ஜீவ நாடி வழியாக அகத்திய மாமுனிவர் வாக்கு

கேள்வி: கோவில்களின் கும்பாபிஷேகம் நடக்க ஆசிகள் மற்றும் நீதிக்கதை ஒன்று:

இறைவனின் கருணையைக் கொண்டு நல்விதமாய் இதுபோல் பல்வேறு ஆலயங்கள் கலச விழா காண வேண்டும் என பல பக்தர்கள் எண்ணுகிறார்கள். கட்டாயம் நடக்கும். நல்விதமாய் பல நல்ல உள்ளங்கள் ஒன்று கூடி பிரார்த்தனை செய்தால் அதில் உள்ள எதிர்ப்புகள் குறைந்து நல்ல ஆத்மாக்களின் உதவியால் விரைவில் அதுபோல் திருப்பணி நடக்கும். இதுபோல் நடக்கின்ற நிகழ்ச்சிகளை கவனித்துக் கொண்டே இருந்தால் ஒவ்வொரு நிகழ்வின் பின்னாலும் நீதி இருக்கிறது. ஒவ்வொரு நிகழ்வின் பின்னாலும் அற்புதமான கருத்தும் இருந்து கொண்டுதான் இருக்கிறது. தக்க காலத்தில் மிக சிறந்த நீதிக்கதையை யாங்கள் போதிப்போம்.

தீய பழக்கங்களால் சிறு பிள்ளைகள் பாதிக்கப்படுகின்றனர்:

அமாவாசை தோறும் அன்னை காளிக்கு வழிபாடு செய்தால் இது போன்ற தவறான பழக்கங்களுக்கு தத்தம் பிள்ளைகள் ஆட்படாமல் காத்துக் கொள்ளலாம். இது பக்தி மார்க்க வழி. அடுத்ததாக ஒரு சமுதாயம் தவறான ஒரு செயலை செய்வதாக மனிதன் எண்ணுகிறான். அதே சமுதாயம் பல நல்ல விஷயங்களையும் செய்து கொண்டு இருக்கிறது. அதற்கு எத்தனை மனிதர்கள் ஆதரவு காட்டுகிறார்கள்? ரத்த தானம் செய்யுங்கள் என்று கூறினால் அதைக்கண்டு மனிதன் இன்னும் அஞ்சுகிறான். உடலை தானம் தரலாம் என்று நாங்கள் கூறினாலும் அது குறித்து இன்னும் மூடப்பழக்கங்களில் மூழ்கிக் கொண்டு இன்னமும் மூடத்தனமாகவே வாழ்கிறான். விழி தானம் செய்யுங்கள் என்றால் எத்தனை பேர் முன் வருகிறார்கள்? எனவே நல்ல விஷயங்களை பார்க்க சிந்திக்க பின்பற்ற குழந்தைகளுக்கு பெற்றோர்கள் முன் உதாரணமாக இருக்க வேண்டும். அடுத்ததாக கடுமையான பித்ரு தோஷங்கள்தான் குழந்தைகளுக்கு தீய பழக்க வழக்கங்களை ஏற்படுத்துகிறது. எனவே மனம் தளராமல் நாங்கள் கூறிய வழிபாட்டை செய்வதோடு கால பைரவர் வழிபாட்டையும் செய்து வந்தால் நல்ல பலன் உண்டு.

கேள்வி: ஊட்டத்தூர் பற்றி:

ஆன்மாவிற்கு அதிகம் புண்ணியத்தை ஊட்டும் ஊரப்பா. அன்னவன் கூறியதுபோல இவை சிறப்பான அபூர்வமான ஸ்தலங்கள். அதுபோல் அந்த நடராஜர் சிறப்பான நடராஜர். தன் பிள்ளைகள் கலைகளிலே தேர்ச்சி அடைய வேண்டும் விற்பன்னனாக வேண்டும் என்ற ஆசையிருப்பவர்கள் ஜென்ம நட்சத்திரத்திலோ அல்லது வாய்ப்பு இருக்கும் பொழுதோ சென்று உயர்வான முறையிலே வழிபாடு செய்து வந்தால் கட்டாயம் அந்த கலைஞானத்தை முக்கண்ணன் ஆடல்வல்லான் மூலம் வழங்குவார். எனவே அங்கும் முடிந்தவரை சிறப்பான முறையிலே கலப்படமில்லாத பொருள்களைக் கொண்டு அபிஷேகங்கள் செய்வது தூய சந்தனக்காப்பு செய்வதும் இங்குள்ள அன்பர்களுக்கும், அங்கு வரக்கூடிய அன்பர்களுக்கும் சிறப்பைத் தரும். கலை என்றால் அனைத்தும் கலைதான். ஆன்மீகமும் இந்த கலையில் சேரும். ஆன்மீகத்திலிருந்து பிறவியற்ற நிலையை அடைவதும் ஒரு கலைதான். ஞானமும் ஒரு கலைதான். அதற்கும் அங்கு சென்று வழிபாடு செய்யலாம்.

இக்கோவிலைப் பற்றி மேலும் அறிந்து கொள்ள கீழ் உள்ள லிங்கை க்ளிக் செய்யவும்

பஞ்சநதன நடராஜர்

கேள்வி: ஆலய சிலாரூபங்களை தூய்மைப்படுத்தும் போது கூர்மையான ஆயுதங்களை பயன்படுத்தினால் தெய்வங்களுக்கு வலிக்குமோ என்ற எண்ணம் ஏற்படுகிறது. அதனால் எதைப் பயன்படுத்தி சிலாரூபங்களை தூய்மைப்படுத்துவது?

இறைவனின் கருணையால் யாங்கள் இயம்புகிறோம். இறைவனின் சிலாரூபங்களை சேதப்படுத்துவதாலோ அல்லது மனித பார்வையிலே அவமானப் படுத்துவதாலோ அல்லது அதனை கூரான ஆயுதங்களால் சுத்தப்படுத்துவதாலோ வலிக்கிறது என்பதை விட மனிதர்கள் நடந்து கொள்வதை பார்க்கும் பொழுதுதான் இறைவனுக்கு அதிகமாக வலிக்கிறது. எனவே மனிதர்கள் தன்னை திருத்திக் கொண்டு நல்லவனாக உயர்ந்த குணங்களைக் கொண்டவனாக வாழ்ந்துவிட்டு தன்னை தூற்றினாலும் கூட இறைவன் முழுமனதோடு ஏற்றுக் கொள்வார். இருந்த போதிலும் கூட அற்புதமான சிலாரூபங்கள் பல்வேறு பக்தர்களுக்கு இறைவனாகவே காட்சி தருவதால் அதனை கையாளும் போது கவனம் வேண்டும்.கூர்மையான ஆயுதங்களை தவிர்ப்பது நல்விதமான வேறு முறைகளை கையாள்வது நல்ல பலனை நல்கும். இதுபோல் நல்விதமாய் சாத்வீகமான பொருள்களை பயன்படுத்தி சுத்தி செய்கின்ற முறைகள் இருக்கின்றன. மூலிகை சாறினை பயன்படுத்தலாம். உயர்வான முறையிலே தயிரை எடுத்து அதோடு அரிசி மாவினையும் கடலை பருப்பை மாவாக்கி அதனையும் பச்சைப் பயிறை மாவாக்கி அதனையும் சேர்த்து நல்விதமாக சிலாரூபங்கள் முழுவதும் தேய்த்து தூய்மையான பருத்தி துணி கொண்டு அதனை மென்மையாக தேய்த்து சுத்தி செய்யலாம். அரசக்கனியின் சாற்றைக்கொண்டு சுத்தி செய்யலாம். இது போன்ற சில முறைகளை கையாள்வது சிறப்பு.

கேள்வி: நந்தியெம்பெருமான் திருக்கல்யாணம் பற்றி கூறுங்கள்:

இறைவனின் கருணையாலே நல்விதமாய் இறைவனை தாங்குகின்ற வாகனமாக தர்மமே நந்தியாக அவதாரம் செய்திருக்கிறது. எனவே அதுபோல் நந்தியின் திருக்கல்யாணம் என்பது மனிதர்களின் திருமண தோஷத்தை நீக்கக் கூடிய வகையிலே நடத்தப்படுவதாகும். இதற்குள் இன்னும் பல தத்துவார்த்த விளக்கங்கள் இருக்கின்றன. அங்கே தர்மம் வாழத் துவங்குகிறது. தர்மம் இறைவனை தாங்கி நிற்கிறது. இறைவனை தாங்குவது தர்மம்தான். எனவே அந்த இடத்திலே அதை நந்தியாக பாராமல் தர்மமாக பார்த்துவிட்டால் அந்த தர்மத்தை கடைபிடித்து எல்லோரும் வாழவேண்டும் என்பதின் உட்பொருள்தான் நந்தியெம்பெருமானின் திருமணம்.

கேள்வி: நரசிம்மர் சரபேஸ்வரர் – இந்த அவதாரங்கள் பற்றி:

பரம்பொருள் மஹாவிஷ்ணுவின் அவதாரம் நரசிம்மர். அந்த வழிமுறைகள் மனிதர்கள் அறிந்ததே. அதைப்போல முக்கண்ணனாகிய சிவபெருமானின் அவதாரங்களில் ஒன்று சரபர். எல்லாம் நடந்தது உண்மை. ஆனால் அதை மனிதர்கள் புரிந்துகொள்கின்ற விதத்தில்தான் குற்றம் இருக்கிறது. இரண்டையும் ஏட்டிக்குப் போட்டியாக குற்றமாக சண்டை சச்சரவாகப் பாராமல் எல்லாம் பரம்பொருளின் வடிவமாக பார்க்க நன்மை உண்டு. இதுபோல் நல்விதமாய் யாங்கள் கூறிய நாழிகை இதோடு பூர்த்தியடைகிறது. இருந்தாலும்கூட யாங்கள் இன்னும் நல்விதமாய் இரண்டரை நாழிகை வாக்கு ஓத இருக்கிறோம். எனவே இதுபோல் நல்விதமாய் மனிதர்கள் அயர்வு கண்டு அன்னம் ஏற்று பிறகு எம்முன் அமர சரியாக அமரும் காலத்திலிருந்து இரண்டரை நாழிகை யாங்கள் இறைவன் அருளால் வாக்கை ஓதுகிறோம். அனைவருக்கும் நல்லாசிகள்.

கேள்வி: நவ பிருந்தாவனப் பகுதியில் பாறைகள் சிறு சிறு கற்களாக உள்ளது பற்றி:

இது குறித்து நீண்ட விளக்கம் கூறவேண்டும். இருந்தாலும் இறை சாந்நித்யம் மிக்க இடங்களில் அதுவும் ஒன்று. அனாச்சாரம் செய்யாமல் ஆர்பாட்டம் இல்லாமல் அங்கு சென்று வணங்கினால் நன்மை உண்டு. அங்கு இன்றும் பல ரிஷிகள் தவம் செய்து கொண்டிருக்கிறார்கள்.

நவ பிருந்தாவனம் பற்றி மேலும் அறிந்து கொள்ள கீழ் உள்ள லிங்கை க்ளிக் செய்யவும்

நவ பிருந்தாவனம்

கேள்வி: திருவேங்கட மலையில் மீதமிருக்கும் இரண்டு மலைகளின் பெருமைகளைப் பற்றி:

இந்த அண்டசராசரங்களில் பெருமை உடைய பொருள் எது இல்லை? என்று சொல். எல்லாமே பெருமை உடையதுதான். ஏன்? மனிதன்கூட குழந்தையாக இருக்கும் போது பெருமைக்குரிய குழந்தையாகத்தான் இருக்கிறான். வளர வளர வஞ்சகங்கள் வளர்கின்றன. இறைவனின் படைப்பில் எல்லாம் உயர்ந்ததுதான் எல்லாம் மிக மிக சிறந்ததுதான். ஒன்று உயர்வு ஒன்று தாழ்வு என்பது அல்ல. இருந்தாலும் இன்னவன் கூறுகின்ற மலை தன்னிலே இன்னமும் பலவிதமான மகரிஷிகள் ரிஷிகள் சித்தர்கள் நல்விதமான தவத்தில் ஈடுபட்டுக் கொண்டிருக்கிறார்கள். திருமலை பகுதியிலே வாய்ப்பு இருப்பவர்களுக்கு தும்புரு மகரிஷி தரிசனம் கொடுத்துக் கொண்டுதான் இருக்கிறார். எனவே இதுபோல் ரிஷிகளை பார்க்க வேண்டும் என எண்ணுபவர்கள் நாங்கள் கூறுகின்ற வழி முறையை பின்பற்றி இது போன்ற மலைகளிலே மனமொன்றி தவம் செய்து அனாச்சாரம் செய்யாமல் சென்று வந்தால் அவர்களின் அருள் ஏதாவது ஒரு வகையில் கிட்டும்.

கேள்வி: வைராக்யம் மற்றும் விடாமுயற்சியுடன் இருக்க வழிமுறை:

இறைவன் அருளாலே தொடர்ந்து இதுபோல் நல்விதமாய் மனிதன் போராட கற்றுக் கொள்ள வேண்டும். அயர்ந்து விடக்கூடாது. இறைவனை வணங்குவதோடு சத்தியத்தை பின்பற்றுவதோடு தர்ம காரியங்களை செய்வதோடு தொடர்ந்து எத்தனை துன்பங்கள் வந்தாலும் துவண்டு விடாமல் போராடும் குணத்தை வளர்த்துக் கொள்ள வேண்டும். அன்றாடம் தன்னைத்தானே சுய ஆய்வு செய்ய வேண்டும். இன்று எத்தனை செயல்கள் செய்தோம்? அதில் எத்தனை நற்செயல்கள்? எத்தனை அவச்செயல்கள்? இனிமேல் இந்த அவச்செயல்களை செய்யக் கூடாது என்றெல்லாம் சுய ஆய்வு செய்து தன்னைத்தான் நீதிபதியாக குற்றவாளியாக சாட்சியாக அங்கே அவன் தீர்ப்பு வழங்க வேண்டும். இப்படி சுய ஆய்வு செய்து கொண்டே ஒரு மனிதன் வாழ்ந்தால் வைராக்யம் வளர்ந்து விடும்.

கேள்வி: கோவில்களில் அபிஷேகம் செய்யப் பயன்படும் பாலை அது கிட்டாதவர்களுக்கு வழங்கலாமே?

இறைவன் அருளாலே யாருக்கு எது தேவையோ அதை தாராளமாக தரலாம். இறைவன் திருமேனியில் அபிஷேகம் செய்வது வீண் என்று எண்ணி அதை ஏழைகளுக்கு கொடுத்தாலும் இறைவன் சந்தோஷம்தான் அடைவார். யாங்களும் திருப்திதான் அடைவோம். ஆனால் ஒன்று. ஒரு குழந்தைக்கு விலையுயர்ந்த ஆடையை அணிகலன்களை பெற்றோர்கள் அணிந்து பார்த்து மகிழ்கிறார்கள். குழந்தைக்கு அதன் மதிப்பு தெரியுமா? அல்லது குழந்தை அதைக் கேட்டதா? குழந்தைக்கு அவையெல்லாம் அணிந்து பார்ப்பதில் அந்த மனிதனுக்கு ஒரு சந்தோஷம் ஒரு திருப்தி. அடுத்ததாக கருங்கல்லாக அல்லது பஞ்சலோக விக்ரகமாக பார்க்கின்ற தன்மை வேறு. அது இறை பரம்பொருள் என்ற எண்ணம் வேறு. அங்கே சாக்ஷாத் இறைவன் இருக்கிறார் அருள் புரிகிறார் அங்கு இருப்பது பரம்பொருள்தான் என்ற எண்ணம் உறுதியாக இருந்தால் அவையெல்லாம் வீண் என்ற எண்ணம் வருமா? எனவே இது அவனவன் மனோநிலையை பொருத்ததாகும். எதை செய்தாலும் எமக்கு உடன்பாடே. ஆனால் செய்கின்ற மனோதர்மத்தைப் பொறுத்து அதனை நாங்கள் ஏற்றுக்கொள்வோம்.