தேவாரம் பாடப்பெற்ற சிவ தலம் # 189 அகத்தியான்பள்ளி

சிவனின் தேவாரப்பாடல் பெற்ற சிவாலயங்களில் 189 வது தேவாரத்தலம் அகத்தியான்பள்ளி. மூலவர் அகத்தீஸ்வரர் அக்னிபுரீஸ்வரர். இங்கு இறைவன் சுயம்பு மூர்த்தியாக அருள்பாலிக்கிறார். அம்பாள் பாகம்பிரியாள் மங்கைநாயகி அம்மை சௌந்தரநாயகி. தலவிருட்சம் வன்னி அகத்தி. தீர்த்தம் அகத்திய தீர்த்தம் (கோயிலின் மேற்குப்பக்கம் உள்ளது). அக்னிதீர்த்தம் (கடல்) அருகாமையில் உள்ளது. சுவாமி சன்னதியில் உள்ள குளம் அக்னி புஷ்கரணி எனப்படுகிறது. ராஜகோபுரம் மூன்று நிலைகளை உடையது. சுவாமி கிழக்கு நோக்கியும் அம்பாள் மேற்கு நோக்கியும் காட்சி தருகின்றனர். அம்பாள் கோயிலுக்குப் பக்கத்தில் சுவாமியைப் பார்த்தவாறு அகத்தியருக்கு தனி கோயில் உள்ளது. கோவிலில் உள்ள அகத்தியர் உருவச்சிலை மிகவும் அழகிய வேலைப்பாடுடன் உள்ளது. இக்கோயிலில் நவக்கிரகங்கள் ஒரே திசை பார்த்து உள்ளன. கைலாயத்தில் சிவன் பார்வதி திருமணத்தைக் காண முப்பத்து முக்கோடி தேவர்களும் திரண்டிருந்தனர். இதனால் வடதிசையிலிருந்த கைலாயம் தாழ்ந்தது தென்திசை உயர்ந்தது. இதை சமப்படுத்த சிவபெருமான் அகத்தியரை அழைத்து தென்திசைக்கு செல்லும்படி உத்தரவிட்டார். சிவனின் ஆணைப்படி அகத்தியர் தென்திசைக்கு சென்றார். சிவபெருமான் அகத்தியருக்கு அவர் விரும்பும் இடங்களில் எல்லாம் திருமணக் கோலம் காட்டி அருளுவேன் என்று வாக்களித்தார். இதையடுத்து அகத்தியரும் புறப்பட்டு தென்திசை வந்து அகத்தியான்பள்ளி தலத்தில் ஒரு ஆசிரமம் அமைத்துக் கொண்டு சில காலம் தங்கி சிவலிங்கம் ஒன்றை ஸ்தாபித்து அதற்கு பூஜைகள் செய்து வந்தார். அப்போது தான் கொடுத்த வாக்கின்படி பார்வதியுடன் நடந்த தனது திருமணக் கோலத்தை அகத்தியருக்கு இத்தலத்தில் காட்டி அருள்புரிந்தார். அகத்தியருக்குக் காட்சி கொடுத்ததால் இத்தலத்து இறைவன் அகத்தீஸ்வரர் எனப்படுகிறார். அகத்தியர் பிரதிஷ்டை செய்து வழிபட்ட தலங்களில் இதுவும் ஒன்று. அகத்தியர் திருவுருவம் கோவிலில் உள்ளது. குலசேகரப்பாண்டியனுக்கு இருந்த வியாதி போக இத்தலத்தில் உற்சவம் நடத்தி நீங்கப் பெற்றதாக இக்கோவிலில் உள்ள ஒரு கல்வெட்டில் வரலாற்றுத் தகவல் உள்ளது. ராஜராஜன் மாறவர்மன் குலசேகரன் ஆகியோர் காலத்துக் கல்வெட்டுக்கள் இக்கோயிலுக்குள் உள்ளன. எமதர்மன் தனது நீண்ட காலம் சாபம் நீங்க இத்தல இறைவனை வழிபட்டு ஜீவன் முக்தி பெற்றுள்ளான். திருஞானசம்பந்தர் பாடல்கள் பாடியுள்ளார்.

Leave a Reply

Your email address will not be published.

This site uses Akismet to reduce spam. Learn how your comment data is processed.