ஜீவ நாடி வழியாக அகத்திய மாமுனிவர் வாக்கு

கேள்வி: நடராஜப் பத்துவில் வரும் கும்பமுனி மச்சமுனி பிரம்மரிஷி கோரக்கர் வள்ளுவர் போகர் இவர்கள் எல்லாம் கூறிடும் வைத்தியம் அல்ல. என் மனது உன்னடிவிட்டு நீங்காது நிலை நிற்க ஏதுளவு புகல வருவாய் இதன் ஞானக்கருத்து என்ன?

இறைவனின் அருளாலே இதுபோல் கூற வருவது என்னவென்றால் நல்விதமாய் பலவற்றை யாங்கள் ஓதினாலும் பிறர் ஓதக் கேட்டாலும் அவை நல்லதோ அல்லது அல்லதோ அவற்றையெல்லாம்விட்டு நான் எண்ணுகின்ற எண்ணங்களில் இருந்தும் என்னை காப்பாற்றி நான் நினைப்பது சரியோ தவறோ அவற்றையும் தாண்டி என்னை நீ ஆட்கொள். சுருக்கமாக கூறப்போனால் நான் புரிந்து கொண்டது சரியோ தவறோ நான் நினைப்பது உண்மையோ பொய்யோ ஆனால் இறைவா என்னை அப்படியே ஏற்றுக்கொள். நான் எப்படியோ அப்படியே புரிந்து ஏற்றுக்கொள் அப்படியே என்னை ஆட்கொள் என்பதுதான் அடிப்படை உண்மையாகும்.

கேள்வி: மனித இனம் எப்படித் தோன்றி உலகம் முழுவதும் பரவியது?

இறைவனின் கருணையாலே நீண்ட நெடும் விடையை தரவேண்டிய வினா இது. இருந்தாலும் கூறுகிறோம். ஆதியந்தமில்லாத பரம்பொருள் வெறும் ஓம்கார சப்தத்தோடு தனித்து அமைதியாய் இருக்கிறது. அது தானே எல்லாமாகவும் இருக்கிறது. வேறு எதுவும் இல்லாத நிலையில் தானாக இருக்கின்ற அதுதான் பலவிதமாக அண்ட சராசரங்களாக பிரிந்து மெல்ல மெல்ல விதவிதமான கிரகங்களாகவும் வேறுவிதமான நிலைகளாகவும் மாறுகிறது. அப்படி மாறிய நிலையிலேயே எந்த உயிரினமும் இல்லாமல் பல்கோடி ஆண்டுகள் கழிந்தன. அதன் பிறகுதான் சிறு சிறு உயிர்கள் தாவரங்கள் பிறகுதான் மனிதர்கள் என்ற நிலைக்கு ஒரு முடிவை எடுத்தது பரம்பொருள். இது ஒரு கணத்தில் ஒரு ஆண்டில் நிகழ்ந்தது அல்ல. ஆனால் விழி மூடி விழி திறப்பதற்குள் செய்யக் கூடிய ஆற்றலைப் பெற்ற பரம்பொருளால் பல ஆண்டுகாலமாக வேடிக்கையாக லீலா வினோதமாக செய்யப்பட்ட ஒரு விஷயமப்பா. இன்னும் இதுகுறித்து நுணுக்கமான வாக்கினை தக்க காலத்தில் உரைக்கின்றோம்.

கேள்வி: பல ஆதிசங்கரர்கள் பல ஔவையார்கள் இருந்தார்களா ?

இறைவனின் கருணையால் உண்மையான முதன்மையான பெயரில் இருப்பது ஒருவர்தான் என்றாலும் அவர்கள் மீது பற்றுகொண்டு இப்பொழுது போல பெயரை சூட்டிக்கொள்வது அந்தக் காலத்திலும் உண்டு. எனவே அப்படி இருந்தது உண்மை. அப்படியிருந்து சிலவற்றை எழுதியிருப்பதும் உண்மை. ஆனால் யாங்கள் எப்பொழுதும் சுட்டிக் காட்டுவதும் கூறுவதும் முதன்மையான நாமம் கொண்டவர்களை குறித்துதான்.

கேள்வி: ஆண் பிள்ளை இல்லாத நிலையில் ஒரு பெண் தன் முன்னோர்களுக்கு சிரார்த்தம் போன்றவற்றை செய்யும் முறை:

இறைவனின் கருணையால் முன்பே கூறியிருக்கிறோம். யாருக்கும் யார் வேண்டுமானாலும் செய்யலாம் என்று. யாரை நினைத்து யார் வேண்டுமானாலும் இதுபோன்ற காரியங்களை செய்யலாம். அதோடு கூட தனக்குப் பின் வரும் வாரிசு செய்தால்தான் தன்னுடைய ஆத்மா கடைத்தேறும் என்ற நிலையில் ஒரு மனிதன் வாழக் கூடாது என்றும் நாங்கள் கூறுகிறோம். ஒரு பெண் தாராளமாக நடைமுறையில் எதையெல்லாம் செய்ய முடியுமோ அதையெல்லாம் செய்யலாம். சாஸ்திரம் அனுமதிக்கவில்லை நாங்கள் ஒத்துக்கொள்ள மாட்டோம் என்று யாராவது கூறினால் ஆத்மார்த்தமான வழிபாட்டை இல்லத்தில் செய்து நிறைய தர்மங்களை அந்தப் பெண் செய்தால் போதும்.

கேள்வி: தைராய்டு மற்றும் வறட்டு இருமலுக்கு மருந்து அருள வேண்டும்:

இறைவனின் கருணையால் இதுபோல் கூறவருவது யாதென்றால் கசப்பும் துவர்ப்புமான உணவுப் பொருள்களை அதிகம் சேர்த்துக் கொண்டால் இரண்டு பிரச்சினைகளும் சமமாகும். அதைவிட மருந்தை ஏற்பதைவிட முறையான சுவாசப் பயிற்சியை உடற்பயிற்சியை கற்றுக் கொண்டு செய்வதும் முறையான யோகாசனங்களை சூரிய நமஸ்காரத்தை செய்வதுமாக இருந்தால் இந்த சுரப்பி மட்டுமல்லாமல் அனைத்து சுரப்பிகளுமே சீர்படும்.

கேள்வி: மனோபலத்தை அதிகரிக்க எந்த ஆலயங்களில் வழிபாடு செய்வது?

பிரார்த்தனை ஆலய தரிசனம் தர்மம் ஒருபுறம். அடுத்ததாக இறைவனிடம் பிரார்த்தனை செய்யும் பொழுது எனக்கு மனோபலம் அதிகரிக்க வேண்டும். என் மனோபலம் உறுதியாக இருக்கிறதா? என்று நான் பார்க்க வேண்டும். வெறும் சுகமான சந்தோஷமான அனுபவங்களும் நடந்து கொண்டே இருந்தால் எனக்கு மனோபலம் இருக்கிறதா? இல்லையா? என்றே தெரியாது. எனவே எனக்கு துக்கமான சோதனையான வேதனையான அனுபவங்களும் இன்னும் கூறப்போனால் ஏளனங்களும் அவமானங்களும் அதிகமாக வேண்டும் இறைவா அவை அதிகமாக வந்தாலும் நான் கோபப்படாமல் அவர்கள் மீது சினம் கொள்ளாமல் ஆத்திரம் கொண்டு கடுமையான நடவடிக்கை எடுக்காமல் பொறுமையோடும் புன்முறுவலோடும் அதனை ஏற்கக் கூடிய பக்குவத்தைக் கொடு என்று பிரார்த்தனை செய்து கொண்டே வந்தால் ஒரு மனிதன் நேர்மையான மனிதனாக இருந்தால் இறைவழியில் சத்திய வழியில் வருபவனாக இருந்தால் தர்மத்தை பின்பற்றக் கூடிய மனிதனாக இருந்தால் கட்டாயம் மேற்கூறிய துன்பங்கள் ஏளனங்கள் அவமானங்கள் அவனுக்கு மனோபலத்தை அதிகரிக்கும். இதைத் தாண்டி அவன் பஞ்சாக்ஷரத்தையோ அட்டாக்ஷரத்தையோ வேறு இஷ்ட தெய்வ நாமத்தையோ வடகிழக்கு திசைநோக்கி பத்மாசனத்தில் அமர்ந்து அதிகாலையில் அதிகமதிகம் உருவேற்றினால் கட்டாயம் மனோபலம் அதிகரிக்கும்.

கேள்வி: முக்கண்ணனின் திருவடிகளை தரிசிக்க ஆசிகள் தாருங்கள் :

இறைவனின் கருணையாலே பல்வேறு விதமான துன்பங்களையும் சோதனைகளையும் தாங்க மனதிலே வலிமையை வளர்த்துக் கொண்டால் முக்கண்ணனின் திருவடியை தரிசிக்கலாம். முக்கண்ணனும் சிக்கலாம்.

கேள்வி: எத்தனை முறை இராம நாமம் கூறினால் அனுமனின் தரிசனம் கிடைக்கும்?

இறைவனின் கருணையாலே இதுபோல் எத்தனை முறை கூறுகிறோம்? என்பதை விட முன்பே கூறியது போல எப்படிப்பட்ட மனோநிலையில் கூறுகிறோம்? என்பதே உண்மையாகும். எனவே எண்ணிக்கை பாராமல் நாள் பாராமல் எதனையும் சிந்திக்காமல் ஒருவன் தன் கடமைகளை தவறாமல் உள்ளார்ந்த அன்போடு செய்து கொண்டே உள்ளன்போடு ஸ்ரீ ராம நாமத்தை உதட்டில் மட்டுமல்லாது உள்ளத்தில் கூறிக்கொண்டே இருந்தால் கட்டாயம் ஆஞ்சனேய பகவானின் கருணை கிட்டும். மனிதர்கள் நன்றாக புரிந்து கொள்ள வேண்டும். இறைவனை மகானை தரிசிக்க வேண்டும் என்று எண்ணுகிறார்கள். இறைவனை தரிசிப்பது மட்டுமே மிகப்பெரிய ஆன்மீக நிலை என்று எண்ணி விடக்கூடாது. இறைவனை தரிசித்த அசுரர்களின் கதி என்னவாயிற்று? என்பதை மனிதர்கள் புரிந்து கொள்ள வேண்டும்.

இறைவனை தரிசிப்பது என்பது வேறு இறைவனிடம் அருளை பெறுவது என்பது வேறு இறைவனிடம் வரம் பெறுவது என்பது வேறு இறைவனாகவே மாற வேண்டும் என்று எண்ணி தவம் செய்வது என்பது வேறு. சாயுச்சம் சாரூபம் சாமீபம் சாலோகம் என்ற நிலைகளையெல்லாம் தாண்டிய நிலையும் இருக்கிறது என்பதை மனிதர்கள் புரிந்து கொள்ள வேண்டும். இதுபோல் நிலையிலே நல்விதமாய் இதுபோல் ஆஞ்சனேயரின் கருணையை பெறுவதற்கு இந்த வழிபாடுகள் உதவும்.

கேள்வி: பல்வேறு பழமையான கோவில்களில் உள்ள தூண்களில் இருக்கும் ஜடாமுடி சித்தர் பற்றி:

இறைவனின் கருணையாலே ஒரு ஆலயம் கட்டப்படும் பொழுது பல நிகழ்ச்சிகள் அந்த காலகட்டத்தில் நடக்கும்பொழுது அதன் எதிரொலியாக அருள்வாக்கு சிற்பங்கள் செதுக்கப்படுகின்றன. அந்த நாட்டை ஆளுகின்ற அரசனின் மனோநிலையை எதிர்பார்ப்பை பிரதிபலிக்கும் வண்ணமும் சிற்பங்கள் செதுக்கப்படுகின்றன. எல்லாவற்றையும் விட அந்த ஆலயம் கட்டப்படுவதற்கு காரணமாக இருக்கின்ற இருந்த சில மனிதர்களின் மனோபாவத்திற்கு ஏற்பவும் ஆலயத்திலே சில வழிமுறைகள் பின்பற்றப்பட்டன. அந்தவகையில்தான் அவ்வப்பொழுது அந்த ஆலயத்திற்கு வந்து ஆலோசனை சொன்ன சொல்லுகின்ற மனிதர்கள் அவர்கள் மனிதர்களில் உயர்ந்தவர்களாக இருக்கலாம். மகானாகவும் இருக்கலாம். சித்தர்களாகவும் இருக்கலாம். அவர்களையெல்லாம் கூட நினைவு வைத்திருந்து ஆலயத்திலே சிற்பமாக மாற்றுவது அக்காலத்தில் மரபாக இருந்திருக்கிறது. மகான்களும் மகா மனிதர்களும் அந்த சிற்பத்தில் அடங்குவார்கள்.

கேள்வி: பிளாஸ்டிக் பொருள் இயற்கையாக மண்ணோடு மண்ணாக மக்கிப் போகும் வகையில் ஒரு வேதிப்பொருளை இவ்வுலகுக்கு அருள் செய்ய வேண்டும்:

நல்ல பாம்பு இருக்கிறது. அதை எடுத்து மேலே விட்டுக் கொள்வேன். அது என்னைத் தீண்டும். விஷம் உள்ளே இறங்கும். அந்த விஷம் பாதிக்காமல் இருக்க ஒரு மருந்தைக் கொடுங்கள் என்று கேட்கிறான். எதற்கு பாம்பை எடுப்பானேன்? மேலே விடுவானேன்? எதற்கு அந்த விஷத்தை உள்ளே வாங்குவானேன்? இதுதான் எமது வினா. எது தவறு தீங்கு என்று தெரிந்து விட்டதோ அதை விட்டு விடுவதுதான் சிறப்பு. இருந்தாலும் இப்பொழுது இதே உலகத்திலே இது போன்ற சுயநலமும் பேராசையும் உள்ள தேசத்தில்தான் ஒரு பொருள் தவறு என்று தெரிந்தாலும் தொடர்ந்து பயன் படுத்தப்படுகிறது லாப நோக்கத்திற்காக. மற்ற தேசங்களிலே இவைகள் எல்லாம் குறைக்கப்பட்டு வருகிறது. அதுமட்டுமல்லாமல் இன்னவன் கூறியது போல இதுபோல் இலகு உருகியான இதனை மிகவும் உயர்தரமாக தயாரித்தால் அதனால் எந்தவிதமான தீங்கும் மண்ணிற்கு இல்லை. அதனை மறு சுழற்சிக்கு உட்படுத்தலாம். மலிவாக தரம் குறைந்ததாக தயாரிப்பதால்தான் அதன் தன்மை நச்சுப்பொருளாக மாறுகிறது. இதனையெல்லாம் மனிதனுக்கு கற்றுக் கொடுத்தது இறைவன்தான். இறைவன் ஏன் இதனையெல்லாம் கற்றுக் கொடுக்க வேண்டும்? இறைவனை நோக்கிதான் இந்தக் கேள்வியை கேட்க வேண்டும். இதனை கற்றுக் கொடுத்த இறைவனே இதனை நீக்குவதற்கும் உண்டான இன்னவன் கூறியது போன்ற ஒரு பொருளை கற்றுக் கொடுப்பதற்கும் ஒரு வழிகாட்டுவார். விரைவில் அதற்கான சூழல் ஏற்படும். ஆனால் அப்படியொரு சூழல் வந்தாலும் கூட இங்கு உடனடியாக அது வரப்போவதில்லை என்பதே உண்மை.