசவில்லை. இப்போது தம்பி கும்பகர்ணன் சபைக்கு வந்து விட்டான் எனவே இதுபற்றி நன்றாக யோசித்து உங்கள் ஆலோசனைகளை சொல்லுங்கள் என்று பேசி முடித்தான் ராவணன். கும்பகர்ணன் பேச ஆரம்பித்தான்.

ராமர் லட்சுமணனின் மீது உங்களுக்கு விரோதம் இருந்தால் நீங்கள் முதலில் அவர்களை எதிர்த்து யுத்தம் செய்து வெற்றி பெற்றிருக்க வேண்டும். அவர்களை அழித்திருந்தால் வெற்றி வீரரான உங்களுடன் சீதை தானகவே வந்திருப்பாள். அதை விட்டுவிட்டு யாரையும் ஆலோசனை கேட்காமல் நீங்களாகவே ஒரு பாவ காரியத்தை செய்துவிட்டு ராமரின் பகையை சம்பாரித்துக் கொண்டு விட்டீர்கள். இப்போது காலம் தாண்டிய பின்பு ஆலோசனை சொல்லுங்கள் என்று கேட்கிறீர்கள். நீதி சாஸ்திரம் அறிந்த அரசனுக்குரிய உத்தம காரியத்தை செய்யாமல் நீதி சாஸ்திரம் அறியாத மூடனைப் போல் செய்து விட்டீர்கள் என்று ராவணனின் மேல் எந்த பயமும் இல்லாமல் தைரியமாக சொல்லி அமர்ந்தான் கும்பகர்ணன். அனைவரின் முன்பும் தம்பி இப்படி பேசி விட்டானே என்று ராவணனின் முகம் வாடியது. ராவணனின் மேல் அளவு கடந்த அன்பு வைத்திருந்த கும்பகர்ணனால் ராவணனின் முகம் வாடியதை பொறுக்க முடியவில்லை. தன்னுடைய கடினமான சொல்லால் தான் அண்ணன் முகம் வாடி விட்டது என்பதை உணர்ந்த கும்பகர்ணன் பழையதை பேசி இனி பிரயோஜனம் இல்லை. இனி நடக்க வேண்டியதை பார்ப்போம். இனி அண்ணனுக்கு ஆதரவாக இருக்க வேண்டும் என்று எண்ணிக் கொண்டான்.

ராமரின் வல்லமையும் அவர் ஒரு சிறந்த வில்லாளி என்றும் அவர் பெற்ற வரங்களும் கும்பகர்ணனுக்கு நன்றாக தெரியும். ராவணனுக்கு எதிராக எந்த ஒரு காரியத்தையும் செய்யக் கூடாது என்ற முடிவில் இருந்த கும்பகர்ணன் மற்றவர்களை போல் ராவணனை பெருமைப்படுத்தி ராவணனுக்கு தைரியத்தை கொடுத்து பேசினான். நீங்கள் முன்னால் செய்ய வேண்டியதை பின்னாலும் பின்னால் செய்ய வேண்டியதை முன்னாலும் தவறாக செய்து கொண்டு இருக்கிறீர்கள். ஆனாலும் இனி நீங்கள் பயப்பட வேண்டாம். இந்த ராமரை நான் எனது வலிமையால் எதிர்த்து யுத்தம் செய்து வெற்றி பெறுவேன். ராமரது அம்புகள் என் மீது ஒன்றிரண்டாவது படும் அதைப் பற்றி எனக்கு கவலை இல்லை. எனக்கு ஒன்றும் ஆகாது. ராமரை அழித்து அவரது ரத்தத்தை குடித்துவிட்டு உங்களுக்கு செய்தி அனுப்புவேன். நீங்கள் என்ன முடிவு எடுக்கின்றீர்களோ அதற்கு நான் கட்டுப் படுகிறேன் என்று கும்பகர்ணன் பேசி முடித்தான். ராவணனுடைய பிரதான ஆலோசகன் பிரஹஸ்தன் ராவணனுடைய பலத்தை எடுத்துச் சொல்லி உங்களை எதிர்த்து இது வரை யாரும் வென்றது இல்லை. இனி வெற்றி பெறப் பொவதும் இல்லை என்று ராவணனை மகிழ்ச்சிக் கடலில் ஆழ்த்தினான். ராவணன் உற்சாகமடைந்தான். குபேரனை எதிர்த்து வெற்றி பெற்றவன் நான் என்னை எதிர்த்து யார் இங்கே வந்து வருவார்கள் என்று ஆர்ப்பரித்தான். ராவணனின் பேச்சில் சபையில் உள்ளவர்கள் ஆராவாரம் செய்தார்கள்.

ராமரிடம் இருந்த சீதையை பிரித்து இங்கு கொண்டு வந்ததில் இருந்து இலங்கை நகரத்தில் அபசகுனங்கள் நிறைய தெரிகிறது. ஹோமங்கள் செய்யும் போது எரியும் அக்னி எரிய வேண்டிய முறையில் எரியவில்லை. சரியான மந்திரங்களை சொல்லி ஆகுதிகளையும் நெய்யையும் அக்னியில் போட்டாலும் அக்னி எரிவதில்லை. பூஜை செய்யும் இடங்களில் பாம்புகள் நிறைய காணப்படுகிறது. இறைவனுக்கு படைக்க செய்யும் உணவுகளை இறைவனுக்கு படைக்கும் முன்பாகவே அதில் எறும்புகள் வந்து மொய்க்கிறது. பசுக்கள் சரியாக பால் கரப்பது இல்லை. நமது அரண்மணையில் உள்ள யானைகள் குதிரைகள் கோவேறு கழுதைகள் என அனைத்து விலங்குகளும் ஆரோக்கியம் இல்லாமல் கிடக்கின்றது. சரியாக உண்ணாமல் விபரீதமாக நடந்து கொள்கின்றன. விலங்குகளுக்கு செய்யும் வைத்தியங்கள் எதுவும் பலன் அளிக்கவில்லை. காக்கைகள் நகரத்தின் உயரமான இடங்களின் மேல் கூட்டம் கூட்டமாக உட்கார்ந்து விபரீதமாக கத்துகின்றன. கழுகுகள் வட்டமிட்டுக் கொண்டிருந்தன. நரிகள் ஊருக்குள் புகுந்து ஊளையிடுகின்றன. காட்டு மிருகங்கள் நகரத்திற்குள் நடமாடுகின்றன. சகுனம் சொல்லும் அறிஞர்கள் இந்த அபசகுனங்களின் அறிகுறிகளை பார்த்து அதற்கு அர்த்தம் சொல்வது அனைவருக்கும் கவலையை உண்டாக்கி இருக்கின்றது. இவையெல்லாம் நமக்கு மிகப்பெரிய அபாயத்தையும் நஷ்டத்தையும் குறிக்கின்றது. இதை நாம் அலட்சியம் செய்யக்கூடாது. சீதையைத் திருப்பி அனுப்பிவிடுங்கள். அவளை இங்கு கொண்டு வந்தது முதல் இந்த அறிகுறிகள் காணப்படுகின்றன. நான் சொல்வதில் நம்பிக்கை இல்லை என்றால் மற்றவர்களையும் விசாரித்து கேட்டுத் தெரிந்து கொள்ளுங்கள். நான் சொன்னதில் தங்களுக்கு உடன்பாடு இல்லை என்றால் என் மீது கோபித்துக் கொள்ளாதீர்கள்.

ராமரை பகைத்துக் கொள்வதினால் நமக்கு லாபம் ஒன்றும் இல்லை. சீதையை திருப்பி அனுப்பிவிட்டு நாம் சுகமாக வாழ்வோம் என்று மிகப் பணிவுடன் விபீஷணன் ராவணனிடம் கூறினான். அதற்கு ராவணன் சீதையைத் திருப்பி தரும் பேச்சுக்களை இங்கு பேச வேண்டாம். அது ஒரு நாளும் முடியாது. ராமரை நான் ஒரு எதிரியாகவே காணவில்லை. ராமரின் மேல் எனக்கு ஒரு பயமும் இல்லை நீ போகலாம் என்றான். ராவணன் சீதையை திருப்பி அனுப்பக் கூடாது என்று பிடிவாதமாக இருந்தாலும் தன்னுடைய ஆசை நிறைவேறவில்லையே என்று மிகவும் வருந்தினான். தான் செய்யும் காரியத்திற்கு தன்னுடைய உறவினர்களும் தவறாக பேசுகின்றார்களே என்று தனது மன அமைதியை இழந்தான் ராவணன். அதனை யாரிடமும் காட்டிக் கொள்ளாமல் மீண்டும் மீண்டும் சபையை கூட்டி ஆலோசனை செய்தான். இழந்த மன அமைதியை மீண்டும் பெறுவதற்காக சபையை கூட்டி ஆலோசனை என்ற பெயரில் தன்னை மற்றவர்கள் பெருமையாக பேசுவதை கேட்டு ஆறுதல் அடைந்தான் ராவணன். தனது அகங்காரத்தால் சிறிய காரியத்துக்கு கூட சரியான யோசனை செய்ய இயலாமல் முடிவெடுக்க முடியாமல் திணறினான் ராவணன்.

ராமரை பற்றி விவாதிக்க மீண்டும் தனது மந்திரி சபையை கூட்டினான். இந்த முறை நகரத்தில் உள்ள அனைத்து ராட்சச குழுக்களின் தலைவர்களும் வர வேண்டும் என்று கட்டளையிட்டான். அரண்மனையில் ராட்சச தலைவர்களால் நிரம்பியது. ராவணன் பேச ஆரம்பித்தான். எல்லா விதத்திலும் நீங்கள் திறமைசாலிகள். இந்த மந்திரி சபையில் உள்ளவர்கள் எந்த விதமான சிக்கலான காரியத்திற்கும் சரியான யோசனை சொல்லும் சக்தி வாய்ந்தவர்கள் நீங்கள். இதுவரை நீங்கள் ஆலோசித்து சொன்ன அனைத்தும் நமக்கு நன்மையை அளித்திருக்கிறது. இதுவரையில் நாம் செய்த யுத்தங்களும் அதற்கு நீங்கள் சொன்ன அனைத்து ஆலோசனைகளும் நமக்கு பல வெற்றிகளை கொடுத்திருக்கிறது. நாம் இது வரையில் தோல்விகளை கண்டதில்லை. இப்பொழுது உங்களிடம் நான் ஒன்று கேட்கிறேன்.

ராமரைப் பற்றி அறிந்த நான் பேசுகிறேன் என்று ராவணனின் தம்பி விபீஷணன் எழுந்தான். இங்கிருக்கும் அனைவரும் தங்களின் பெருமைகளை பேசுவதிலும் உங்களை புகழ்வதிலுமே குறியாக இருக்கிறார்கள். இவர்களின் யோசனைகள் தங்களுக்கு இனிமையாக இருந்தாலும் நமது நாட்டிற்கும் நமது குலத்திற்கும் இது சரியானதல்ல. நீதி தர்மத்திற்கு எதிராக ஒரு காரியத்தை செய்தால் அதன் எதிர் விளைவுகள் கடுமையானதாக கண்டிப்பாக வரும். அதுவே இப்போது வந்திருக்கிறது. இதற்கு முதலில் அமைதியான பேச்சுக்கள் வழியாகவும் அறிவுப்பூர்வமாகவும் தீர்வுகளை தேட வேண்டும். அது முடியாவிட்டால் அதன் பிறகு யுத்தத்தை செயல்படுத்த வேண்டும். இவர்கள் சொல்வது போல் நீங்கள் முதலில் யுத்தத்தை ஆரம்பித்தால் இலங்கையும் நமது குலமும் முற்றிலும் அழிந்து போகும். தருமத்தை சிந்தித்து எது சரியானதோ அதனை முதலில் செய்யுங்கள்.

ராமருடைய மனைவி சீதையை நீங்கள் தூங்கி வந்தது பாவகரமான காரியமாகும். அந்த பாவத்தை தீர்த்துக் கொள்ள முதலில் அதற்கான வழியை தேடுங்கள். ராமர் நமக்கு என்ன தீங்கு செய்தார். தனது தந்தையின் சத்தியத்தை காப்பாற்ற தண்டகாருண்ய காட்டில் தனது மனைவியுடனும் தனது தம்பியுடனும் யாருக்கும் எந்த தீங்கும் செய்யாமல் அமைதியாகவே வாழ்ந்து வந்தார். அங்கு அவரிடம் சரணடைந்தவர்களையும் தன்னை சார்ந்தவர்களையும் காப்பாற்றிக் கொள்வதற்காக தன்னை எதிர்த்து வந்த ராட்சசர்களை யுத்தம் செய்து அழித்தார். ராமரின் மேல் கோபம் இருந்தால் நீங்கள் ராமரை எதிர்த்து யுத்தம் செய்திருக்க வேண்டும் அதைவிட்டு அவர்களை வஞ்சகமாக ஏமாற்றி அவரது மனைவியை தூக்கி வந்து விட்டீர்கள். இது மிகப்பெரிய பாவமாகும். நம் பெயரில் குற்றத்தை வைத்துக் கொண்டு யுத்தம் செய்ய வேண்டும் என்று சொல்வது சரியானதல்ல.

ராமருடைய பலத்தை முதலில் சரியாக தெரிந்து கொள்ள வேண்டும். அவரின் தூதுவனாக வந்த அனுமனின் பலத்தையும் சாமர்த்தியத்தையும் நாம் அனைவரும் கண்டோம். இவ்வளவு பெரிய கடலை ஒரே தாவலில் தாவ யாராலும் முடியாது ஆனால் அனுமன் தாண்டினான். அனுமானம் செய்ய முடியாத அளவிற்கு அனுமனின் வீரம் உள்ளது. ராமரைப் பற்றியும் அனுமனைப் பற்றியும் இங்கிருப்பவர்கள் அலட்சியமாக பேசுவதில் பயனில்லை. நம்முடைய பலம் பெரிதாக இருந்தாலும் எதிரியின் பலத்தையும் பார்த்து யுத்தத்தை தீர்மானிக்க வேண்டும். சீதையை முதலில் ராமரிடம் ஒப்படைத்து விட்டால் யுத்தம் என்ற பேச்சுக்கே இடம் இல்லை. ராமரும் லட்சுமணனும் இங்கு வருவதற்குள் சீதையை அவர்களிடம் ஒப்படைத்து விடுங்கள். உங்களின் கருத்துக்கு எதிரான கருத்தை சொல்கிறேன் என்று என்மீது கோபம் கொள்ள வேண்டாம். உங்களின் நன்மைக்காக சொல்கிறேன் என்று ராவணனிடம் விபீஷணன் அமைதியுடன் கூறினான். தன்னுடைய மந்திரிகள் சேனாதிபதிகளின் வீரப்பேச்சுக்களை மகிழ்ச்சியுடன் கேட்டுக் கொண்டிருந்த ராவணனுடைய மனதில் இருந்த சந்தேகம் அதிகமானது. நாளை மீண்டும் இதை பற்றி விவாதிக்கலாம் என்ற ராவணன் அவையை ஒத்தி வைத்து விட்டு அந்தப்புரம் சென்று விட்டான்.

ராமரைப் பற்றியே இரவு முழுவதும் சிந்தித்துக் கொண்டே இருந்தான் ராவணன். அதிகாலையில் வாத்தியங்கள் வேதங்கள் முழங்க மங்கள இசைகளுடன் இருந்த ராவணனது அந்தப்புரத்திற்கு விபீஷணன் சென்றான். ராவணனை வணங்கிய விபீஷணனை பார்த்ததும் அங்கிருக்கும் அனைவரையும் வெளியே போகச் சொல்லிவிட்டு விபீஷணனிடம் என்ன செய்தி என்று கேட்டான் ராவணன். அதற்கு விபிஷணன் அண்ணா நான் சொல்வதில் தவறு இருந்தால் மன்னிக்க வேண்டும். என்னுடைய லாபத்திற்காக நான் எதுவும் பேசவில்லை. என்னுடைய அண்ணன் என்ற பாசத்தில் உங்களின் நலன் கருதியே பேசுகிறேன். நீங்கள் அனைத்தையும் ஆராய்ந்து பார்த்து ஒரு முடிவுக்கு வாருங்கள்.

ராமரைப் பற்றியும் அனுமன் வந்து சென்றது பற்றியும் ராவணன் பேசியதை கேட்ட அவனது சபையில் உள்ள ஒரு ராட்சசன் தனது கருத்தை சொல்ல ஆரம்பித்தான். நம்முடைய சேனை பலமும் ஆயுத பலமும் இந்த உலகத்தில் மிகப் பெரியதாகவும் வலிமை உள்ளதாகவும் இருக்கும் போது நீங்கள் ஏன் கவலைப் படுகின்றீர்கள். நமது கோட்டையை எந்த எதிரிகளாலும் வெற்றி பெற முடியாது. தேவலோகம் சென்று இந்திரனை வெற்றி பெற்றிருக்கிறீர்கள். யாராலும் வெற்றி பெற முடியாத தானவர்களுடன் தங்களின் தவ பலத்தால் ஒரு வருடம் யுத்தம் செய்து வெற்றி பெற்றிருக்கிறீர்கள். போகவதி நகரத்திற்கு சென்று நாகராஜனை எதிர்த்து தாங்கள் வெற்றி பெற்றிருக்கிறீர்கள். குபேரனை தோற்கடித்து அவனுடைய புஷ்பக விமானத்தை தாங்கள் பெற்றிருக்கிறீர்கள். தங்களுக்கு பயந்து மயன் தங்களுடன் நட்பு கொண்டு அவனது மகள் மண்டோதரியை உங்களுக்கு மணம் முடித்து கொடுத்திருக்கிறான். பாதாளத்தில் உள்ள பல நகரங்களையும் காளகேயர்களையும் வெற்றி பெற்றிருக்கிறீர்கள். வருணனுடைய மகன்களையும் யமனையும் கூட தங்கள் முன்பு மண்டியிட வைத்து விட்டீர்கள். இவ்வளவு பல சாலியான உங்களுக்கு ராமர் ஒரு எதிரியே அல்ல. தங்களுடைய பலம் எதிரிக்கு தெரிந்திருக்கும். தங்களை எதிர்க்க இங்கு யாரும் வரமாட்டார்கள். மீறி வந்தால் அவர்களை சமாளிக்க தங்களின் புதல்வனான இந்திரஜித் ஒருவனே போதும். எதிரிகள் எத்தனை பேர் வந்தாலும் இந்திரஜித்தை நீங்கள் அனுப்பி வைத்தால் அத்தனை பேரையும் அழித்து வெற்றி பெறுவான். காரியம் முடிந்தது கவலைப்படாதீர்கள் என்று ராவணனை புகழ்ந்து சொல்லி அமர்ந்தான். ராவணனின் சேனாதிபதி மகாசுரன் எழுந்து தனது கருத்தை சொல்ல ஆரம்பித்தான்.

அனுமன் இலங்கைக்கு வந்த போது சிறிது அஜாக்கிரதையாக இருந்து விட்டோம். நமது அஜாக்கிரதையை பயன்படுத்தி அந்த வானரம் தனது வலிமையை காட்டி நம்மை எல்லாம் அவமானப்படுத்தி விட்டு சென்று விட்டது. இது போல் மீண்டும் நடக்க விட மாட்டேன். மறுபடி அந்த வானரம் இங்கே வந்தால் நான் பார்த்துக் கொள்கிறேன். எத்தனை வானரங்கள் வந்தாலும் அத்தனை பேரையும் அழித்து விடுவேன். ஒரு தவறு நடந்து விட்டதால் அதை தொடர்ந்து அபாயம் வரும் என்று கவலைப்பட வேண்டியதில்லை. தேவர்கள் கந்தர்வர்கள் தானவர்கள் என அனைவரையும் எதிர்த்து வெற்றி பெற்ற தாங்கள் ராமரைப் பற்றி கவலை கொள்ளாதீர்கள் என்று சொல்லி முடித்தான். துர்முகன் என்ற ராட்சசன் எழுந்து எனக்கு உத்தரவு கொடுங்கள். நம்மை எல்லாம் அவமதிப்பு செய்த அந்த வானரத்தையும் அவனது கூட்டத்தையும் இப்போதே சென்று அழித்து விட்டு திரும்புகிறேன் என்று கர்ஜனை செய்தான்.

ராமரும் லட்சுமணன் இருவர் மட்டுமே இப்போது நமது எதிரிகளாக இருக்கிறார்கள். சாதாரண வானரத்தை பற்றி ஏன் பேச வேண்டும். எனக்கு உத்தரவு கொடுங்கள் அவர்களை நான் ஒருவனே சென்று அழித்துவிட்டு வருகிறேன் என்று வஜ்ர தம்ரஷ்டிரன் என்ற ராட்சசன் தனது பரிகை என்ற உலக்கை ஆயுதத்தை காண்பித்தான். கும்ப கர்ணனின் மகன் நிகும்பன் எழுந்தான். நீங்கள் அனைவரும் இங்கே இருங்கள் யாரும் வர வேண்டாம் நான் ஒருவனே கடலின் அக்கரையில் அவர்கள் இருக்கும் இடம் சென்று அவர்களை தின்று விட்டு உங்களுக்கு செய்தியை சொல்கிறேன் என்றான். ஒரு ராட்சசன் எழுந்து நாம் சூழ்ச்சி மூலமாக இவர்கள் அனைவரையும் அழித்து விடலாம். அதற்கான திட்டத்தை சொல்கிறேன் என பேச ஆரம்பித்தான். பல ராட்சசர்களை மனித வேடம் அணியச் செய்து ராமரிடம் அனுப்புவோம். பரதன் எங்களை அனுப்பியிருக்கிறான். நான்கு வகை பெரும் படை ஒன்று பின்னால் வருகிறது சிறிது நாள் காத்திருங்கள் என்று சொல்லுவோம் அவர்கள் கடற்கரையிலேயே ஓய்வு எடுத்துக் கொண்டு காத்திருப்பார்கள். நமது சூழ்ச்சி வலையில் விழுந்த அவர்களை நாம் வான் வழியாக சென்று அவர்களை முதலில் சூழ்ந்து கொண்டு நான்கு பக்கமும் இருந்து தாக்கி அழித்துவிடலாம் என்றான். அனைவரும் தங்களது ஆயுதங்களை காட்டி ஆர்ப்பரித்தார்கள். இப்படி ஒருவர் பின் ஒருவராக ராவணனை பெருமையுடன் பேசி திருப்திப் படுத்தினார்கள். அனைவரது பேச்சு ராவணனுக்கு திருப்தியை கொடுத்தாலும் அவனது மனதில் ஏதோ நெருடிக் கொண்டே இருந்தது.