அகத்திய மாமுனிவரின் பொது வாக்கு:
இறைவனின் அருளால் உரைப்பது யாதென்றால் நலம் எண்ணி நலம் உரைத்து நலமே செய்ய நலமே நடக்குமாம். இதை தான் நாங்கள் எம்மை நாடுகின்ற மனிதர்களுக்கு பல காலம் வித வித விதமான வார்த்தைகளின் மூலம் இயம்பிக்கொண்டு இருக்கிறோம். பல்வேறு தருணங்களில் யாம் இந்த ஜீவ அருள் ஓலையிலே மௌனம் காக்கிறோம் என்றால் எத்தனையோ விதமான தெய்வீக சூட்சும காரணங்கள் உண்டப்பா. யாம் பல்வேறு விஷயங்களை நிழல் பட விளக்கம் தந்தாலும் அதனை புரிந்து கொள்ளும் தன்மை மாந்தர்களுக்கு இல்லை. ஆயினும் அறிந்தோ அறியாமலோ அதாவது நூற்றுக்கு நூறு விழுக்காடு நல்லவர்களோ அல்லது நூற்றுக்கு நூறு விழுக்காடு எமது (அகத்திய மாமுனிவர்) வாக்கை பின்பற்றுகிறார்களோ இல்லையோ இதனை நாடாத அல்லது நாடியும் நம்பாத மாந்தர்களை விட ஏதோ ஒன்று இருக்கிறது என்று நம்பி எம் பின்னே வருகின்ற மனிதர்களுக்கு யாம் இறைவன் அருளால் கூடுமானவரை கடுமையான விதியை மாற்றி அப்படி வருகின்ற மனிதர்களுக்கு நலம் செய்வது என்பது எமது தலையாய கடமையாக இருந்து வருகிறது. ஆயினும்கூட அப்படி நடப்பது என்பது ஏதோ விழி மூடி விழி திறப்பதற்குள் நடந்து விட வேண்டுமென்று மாந்தர்கள் எண்ணுகிறார்கள்.
குழந்தைகள் அல்லது குழந்தை போன்றவர்களின் எதிர்பார்ப்பு இயல்பு அப்படி தான் இருக்கும் என்பதால் அதை கூட நாங்கள் குற்றம் என்று கூறவில்லை. ஆனால் அப்படி எதையாவது நடத்தினால் அதன் விளைவு மிகவும் கடுமையாக இருக்கும் என்றால் நாங்களே அதனை நடத்தாமல் சற்றே மாற்றி மாற்றி நடத்திக்கொண்டு வருவோம். சுருக்கமாக கூறப் போனால் எம் வழியே வருகின்ற மனிதர்கள் திடம் கொண்டு வைராக்கியம் கொண்டு தர்ம வழியிலும் சத்திய வழியிலும் இறை பக்தி வழியிலும் மிக நன்றாக செல்ல செல்ல நாங்களே ஒன்றை கூறி அதனை தேவையான தருணத்தில் நடத்தாமல் மாற்றுவோம். யாம் ஒன்றை கூறாமல் அல்லது நடவாதப்பா என்று கூறி நடத்தியும் காட்டுவோம். இந்த இரண்டிற்கும் பல்வேறு விதமான கர்ம வினை சூட்சும நுணுக்கங்கள் உண்டு. அதை ஒருவிதமாக நுணுக்கமாக ஆராய்ந்து பார்த்தால் தான் புரியும்.
